តើមន្ទីរទេសចរខេត្តកែប និងកំពត មានការរំពឹងបែបណាក្នុងការស្រូបទាញភ្ញៀវទេសចរក្នុងឱកាសបុណ្យអុំទូក?

លោក ប៉ុក ទាំង ប្រធានមន្ទីរទេសចរណ៍ខេត្តកែប ហាក់មិនបានបង្ហាញក្តីរំពឹងខ្ពស់ក្នុងការទទួលបានភ្ញៀវទេសចរទៅលេងកម្សាន្តនៅខេត្តកែបច្រើននោះទេ នៅក្នុងអំឡុងពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅចន្លោះពីថ្ងៃទី១៤-១៦ ខែវិច្ឆិកា ឆ្នាំ២០២៤។ តែទោះជាយ៉ាងណា អាជ្ញាធរខេត្តកែប បានចុះផ្សព្វផ្សាយ និងអប់រំដល់អ្នកអាជីវករកុំឱ្យមានការដំឡើងថ្លៃផលិតផល ឬសេវាកម្ម ដើម្បីធានាភាពល្អប្រសើរនៃការធ្វើបដិសណ្ឋារកិច្ច ក៏ដូចជាទាក់ទាញភ្ញៀវទេសចរ​។ បើតាមការអះអាងរបស់ប្រធានមន្ទីរទេសចរណ៍ខេត្តកែបរូបនេះ មកទល់ពេលនេះបន្ទប់ស្នាក់នៅមួយចំនួនក្នុងខេត្តកែប ត្រូវបានអ្នកទេសចរកក់ទុកជាបណ្ដើរៗហើយ។

​ដោយឡែកលោក សយ ស៊ីណុល ប្រធានមន្ទីរទេសចរណ៍ខេត្តកំពត បានឱ្យដឹងថា មកទល់ពេលនេះ បន្ទប់ស្នាក់នៅក្នុងខេត្តកំពត ពុំសូវមានការកក់ទុកច្រើនដូចពេលមុននោះទេ ខណៈអ្នកទេសចរមួយចំនួនតែងធ្វើដំណើរមកលេងកម្សាន្តនៅពេលរដូវបុណ្យចូលមកដល់។ ការផ្លាស់ប្ដូរទម្លាប់នេះ ក៏ដោយសារតែបច្ចុប្បន្នហេដ្ឋារចនាសម្ព័ន្ធមានភាពល្អប្រសើរ ដែលបង្កភាពងាយស្រួលដល់ការធ្វើដំណើររបស់អ្នកទេសចរ។ តែយ៉ាងណាលោករំពឹងថា នៅក្នុងពិធីបុណ្យអុំទូកឆ្នាំនេះខេត្តកំពតនឹងទទួលបានអ្នកទេសចរទៅលេងកម្សាន្តច្រើនដូចឆ្នាំមុនៗដែរ។ ប្រធានមន្ទីរទេសចររូបនេះ បានអះអាងថា អាជ្ញាធរ​បានត្រៀមខ្លួនជានិច្ចក្នុងការស្វាគមន៍អ្នកទេសចរ និងបានណែនាំដល់អ្នកធ្វើជីវកម្មនានា ឱ្យមានការយល់ដឹងពីផលប្រយោជន៍នៃការរក្សាតម្លៃសេវាកម្ម តាមរយៈការគ្រប់គ្រងលើបញ្ជីតម្លៃសេវាកម្ម ដើម្បីបង្ការបាតុភាពណាមួយដែលអាចកើតមានឡើង។

​សូមជម្រាបថា ពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកនៅក្នុងឆ្នាំនេះ នឹងប្រព្រឹត្តទៅរយៈពេល៣ថ្ងៃចាប់ពីថ្ងៃទី១៤ ដល់១៦ ខែវិច្ឆិកា ឆ្នាំ២០២៤៕

អត្ថបទ៖ បូ ដូឡា​