រដ្ឋមន្ត្រីការពារជាតិអូស្ត្រាលី លោក ភីធឺ ដុតតុន (Peter Dutton) នឹងប្រកាសពីកិច្ចព្រមព្រៀងថ្មីនៅថ្ងៃច័ន្ទសប្តាហ៍នេះ ក្រោយសហរដ្ឋអាមេរិកបានអនុញ្ញាតការបញ្ជាទិញខាងលើចាប់តាំងពីឆ្នាំមុនមកម្ល៉េះ។
ក្នុងចំណោមរថក្រោះ និងរថពាសដែកទាំង១៤០គ្រឿង អូស្ត្រាលីនឹងបញ្ជាទិញរថក្រោះប្រភេទ M1A2 Abram ចំនួន ៧៥គ្រឿង រថពាសដែកកំទេចគ្រឿងផ្ទុះ២៩គ្រឿង រថពាសដែកដែលអាចធ្វើជាស្ពានចម្លងបាន ចំនួន១៧គ្រឿង និងរថពាសដែកសម្រាប់ជួសជុលគ្រឿងចក្រចំនួន៦គ្រឿង។
ក្រៅតែពីការធ្វើទំនើបកម្មកងទ័ពជើងគោក រដ្ឋមន្ត្រីការពារជាតិអូស្ត្រាលី លើកឡើងថា ជាមួយនឹងរថក្រោះ និងរថពាសដែកទំនើបៗពីសហរដ្ឋអាមេរិក នឹងធានាបានលទ្ធភាពខ្ពស់ក្នុងការយកឈ្នះសត្រូវនៅលើសមរភូមិ ព្រមទាំងការពារអូស្ត្រាលីពីការគម្រាមកំហែងនានានៅពេលអនាគតផងដែរ។
អត្ថបទគួរអាន
អូស្ត្រាលីគ្រោងនឹងចំណាយប្រាក់ចន្លោះពី៣០ពាន់លានដុល្លារ ទៅ៤២ពាន់លានដុល្លារអាមេរិកបន្ថែមទៀត លើរថពាសដែក នៅប៉ុន្មានឆ្នាំខាងមុខនេះ។ យ៉ាងណាមិញ ការបញ្ជាទិញជាបន្តបន្ទាប់របស់អូស្ត្រាលី ទៅលើរថក្រោះ និងរថពាសដែកនេះ បានរកការរិះគន់ និងការជជែកវែកញែកពីសំណាក អ្នកជំនាញលើវិស័យយោធាជាច្រើន។ រិះគន់ក៏ដោយសារតែពួកគេយល់ថា រថក្រោះនឹងរថពាសដែកគឺមិនចាំបាច់ទាល់តែសោះ ដើម្បីយកមកការពារសុវត្ថិភាព ស្របពេលកំពុងមានភាពតានតឹងជាចិន ដែលជាមហាអំណាចខ្លាំងក្លាលើទ័ពជើងទឹក និងជើងអាកាស។ នេះបើតាមការចុះផ្សាយពីសារព័ត៌មាន អូស្ត្រាលី Sydney Morning Herald។
គួរកត់សម្គាល់ថា រថពាសដែកដំបូងដែលអូស្ត្រាលីបញ្ជាទិញពីអាមេរិក នឹងបញ្ចប់ការផលិតហើយដឹកមកដល់អូស្ត្រាលីនៅឆ្នាំ២០២៤ ហើយរំពឹងថា នឹងអាចដាក់ឲ្យប្រើប្រាស់នៅមួយឆ្នាំបន្ទាប់។
គួរជម្រាបថា បន្ទាប់ពីកិច្ចព្រមព្រៀងនាវាមុជទឹក AUKUS កិច្ចព្រមព្រៀងទិញ-លក់រថពាសដែកខាងលើ ជាកិច្ចព្រមព្រៀងចុងក្រោយបំផុតមួយ ដែលសម្ព័ន្ធមិត្តទាំងពីរព្យាយាមពង្រឹងវិស័យយោធារួមគ្នា ដើម្បីទប់ទល់នឹងសមត្ថភាពរបស់យោធាចិន ដែលចេះតែកើនឡើងពីមួយឆ្នាំទៅមួយឆ្នាំ ពិសេសឥទ្ធិពលរបស់ប៉េកាំងនៅក្នុងតំបន់ឥណ្ឌូប៉ាស៊ីហ្វិក៕
None
