ប្រទេសអូស្ត្រាលីធ្លាប់ទទួលបានជោគជ័យម្ដងហើយ លើការគ្រប់គ្រងករណីផ្ទុះជំងឺកូវីដ ១៩ តាមរយៈការបិទខ្ទប់ និងការគ្រប់គ្រងព្រំដែនដ៏តឹងរ៉ឹងកាលពីចាប់ផ្ដើមមានជំងឺរាតត្បាតនេះដំបូង។ ប៉ុន្តែនៅមួយរយៈចុងក្រោយនេះ ប្រទេសអូស្ត្រាលីបាននិងកំពុងទទួលរងនូវព្យុះភ្លៀងនៃការឆ្លងថ្មីកាន់តែច្រើនឡើងពីមួយថ្ងៃទៅមួយថ្ងៃ នៅគ្រាដែលប្រទេសនេះបានចាប់ផ្តើមរស់នៅជាមួយជំងឺកូវីដ១៩ បន្ទាប់ពីពលរដ្ឋភាគច្រើនបានទទួលការចាក់វ៉ាក់សាំង។
បច្ចុប្បន្ននេះ អូស្ត្រាលីបានរឹតបន្តឹងច្បាប់ព្រំដែនដ៏តឹងរ៉ឹងរបស់ប្រទេសខ្លួនឡើងវិញម្ដងទៀតហើយ ដើម្បីទប់ទល់ការចម្លងជំងឺ ជាពិសេសមេរោគបំប្លែងអូមីក្រុង ដែលមានសមត្ថភាពចម្លងបានលឿនរហ័ស។
គួរជម្រាបថា គ្រាន់ករណីឆ្លងថ្មីនៅក្នុងរដ្ឋ New South Wales និង Victoria នៅពីថ្ងៃចន្ទនេះមានជាង ៥ម៉ឺន ៥ពាន់ករណី ខណៈករណីសរុបនៅក្នុងប្រទេសអូស្ត្រាលីបានកើនឡើងដល់ ១លាន ៣សែននាក់ហើយចំនួនអ្នកស្លាប់សរុបចំនួនជាង ២ពាន់ ៣រយនាក់។ យ៉ាងណាក៏ដោយ អត្រាសម្លាប់ក្នុងអំឡុងពេលលេចឡើងនូវវត្តមានមេរោគអូមីក្រុង គឺមានកម្រិតទាបជាងអំឡុងពេលការផ្ទុះឡើងនៃមេរោគមុនៗ។អត្ថបទគួរអាន
ត្បិតថាបែបនេះក្ដី ប៉ុន្តែគេកត់សម្គាល់ឃើញថា ការកើនឡើងនៃចំនួនសម្រាកព្យាបាលនៅមន្ទីរពេទ្យបានបង្ខំឱ្យអាជ្ញាធរត្រូវដាក់កម្រិតរឹតបន្តឹងឡើងវិញនៅក្នុងរដ្ឋនីមួយៗ។ ការដាក់កំហិតនេះ ស្របពេលដែលអាជីវកម្មជាច្រើនកំពុងតែខ្វះខាតបុគ្គលិក ដោយសារវិធានការធ្វើចត្តាឡីស័កសម្រាប់បុគ្គលិកដែលបានឆ្លងជំងឺនេះ បង្កជាការរំខានដល់សង្វាក់ផ្គត់ផ្គង់។
សូមជម្រាបថា រហូតមកទល់ពេលនេះ ប្រជាជនអូស្ត្រាលី ៧៨ភាគរយ នៃប្រជាជនសរុបបានចាក់វ៉ាក់សាំងចំនួន ២ ដូស និងដូសជំរុញមាន ១៤ភាគរយ។ ហើយចាប់ពីថ្ងៃចន្ទនេះទៅ អូស្ត្រាលីនឹងចាប់ផ្ដើមយុទ្ធនាការចាក់វ៉ាក់សាំង Pfizer ជូនកុមារអាយុពី ៥ ទៅ ១១ ឆ្នាំផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
