ក្រសួងសេដ្ឋកិច្ច និងហិរញ្ញវត្ថុ និងស្ថានទូតអូស្ត្រាលីប្រចាំនៅកម្ពុជា កាលពីថ្ងៃទី១ កុម្ភៈ ឆ្នាំ២០២១ បានចេញសេចក្តីប្រកាសព័ត៌មានរួមគ្នាមួយពាក់ព័ន្ធការផ្តល់ជំនួយហិរញ្ញប្បទានឥតសំណងរបស់រដ្ឋាភិបាលអូស្ត្រាលី ដើម្បីចូលរួមក្នុងសកម្មភាពប្រយុទ្ធប្រឆាំងការឆ្លងរីករាលនៃជំងឺកូវីដ-១៩ នៅកម្ពុជា។
រដ្ឋាភិបាលអូស្ត្រាលី នឹងផ្តល់ជំនួយហិរញ្ញប្បទានឥតសំណងចំនួន ៣៥,៧លានដុល្លារអូស្ត្រាលីដល់កម្ពុជា ដើម្បីទិញវ៉ាក់សាំងការពារជំងឺកូវីដ-១៩ ចាក់ជូនប្រជាពលរដ្ឋកម្ពុជា។ ឯកឧត្តម ផាប្លូ កាង ឯកអគ្គរាជទូតអូស្ត្រាលីប្រចាំនៅកម្ពុជាបានបញ្ជាក់ថា ជំនួយហិរញ្ញប្បទានរបស់អូស្ត្រាលីនេះ អាចទិញវ៉ាក់សាំងកូវីដ-១៩ ចាក់ឲ្យពលរដ្ឋកម្ពុជាបានប្រមាណ ១,៥លាននាក់។
សេចក្តីប្រកាសព័ត៌មានខាងលើបានបញ្ជាក់ថា៖ «ហិរញ្ញប្បទានឥតសំណងរបស់អូស្ត្រាលីនេះ អាចរួមចំណែកក្នុងការចាក់វ៉ាក់សាំងបង្ការជំងឺកូវីដ-១៩ ជូនដល់ប្រជាជនកម្ពុជាប្រមាណ ១,៥លាននាក់។ ការរួមចំណែកនេះ នឹងជួយជំរុញឲ្យរាជរដ្ឋាភិបាលកម្ពុជាសម្រេចបានកាន់តែឆាប់រហ័សនូវគោលដៅចាក់វ៉ាក់សាំងបង្ការជំងឺកូវីដ-១៩ ជូនប្រជាជនកម្ពុជាឲ្យបាន ៨០ភាគរយ នៃចំនួនប្រជាជនសរុប»។
អត្ថបទទាក់ទង!
ឯកឧត្តម អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានបង្ហាញអារម្មណ៍រំភើបរីករាយ និងអរគុណដល់រាជរដ្ឋាភិបាលអូស្ត្រាលី ដែលបានបង្ហាញជំហរដ៏រឹងមាំក្នុងការចូលរួមប្រយុទ្ធប្រឆាំងជំងឺកូវីដ-១៩ ជាមួយកម្ពុជា។ លោក ចាត់ទុកជំនួយនេះជាការឆ្លើយតបដ៏ចាំបាញ់សម្រាប់ប្រជាពលរដ្ឋ និងសេដ្ឋកិច្ចកម្ពុជា។
ឧបនាយករដ្ឋមន្ត្រីរូបនេះបានបន្ថែមថា៖«ការផ្តល់ជំនួយជាវ៉ាក់សាំងបង្ការជំងឺកូវីដ-១៩ របស់អូស្ត្រាលីសម្រាប់កម្ពុជានេះ គឺជាការបង្ហាញជាថ្មី អំពីការប្តេជ្ញាចិត្តដ៏យូរអង្វែង និងការគាំទ្រប្រកបដោយនិរន្តរភាពរបស់រដ្ឋាភិបាលអូស្ត្រាលី ដល់ការអភិវឌ្ឍសង្គម-សេដ្ឋកិច្ច និងអនាគតដ៏រុងរឿងរបស់កម្ពុជា»។
ឯកឧត្ដម ផាប្លូ កាង អះអាងថា «ដ្បិតកម្ពុជាបានចៀសផុតនូវផលប៉ះពាល់សុខភាពធ្ងន់ធ្ងរពីជំងឺកូវីដ-១៩ ក៏ដោយ ការផ្តល់វ៉ាក់សាំងជំងឺកូវីដ-១៩ ជូនប្រជាជនកម្ពុជាឲ្យបានទូទាំងប្រទេស នៅតែជាកត្តាដ៏សំខាន់ក្នុងការទប់ស្កាត់ និងបង្ការការរីករាលដាលនៃជំងឺកូវីដ-១៩ នាពេលអនាគត និងការស្តារឡើងវិញនូវសេដ្ឋកិច្ចរបស់កម្ពុជា»។
ឧបនាយករដ្ឋមន្ត្រី អូន ព័ន្ធមុន្នីរ័ត្ន អះអាងថា ការផ្តល់ជំនួយកូវីដ-១៩ របស់អូស្ត្រាលីនេះ គឺជាជំនួយបន្ថែមលើជំនួយអភិវឌ្ឍន៍៦៦លានដុល្លារអូស្ត្រាលី (ប្រមាណ៥០លានដុល្លារអាមេរិក) ដែលរដ្ឋាភិបាលអូស្ត្រាលីនឹងផ្តល់ឲ្យកម្ពុជានៅក្នុងឆ្នាំ២០២១ តាមរយៈផែនការអភិវឌ្ឍន៍សម្រាប់ឆ្លើយតបនឹងជំងឺកូវីដ-១៩ កម្ពុជា-អូស្ត្រាលី ដែលដាក់ឲ្យអនុវត្តកាលពីអំឡុងខែធ្នូ ឆ្នាំ២០២០៕
None
