នាយករដ្ឋមន្ត្រីអូស្ត្រាលីលោក Scott Morrison បាននិយាយក្នុងអំឡុងសន្និសីទសារព័ត៌មានមួយនៅថ្ងៃព្រហស្បតិ៍សប្តាហ៍នេះថា វាជាការវិនិយោគដ៏សំខាន់មួយនៅក្នុងកម្លាំងយោធារបស់យើងនាពេលអនាគត។ ការពង្រីកនេះ នឹងធ្វើឲ្យចំនួនទ័ពកើនឡើងដល់ជាង៨ម៉ឺននាក់ ជាកម្រិតមួយមិនធ្លាប់មាន ចាប់តាំងពីសង្គ្រាមវៀតណាមមក។
រដ្ឋមន្ត្រីក្រសួងការពារជាតិអូស្ត្រាលី លោក Peter Dutton បានសម្តែងការគាំទ្រដល់គម្រោងខាងលើនេះថា វាមានសារៈសំខាន់ណាស់ក្នុងការបំពេញបន្ថែមសមត្ថភាពការពារជាតិរបស់អូស្ត្រាលី ដើម្បីធ្វើឱ្យខ្លួនក្លាយជាដៃគូ ដែលអាចជឿទុកចិត្តបាន ស្មើមុខស្មើមាត់ ជាមួយសហរដ្ឋអាមេរិក អង់គ្លេស និងអង្គការណាតូ។
ប្រទេសអូស្ត្រាលីនៅប៉ុន្មានឆ្នាំចុងក្រោយបានបង្កើនខ្ទង់ចំណាយយោធាជាបន្តបន្ទាប់ គួបផ្សំនឹងការបញ្ជាទិញគ្រឿងសព្វាវុធបន្ថែមផងដែរ ស្របពេលដែលវត្តមានរបស់ចិននិយាយជារួម និងពិសេសកងទ័ពចិននិយាយដោយឡែក នៅក្នុងតំបន់ឥណ្ឌូប៉ាស៊ីហ្វិក ក៏កំពុងកើនឡើងកាន់តែច្រើនឡើងៗផងដែរ។
អត្ថបទគួរអាន
កាលពីឆ្នាំមុន អូស្ត្រាលី និងសម្ព័ន្ធមិត្តត្រីភាគី អាមេរិក និងអង់គ្លេស បានចុះកិច្ចព្រមព្រៀងផ្លាស់ប្តូរបច្ចេកវិទ្យានាវាមុជទឹក មានឈ្មោះថា AUKUS ហើយដែលនឹងអនុញ្ញាតឲ្យអូស្ត្រាលីមាននាវាមុជទឹកដើរដោយថាមពលនុយក្លេអ៊ែរដំបូងរបស់ខ្លួនផងដែរ។
បន្ថែមពីលើនេះ អូស្ត្រាលីកាលដើមខែមករា ទើបបានព្រមព្រៀងទិញយករថក្រោះ និងរថពាសដែក សរុប ១៤០គ្រឿងទៀតពីសហរដ្ឋអាមេរិក ក្នុងទំហំទឹកប្រាក់ប្រមាណ ៣ពាន់៥រយលានដុល្លារ ដើម្បីធ្វើទំនើបកម្មយោធាជើងគោករបស់ខ្លួន។
សូមបញ្ជាក់ថា ក្នុងចំណោមរថក្រោះ និងរថពាសដែកទាំង១៤០គ្រឿង អូស្ត្រាលីនឹងបញ្ជាទិញរថក្រោះប្រភេទ M1A2 Abram ចំនួន ៧៥គ្រឿង រថពាសដែកកំទេចគ្រឿងផ្ទុះ២៩គ្រឿង រថពាសដែកដែលអាចធ្វើជាស្ពានចម្លងបាន ចំនួន១៧គ្រឿង និងរថពាសដែកសម្រាប់ជួសជុលគ្រឿងចក្រចំនួន៦គ្រឿងផងដែរ៕
None
