លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា បានគូសបញ្ជាក់ថា ភ្លើងសង្រ្គាមនៅតំបន់មជ្ឈិមបូព៌ា កំពុងគំរាមកំហែងដល់ចរន្តសេដ្ឋកិច្ចសកលឱ្យរងការរង្គោះរង្គើ ដោយសារតម្លៃប្រេងហក់ឡើងខ្ពស់។ បើតាមអ្នកជំនាញរូបនេះ សន្តិសុខថាមពលបានដើរតួសំខាន់ណាស់ក្នុងប្រព័ន្ធសេដ្ឋកិច្ចសកល ដូច្នេះប្រសិនបើបញ្ហាសង្រ្គាមនេះនៅបន្តអូសបន្លាយពេលយូរនោះវានឹងប៉ះពាល់កាន់តែធ្ងន់ធ្ងរដល់ភាពធន់របស់សេដ្ឋកិច្ចពិភពលោក រួមទាំងកម្ពុជា ដែលជាប្រទេសពឹងផ្អែកលើការនាំចូលប្រេងទាំងស្រុង។ តាមរយៈបញ្ហានេះ អ្នកជំនាញរូបនេះជឿជាក់ថា វាក៏អាចគំរាមកំហែងដល់ផែនការប្រែក្លាយកម្ពុជា ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ផងដែរ។ តែយ៉ាងណា អ្នកជំនាញរូបនេះបានអះអាងថា រាជរដ្ឋាភិបាលកម្ពុជា បានបន្តខិតខំយ៉ាងសកម្មដើម្បីឈានទៅសម្រេចផែនការនេះ តាមរយៈការរក្សាភាពធន់សេដ្ឋកិច្ចឱ្យរឹងមាំ ពង្រីកទីផ្សារការនាំចេញ និងជំរុញការអភិវឌ្ឍបន្ថែមក្នុងវិស័យសក្តានុពលសំខាន់ៗ។
ស្រដៀងគ្នានេះ លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ យល់ឃើញថា ប្រសិនបើបញ្ហាសង្រ្គាមនៅតំបន់មជ្ឈិមបូព៌ានៅតែបន្តអូសបន្លាយពេលយូរ និងមិនអាចស្វែងរកច្រកចេញបានទេ នោះប្រាកដណាស់វានឹងគំរាមកំហែងកាន់តែខ្លាំងដល់ចរន្តសេដ្ឋកិច្ចនៅលើពិភពលោក រួមទាំងកម្ពុជា ព្រោះបញ្ហានេះបានបង្កផលប៉ះពាល់យ៉ាងខ្លាំងដល់តម្លៃប្រេង និងខ្សែច្រវាក់ដឹកជញ្ជូនសកល។ ដូច្នេះតាមរយៈការប្រែប្រួល នៃវិបត្តិសកលនេះ អ្នកជំនាញរូបនេះវាយតម្លៃថា វាក៏អាចធ្វើឱ្យក្ដីរំពឹងរបស់កម្ពុជា ក្នុងការប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ រងការគំរាមកំហែងផងដែរ។
សូមបញ្ជាក់ថា ប្រសិនបើគ្មានការប្រែប្រួលទេ កម្ពុជានឹងចាកចេញពីប្រទេសមានការអភិវឌ្ឍតិចតួចទៅជាប្រទេសកំពុងអភិវឌ្ឍនៅឆ្នាំ២០២៩ និងក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ហើយបន្ទាប់មកនឹងក្លាយជាប្រទេសមានចំណូលខ្ពស់នៅឆ្នាំ២០៥០។ ក្រោយកម្ពុជា ចាកចេញពីប្រទេសមានការអភិវឌ្ឍតិចតួចនោះ កម្ពុជា អាចនឹងបាត់បង់ការអនុគ្រោះពីប្រទេស និងស្ថាប័នដៃគូ និងជំនួយមួយចំនួន៕
