កម្ពុជារំពឹងប្រទេសប៊ុលហ្គារី នឹងក្លាយជាច្រកថ្មីសម្រាប់ក្នុងនាំចេញទំនិញទៅកាន់តំបន់អឺរ៉ុប

ឯកឧត្តម ជា ច័ន្ទបរិបូរណ៍ ឯកអគ្គរាជទូតកម្ពុជាប្រចាំសាធារណរដ្ឋប៊ុលហ្គារី បានគូសបញ្ជាក់ថា ចាប់ពីថ្ងៃទី១៩ ដល់ថ្ងៃទី២៤ ខែតុលាខាងមុខនេះ លោក Maxim Behar ប្រធានសភាពាណិជ្ជកម្មប៊ុលហ្គារី និងជាប្រធានក្រុមប្រឹក្សាភិបាលនៃក្រុមហ៊ុន M3 Communications Group នឹងមកបំពេញទស្សៈកិច្ចការផ្លូវការលើកដំបូងនៅប្រទេសកម្ពុជា ក្រោមការរៀបចំរបស់ស្ថានទូតកម្ពុជាប្រចាំសាធារណរដ្ឋប៊ុលហ្គារី។ បើតាមការបញ្ជាក់របស់ឯកអគ្គរាជទូតកម្ពុជារូបនេះ នៅក្នុងដំណើរទស្សនៈកិច្ចរបស់លោក Maxim Behar មកកាន់កម្ពុជានេះ លោកនឹងមានជំនួបពិភាក្សាការងារទ្វេភាគីជាមួយថ្នាក់ដឹកនាំនៃក្រសួងស្ថាប័ន និងវិស័យឯកជនមួយចំនួននៅកម្ពុជា ដើម្បីស្វែងយល់ និងតភ្ជាប់ទំនាក់ទំនងរវាងគ្នាកាន់តែជិតស្និទ្ធ។

ឯកឧត្តម ជា ច័ន្ទបរិបូរណ៍ បានគូសបញ្ជាក់ថា គោលបំណងនៃដំណើរទស្សនកិច្ចការងារខាងលើនេះ គឺដើម្បីតភ្ជាប់ និងបង្កើតកិច្ចសហប្រតិបត្តិការពាណិជ្ជកម្ម និងទេសចរណ៍រវាងប្រទេសកម្ពុជា និងប៊ុលហ្គារីឱ្យបានកាន់ធំ ដ្បិតថាកន្លងមកទំហំដោះដូរពាណិជ្ជកម្មទ្វេភាគីរវាងប្រទេសទាំងពីរនៅតូចនៅឡើយ។ ទន្ទឹមនេះ ឯកអគ្គរាជទូតកម្ពុជារូបនេះរំពឹងជឿជាក់ថា តាមរយៈដំណើរទស្សនៈកិច្ចនេះ វានឹងផ្តល់ផ្លែផ្កាយ៉ាងច្រើនដល់កំណើនសេដ្ឋកិច្ចកម្ពុជាតាមរយៈការបង្កើនផ្លូវពាណិជ្ជកម្មនាំចេញទំនិញរបស់កម្ពុជាទៅកាន់តំបន់អឺរ៉ុបបន្ថែមបានកាន់តែច្រើន។

គួរជម្រាបថា លោក Maxim Behar គឺជាអ្នកជំនួញជនជាតិប៊ុលហ្គារីដែលមានដើមកំណើតជ្វីហ្វដ៏មានឥទ្ធិពលនិងសក្តានុពល និងជានាយកប្រតិបត្តិ និងជាប្រធានក្រុមប្រឹក្សាភិបាលនៃក្រុមហ៊ុនM3 Communications Group, Inc ដែលជាក្រុមហ៊ុនទំនាក់ទំនងសាធារណៈ និងកិច្ចការសាធារណៈ, ប្រធានក្រុមប្រឹក្សាភិបាលនៃសាកលវិទ្យាល័យសេដ្ឋកិច្ចជាតិ និងពិភពលោក (UNWE) និងជាប្រធានក្រុមប្រឹក្សាភិបាលនៃវេទិកាទំនាក់ទំនងពិភពលោកនៅទីក្រុង Davos ផងដែរ៕