តើកត្តាអ្វីខ្លះ ដែលធ្វើឲ្យតួលេខនាំចេញ និងនាំចូលរវាងប្រទេសទាំងពីរខុសគ្នាឆ្ងាយបែបនេះ? បើតាមអ្នកជំនាញសេដ្ឋកិច្ចមើលឃើញថា ភាពខុសគ្នានេះ អាចមកពីកម្ពុជាកាត់បន្ថយការនាំចេញផលិតផលដែលធ្វើពីលោហៈធាតុមានតម្លៃ និងរ៉ែមួយចំនួនទៅកាន់ទីផ្សារសិង្ហបុរី ខណៈតម្រូវការប្រើប្រាស់ផលិតផលនាំចូលពីសិង្ហបុរី មកកម្ពុជាមានការកើនឡើងខ្ពស់។ ទន្ទឹមនឹងនោះ ការឆ្លងរាតត្បាតនៃជំងឺកូវីដ-១៩ ជាសកល ក៏ជាបញ្ហាមួយផងដែរ។
ការនាំចេញទំនិញពីកម្ពុជាទៅកាន់ទីផ្សារសិង្ហបុរី សម្រេចបានជាង ១១២លានដុល្លារអាមេរិកនៅ១០ខែក្នុងឆ្នាំ២០២១ ធ្លាក់ចុះជាង៩៥% បើធៀបនឹងរយៈពេលដូចគ្នាកាលពីឆ្នាំមុន ដែលធ្លាប់សម្រេចបានរហូតជាង២ពាន់៤រយលានដុល្លារអាមេរិក។ ប៉ុន្តែ បើយើងមើលពីតួលេខនាំចូលពីសិង្ហបុរីមកកម្ពុជាវិញ សម្រេចបានដល់ទៅជាង ៤ពាន់២រយលានដុល្លារអាមេរិកកើនឡើងជាង៩៣៨% បើធៀបនឹង១០ខែកាលពីឆ្នាំ២០២០ ដែលមានត្រឹមតែជាង៤១០លានដុល្លារតែប៉ុណ្ណោះ។ នេះបើតាមរបាយការណ៍ពីក្រសួងពាណិជ្ជកម្ម ដែលបានផ្ដល់ឲ្យ ខេមបូណូមីស។
ជុំវិញភាពខុសគ្នាដាច់ឆ្ងាយរវាងតួលេខនាំចេញ និងនាំចូលនេះរវាងកម្ពុជានិងសិង្ហបុរីនេះ ត្រូវបានលោកបណ្ឌិត គី សិរីវឌ្ឍ អ្នកស្រាវជ្រាវសេដ្ឋកិច្ច នៃរាជបណ្ឌិតសភាកម្ពុជាមើលឃើញថា នៅមួយរយៈចុងក្រោយ កម្ពុជា បានកាត់បន្ថយការនាំចេញផលិតផលសំខាន់ៗមួយចំនួនរួមមានផលិតផលធ្វើពីលោហៈមានតម្លៃ និងធ្វើពីរ៉ែជាដើម ដែលបានទាញទម្លាក់តួលេខនាំចេញពីកម្ពុជាទៅសិង្ហបុរីធ្លាក់ចុះខ្លាំង។ ការកាត់បន្ថយការនាំចេញផលិតផលពីកម្ពុជាទៅសិង្ហបុរីនេះ គឺបន្ទាប់ពីក្រុមហ៊ុនមួយចំនួនបានកាត់បន្ថយ ឬផ្អាកសកម្មភាពផលិត និងរុករករ៉ែ ហើយក៏មានក្រុមហ៊ុនខ្លះបានដកការវិនិយោគពីកម្ពុជាដោយសារវិបត្តិកូវីដ-១៩ ផងដែរ។
អត្ថបទគួរអាន
បើតាមអ្នកជំនាញសេដ្ឋកិច្ចរូបនេះ បានអះអាងថា ទំនិញដែលកម្ពុជានាំចេញទៅទីផ្សារសិង្ហបុរីរួមមាន ផលិតផលវាយនភណ្ឌ ស្បែកជើង គ្រឿងបន្លាស់ម៉ាស៊ីន ផលិតផលលោហៈ និងផលិតផលធ្វើពីរ៉ែជាដើម។ ចំណែកផលិតដែលកម្ពុជានាំចូលពីសិង្ហបុរីមានគ្រឿងអលង្ការ ផលិតផលធ្វើពីក្រដាស ប្លាស្ទិក ផលិតផលខូស្មិចទិក គ្រឿងអេឡិចត្រូនិក និងសម្ភារៈបន្ទប់ទឹកជាដើម។
សូមបញ្ជាក់ថា នៅ១០ខែ ឆ្នាំ២០២១ ទំហំពាណិជ្ជកម្មរវាងកម្ពុជាជាមួយសិង្ហបុរីសម្រេចបានជាង៤ពាន់៣រយលានដុល្លារអាមេរិក កើនឡើងជាង៥១% បើធៀបនឹងទំហំពាណិជ្ជកម្មក្នុងរយៈពេលដូចគ្នាកាលពីឆ្នាំ២០២០។ នេះបើតាមទិន្នន័យពីក្រសួងពាណិជ្ជកម្មកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
