បន្ទាប់ពីស្ថានភាពនៃការឆ្លងរាតត្បាតជំងឺកូវីដ១៩ នៅកម្ពុជា កាន់តែមានភាពធូរស្បើយ សកម្មភាពសង្គម និងសេដ្ឋកិច្ច នៅកម្ពុជា ក៏កំពុងតែវិលត្រឡប់ទៅរកប្រក្រតីភាពជាធម្មតា ឡើងវិញជាបណ្ដើរៗដែរ ពិសេសទំនាក់ទំនងពាណិជ្ជកម្មរវាងកម្ពុជា និងបណ្ដាប្រទេសដែលជាដៃគូ។ បើយោងតាមរបាយការណ៍នាំចេញទំនិញរបស់អគ្គនាយកដ្ឋានគយនិងរដ្ឋាករ កម្ពុជា បានបង្ហាញថា នៅ៤ខែដំបូងឆ្នាំ២០២២ សហរដ្ឋអាមេរិក នៅតែជាប្រទេសទីផ្សារធំជាងគេរបស់កម្ពុជា ក្នុងការនាំចេញទំនិញ ដែលមានទំហំទឹកប្រាក់ជិត៣ពាន់លានដុល្លារ។ ខណៈប្រទេសវៀតណាម ជាទីផ្សារធំទី២ ដែលកម្ពុជា បាននាំចេញទំនិញ គិតជាទឹកប្រាក់ជិត១ពាន់លានដុល្លារ។ ដោយឡែក ប្រទេសចិន គឺជាទីផ្សារធំ ទី៣របស់កម្ពុជា ក្នុងការនាំចេញទំនិញ ដែលគិតជាទឹកប្រាក់មានជាង ៤រយលានដុល្លារ។
ទាក់ទងនឹងទំនាក់ទំនងពាណិជ្ជកម្មរវាងកម្ពុជា និងអាមេរិក ត្រូវបានក្រុមអ្នកជំនាញធ្លាប់លើកឡើងថា នៅតែមានភាពរឹងមាំ និងល្អប្រសើរ បើទោះ ប្រព័ន្ធអនុគ្រោះពន្ធ(GSP) ដែលផ្ដល់ឲ្យកម្ពុជា ដោយប្រទេសអាមេរិក ត្រូវហួសសុពលភាព ក៏ដោយ។ ទន្ទឹមនឹងនេះ ក្រសួងការបរទេសកម្ពុជា និងក្រុមអ្នកជំនាញសេដ្ឋកិច្ច នៅតែបង្ហាញក្ដីសង្ឃឹមថា ប្រព័ន្ធអនុគ្រោះពន្ធទូទៅ (GSP) សម្រាប់កម្ពុជានឹងត្រូវបានបន្តសុពលភាពជាថ្មីឡើងវិញ ដើម្បីគាំទ្របន្ថែមទៀត ដល់ការអភិវឌ្ឍសេដ្ឋកិច្ច និងកម្មករកម្ពុជា នៅក្នុងវិស័យកាត់ដេរ សម្លៀកបំពាក់ និងស្បែកជើង ដែលមានភាគច្រើនជាស្ត្រី។
សូមបញ្ជាក់ថា របាយការណ៍ពីអគ្គនាយកដ្ឋានគយ និងរដ្ឋាករកម្ពុជាបង្ហាញថា នៅ៤ខែដំបូងឆ្នាំ២០២២ កម្ពុជាមានការនាំចេញទំនិញទៅកាន់ទីផ្សារអន្តរជាតិ ក្នុងទំហំទឹកប្រាក់សរុបជាង៧ពាន់លានដុល្លារ មានការកើនឡើង៣២% បើប្រៀបនឹងរយៈពេលដូចគ្នាកាលពីឆ្នាំ២០២១។ ក្នុងនោះ ការនាំចេញទំនិញរបស់កម្ពុជា ទៅកាន់សហរដ្ឋអាមេរិក ក្នុងតម្លៃសរុបជិត៣ពាន់លានដុល្លារ កើនឡើងជិត៥៤% បើធៀបនឹងរយៈពេលដូចគ្នាកាលពីឆ្នាំមុន ខណៈការនាំចូលពីអាមេរិកមានជាង១០០លានដុល្លារ កើនឡើងជាង១១%៕
