ទាក់ទងនឹងការនាំចេញរបស់កម្ពុជាធ្លាក់ចុះនេះដែរ ត្រូវបានអ្នកជំនាញសេដ្ឋកិច្ច អះអាងថា បណ្ដាលមកពីឥទ្ធិពលនៃវិបត្តិសាកលនៅតែបន្តមានភាពតានតឹងនៅឡើយ ជាពិសេសការកើនឡើងនៃអតិផរណាតែម្ដង ដែលធ្វើឲ្យមានការកាត់បន្ថយនូវការបញ្ជាទិញទំនិញកម្ពុជាពីបណ្ដាប្រទេសមួយចំនួន។
យោងតាមតាមរបាយការណ៍ដែលបង្ហាញដោយអគ្គនាយកដ្ឋានគយនិងរដ្ឋាករកម្ពុជា នៅរយៈពេល ៤ខែដំបូងក្នុងឆ្នាំ២០២៣នេះ ការនាំចេញរបស់កម្ពុជា សម្រេចបានក្នុងទំហំទឹកប្រាក់សរុបជាង ៧ពាន់លានដុល្លារ បានធ្លាក់ចុះ ៥% បើធៀបទៅនឹងរយៈពេលដូចគ្នានៅឆ្នាំ២០២២។ ជំនាញផ្នែកសេដ្ឋកិច្ចបានកត់សម្គាល់ឃើញថា បញ្ហាប្រឈមធំៗរបស់ពិភពលោក ដូចជា វិបត្តិសង្រ្គាមនៅអ៊ុយក្រែន បញ្ហាសមុទ្រចិនខាងត្បូង ក៏ដូចជា ការកើនឡើងនូវអតិផរណា នៅតែបន្តជះឥទ្ធិពលអវិជ្ជមាន សម្រាប់ការនាំចេញរបស់កម្ពុជា។ បណ្ឌិត គី សេរីវឌ្ឍន៍ អ្នកវិភាគសេដ្ឋកិច្ចនៅកម្ពុជា បានគូសបញ្ជាក់ថា ដរាបណាពិភពលោកនៅតែប្រឈមជាមួយភាពតានតឹង ប្រទេសកម្ពុជានៅតែបន្តរងផលប៉ះពាល់ ជាពិសេសការនាំចេញរបស់កម្ពុជាទៅកាន់ទីផ្សារអន្តរជាតិ។
បើតាមបណ្ឌិត គី សេរីវឌ្ឍន៍ វិបត្តិសង្រ្គាមនៅអ៊ុយក្រែន បានជិះឥទ្ធិពលយ៉ាងខ្លាំងដល់សហគមន៍អឺរ៉ុប និងបណ្ដាលឲ្យមានការកើនឡើងនូវអតិផរណា ដោយលោកបន្តថាបញ្ហានេះ បានធ្វើឲ្យសហគមន៍អឺរ៉ុប សម្រេចចិត្តកាត់បន្ថយការបញ្ជាទិញទំនិញពីបណ្ដាប្រទេសផ្គត់ផ្គង់មួយចំនួនរួមទាំងប្រទេសកម្ពុជា ផងដែរ។
អត្ថបទគួរអាន
ដ្បិតថា ការនាំចេញរបស់កម្ពុជា ភាគច្រើនសុទ្ធតែមានការធ្លាក់ចុះ តែបើក្រឡេកទៅមើលរបាយការណ៍របស់អគ្គនាយកដ្ឋានគយនិងរដ្ឋាករកម្ពុជា បានបង្ហាញថា ការនាំចេញទំនិញកម្ពុជា ទៅកាន់ប្រទេសសិង្ហបុរី បែរជាមានការកើនឡើងយ៉ាងខ្លាំងគួរឲ្យកត់សម្គាល់ និងបានក្លាយជាប្រទេសទី៣ ដែលបាននាំចេញទំនិញពីកម្ពុជាច្រើនជាងគេ នៅរយៈពេល ៤ខែ ក្នុងឆ្នាំ២០២៣នេះ។ ត្រង់ចំណុចនេះ អ្នកជំនាញផ្នែកសេដ្ឋកិច្ចបណ្ឌិត គី សេរីវឌ្ឍន៍ បានកត់សម្គាល់ដូច្នេះ ការនាំចេញរបស់កម្ពុជា ទៅកាន់ប្រទេសសិង្ហបុរី ក៏មានការធ្លាក់ចុះខ្លាំងដែរ អំឡុងនៃវិបត្តិកូវីដ១៩។ ក៏ប៉ុន្តែ ដោយសារស្ថានភាពអាចវិលមករកសភាពប្រសើរឡើងវិញ ទើបធ្វើឲ្យសន្ទុះនៃការនាំចេញទំនិញពីកម្ពុជាទៅកាន់សិង្ហបុរី មានការស្ទុះងើបឡើងខ្លាំងគួរឲ្យកត់សម្គាល់ ដែលបានកើនឡើងរហូតជាង ៣៤៥% ឯណោះ នៅរយៈពេល ៤ខែក្នុងឆ្នាំ២០២៣នេះ។
សូមបញ្ជាក់ថា មិនត្រឹមតែការនាំចេញទំនិញនោះទេមានការធ្លាក់ចុះ ការនាំចូលទំនិញរបស់កម្ពុជានៅ៤ខែដំបូងឆ្នាំនេះ ក៏ធ្លាក់ចុះប្រមាណជាង ២១%ផងដែរ ពោលគឺមានទឹកប្រាក់ប្រមាណជិត៨ពាន់លានដុល្លារ។ ទីផ្សារនាំចូលទំនិញធំបំផុតរបស់កម្ពុជា គឺប្រទេសចិនដែលមានទំហំទឹកប្រាក់ជាង៣ពាន់៤រយលានដុល្លារ ធ្លាក់ចុះ១,៥%។ ដោយឡែក ទីផ្សារនាំចេញទំនិញធំបំផុតរបស់កម្ពុជាវិញ គឺសហរដ្ឋអាមេរិក ដែលមានទំហំទឹកប្រាក់សរុបជាង ២ពាន់លានដុល្លារ បានថយចុះជាង ១៦%៕
