លោក Xiao Yaqing រដ្ឋមន្ត្រីក្រសួងឧស្សាហកម្មរបស់ចិនត្រូវគេសង្ស័យថា បានបំពានលើវិន័យ និងច្បាប់ ហើយត្រូវបានដាក់ឱ្យស្ថិតនៅក្រោមការស៊ើបអង្កេតតាមបទប្បញ្ញត្តិ។ នេះបើតាមគណៈកម្មការកណ្តាលសម្រាប់ការត្រួតពិនិត្យវិន័យ (CCDI) របស់ប្រទេសចិនបាននិយាយកាលពីថ្ងៃព្រហស្បតិ៍។ ក្រសួងឧស្សាហកម្មនិងបច្ចេកវិទ្យាព័ត៌មាន គឺជាទីភ្នាក់ងារដ៏សំខាន់មួយនៅពីក្រោយការជំរុញរបស់ប្រទេសចិន សម្រាប់ឧស្សាហកម្មបន្ទះឈីបក្នុងស្រុក។
ការស៊ើបអង្កេតចុងក្រោយបំផុត ដែលផ្តោតលើមន្ត្រីជាន់ខ្ពស់របស់បក្សកុម្មុយនិស្តចិន ជាសញ្ញានៃការកើនឡើងនៅក្នុងការបង្រ្កាបរបស់ទីក្រុងប៉េកាំងលើវិស័យបច្ចេកវិទ្យា ដោយពង្រីកវាដល់ឧស្សាហកម្មបន្ទះឈីបដែលជាសមរភូមិដ៏សំខាន់នៅក្នុងការប្រកួតប្រជែងបច្ចេកវិទ្យារវាងក្រុងវ៉ាស៊ីនតោន និងក្រុងប៉េកាំង។
សារព័ត៌មានចិន Caixin បានរាយការណ៍កាលពីថ្ងៃព្រហស្បតិ៍ថា លោក Ding Wenwu ប្រធានមូលនិធិវិនិយោគឧស្សាហកម្មបន្ទះឈីបរួមគ្នារបស់ប្រទេសចិនកំពុងស្ថិតក្រោមការស៊ើបអង្កេត។ អង្គភាពដែលមានឈ្មោះហៅក្រៅថា មូលនិធិធំ ឬ Big Fund នេះគឺជាយន្តការផ្តល់មូលនិធិចម្បងរបស់ប្រទេសនេះ ក្នុងការកសាងឧស្សាហកម្មអេឡិចត្រូនិកដែលមានការប្រកួតប្រជែង។
ជាមួយគ្នានេះ គណៈកម្មាធិការ CCDI បាននិយាយកាលពីពាក់កណ្តាលខែកក្កដាថា លោក Lu Jun ដែលជាអតីតប្រធានក្រុមហ៊ុន Sino IC Capital ដែលបានគ្រប់គ្រងមូលនិធិ Big Fund នោះត្រូវបានសង្ស័យថា មានការរំលោភច្បាប់ធ្ងន់ធ្ងរ ហើយកំពុងស្ថិតនៅក្រោមការស៊ើបអង្កេត។
អត្ថបទគួរអាន
ក្រៅពីឥស្សរជនទាំង៣នេះក៏នៅមានអតីតប្រធានក្រុមហ៊ុនផលិតបន្ទះឈីប Tsinghua Unigroup គឺលោក Zhao Weiguo នៅសប្តាហ៍នេះត្រូវគេរាយការណ៍ថាកំពុងស្ថិតក្រោមការស៊ើបអង្កេតជុំវិញការចោទប្រកាន់ពីបទពុករលួយផងដែរ។
ចំពេលមានការបង្រ្កាបរបស់ចិនលើមេដឹកនាំឧស្សាហកម្មបន្ទះឈីបនេះដែរ សហរដ្ឋអាមេរិកនៅសប្ដាហ៍នេះ បានអនុម័តកាលនូវច្បាប់ពាក់ព័ន្ធនឹងការជំរុញការផលិតបន្ទះឈីប ដែលនឹងផ្តល់ការឧបត្ថម្ភធនក្នុងតម្លៃជាង ៥២ ពាន់លានដុល្លារ ដើម្បីលើកទឹកចិត្តដល់ការផលិតបន្ទះឈីប និងកាត់បន្ថយការពឹងផ្អែកលើខ្សែចង្វាក់ផ្គត់ផ្គង់របស់អាស៊ីផងដែរ។
យ៉ាងណាមិញ ប្រទេសចិន ក៏បានវិនិយោគជាច្រើននៅក្នុងឧស្សាហកម្មផលិតបន្ទះឈីប ដើម្បីជំរុញនូវភាពឯករាជ្យនៅក្នុងឧស្សាហកម្មនេះ ខណៈដែលអាមេរិកកំពុងព្យាយាមកាត់ផ្ដាច់ប្រទេសចិនចេញពីខ្សែចង្វាក់ផ្គត់ផ្គង់។
ប្រទេសចិនបានបង្ហាញពីផែនការកាលពីឆ្នាំ២០១៥ វិនិយោគប្រមាណ ១,៤ទ្រីលានដុល្លារ ចាប់ពីឆ្នាំ២០២០ដល់ឆ្នាំ២០២៥ លើវិស័យបច្ចេកវិទ្យាជឿនលឿន ដូចជាការផលិតបន្ទះឈីប ដោយរំពឹងនឹងបង្កើតចំណែកការផលិតបន្ទះឈីបក្នុងស្រុកឲ្យបានដល់ ៤០% នៅឆ្នាំ២០២០ និង៧០% នៅឆ្នាំ២០២៥៕
អត្ថបទ៖ សុខ ជា
