បើតាមក្រសួងរ៉ែ និងថាមពល គិតមកទល់បច្ចុប្បន្នមានតែក្រុមហ៊ុនចំនួន៧ប៉ុណ្ណោះ ដែលទទួលបានអាជ្ញាបណ្ណរុករក និងចម្រាញ់រ៉ែមាសនៅកម្ពុជា។
ឯកឧត្តម អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពលបានគូសបញ្ជាក់ថា ក្រោយដាក់ឲ្យដំណើរការជាង១ឆ្នាំ គិតត្រឹមដើមខែសីហា ឆ្នាំ២០២២ ការចម្រាញ់រ៉ែមាសរបស់កម្ពុជា ដោយក្រុមហ៊ុនអូស្ត្រាលីរ៉ឺនេសង់ មីនើរ៉ល លីមីតធីតសម្រេចបានចំនួន២៣២ដុំ ឬស្នើនឹងជាង៣ពាន់៥រយគីឡូក្រាម។ តែយ៉ាងណា ឯកឧត្តម មិនបានបញ្ជាក់លម្អិតពីទំហំទឹកប្រាក់ ដែលបានពីការលក់មាសទាំងនេះនោះទេ ដោយគ្រាន់តែអះអាងថា មាសទាំងនេះបានផ្តល់ចំណូលចូលរដ្ឋបានជាង៥លាន១សែនដុល្លារ។
បើតាមការគូសបញ្ជាក់របស់មន្ត្រីជាន់ខ្ពស់ក្រសួងរ៉ែ និងថាមពលរូបនេះ គិតមកដល់បច្ចុប្បន្នកម្ពុជាបានអាជ្ញាបណ្ណដល់ក្រុមហ៊ុនចំនួន៧ ដើម្បីរុករកនិងចម្រាញ់រ៉ែមាសនៅកម្ពុជា។ ប៉ុន្តែក្នុងចំណោមក្រុមហ៊ុនទាំងនេះ មានតែក្រុមហ៊ុនអូស្ត្រាលីខាងលើមួយប៉ុណ្ណោះដែលបានបើករោងចក្រចម្រាញ់រ៉ែមាសជាលក្ខណៈឧស្សាហកម្មទ្រង់ទ្រាយនៅកម្ពុជា។ ចំណែកក្រុមហ៊ុនផ្សេងៗទៀតកំពុងស្ថិតក្នុងដំណាក់កាលសិក្សា រុករក និងចម្រាញ់សាកល្បង។
អត្ថបទគួរអាន
ជាក់ស្តែងកាលពីថ្ងៃទី៤ ខែសីហា ឆ្នាំ២០២២ ក្រុមហ៊ុន Delcom ដែលជាក្រុមហ៊ុនមួយក្នុងចំណោមក្រុមហ៊ុនទាំង៧ខាងលើ បានចាប់ផ្តើមទាញយក និងចម្រាញ់រ៉ែមាសលើករបស់ខ្លួន ដោយទទួលបានមាសចំនួន២០គីឡូក្រាម ឬស្មើនឹង២០ដុំ។ តាមផែនការអាជីវកម្មនៅឆ្នាំដំបូង ក្រុមហ៊ុននេះ វាយតម្លៃថា ខ្លួននឹងអាចចម្រាញ់រ៉ែមាសបានចំនួន៣៤០គីឡូក្រាមក្នុង១ឆ្នាំ ដោយរំពឹងផ្តល់ចំណូលសួយសារជូនរដ្ឋប្រមាណជិត៦០ម៉ឺនដុល្លារក្នុង១ឆ្នាំ។
ជាមួយគ្នានេះ ឯកឧត្តម ទី នរិន្ទ រដ្ឋលេខាធិការក្រសួងរ៉ែ និងថាមពលបានគូសបញ្ជាក់ថា ក្នុងរយៈពេល៥ឆ្នាំកន្លងមកនេះក្រសួងរ៉ែ និងថាមពលបានចេញអាជ្ញាបណ្ណបើកអណ្តូងរ៉ែ និងការដ្ឋានវាយថ្មចំនួន៤៧៨កន្លែង, បើកឧស្សាហកម្មរ៉ែ២១កន្លែងនិងអាជ្ញាបណ្ណស្វែងរកនិងរុករ៉ែចំនួន៣៤កន្លែង។ ចំពោះផលិតកម្មក្នុងវិស័យរ៉ែ បច្ចុប្បន្នកម្ពុជាមានផលិតកម្មរ៉ែចំនួន១៧ប្រភេទ ដែលបម្រើឲ្យការប្រើប្រាស់ក្នុងស្រុក និងនាំចេញ។ ផលិតកម្មទាំងនោះរួមមានធ្យូងថ្ម ខ្សាច់សសម្រាប់ផលិតកញ្ចក់ ស៊ីម៉ង់តិ៍ មាស ថ្ម ខ្សាច់សំណង់ និងគ្រោះក្រហមជាដើម។
សូមបញ្ជាក់ថា សម្រាប់តម្លៃមាសទីផ្សារពិភពលោកនៅថ្ងៃទី ៩ខែសីហាមានតម្លៃក្នុងរង្វង់ ១៧៩០ដុល្លារក្នុងមួយអោន ដោយមួយអោនមានប្រហែលជាង៨ជីមាស៕
