នាង Boom Panadda ដែលតែងតែឌឺដងពេបជ្រាយដាក់កម្ពុជា បានជ្រុះចេញពីតំណែងអ្នកនាំពាក្យ

ក្រោយជ្រុះបាត់តំណែងជាអ្នកនាំពាក្យមជ្ឈមណ្ឌលបញ្ជាការព្រំដែនថៃ នាង Boom Panadda ដែលចូលចិត្តស្លៀកពាក់សិចស៊ី និងបញ្ចេញអាកប្បកិរិយាមិនសូវសមសួនមកលើកម្ពុជា បានប្ដេជ្ញាបន្តការងាររបស់នាងលើកិច្ចការព្រំដែន ហើយលាតត្រដាងថា នាងបានបរិច្ចាគប្រាក់ដល់ទៅ២០០លានបាត ប្រមាណជាង៦៨ម៉ឺនដុល្លារអាម៉េរិក សម្រាប់ជួយសាងសង់លេណដ្ឋាន និងផ្លូវថ្នល់។ អតីតអ្នកនាំពាក្យរូបនេះ បានផ្ដាំផ្ញើទៅនាយករដ្ឋមន្ត្រីថ្មីរបស់ថៃ គឺលោក អនុទីន ឆានវីរៈគុល ថា កុំឱ្យលោកលើកទូរសព្ទរបស់មេដឹកនាំនៃប្រទេសទី៣ ដែលទំនងជាចង់សំដៅដល់ការហៅទូរសព្ទពីនាយករដ្ឋមន្ត្រីម៉ាឡេស៊ី លោក អានវ៉ា អ៊ីប្រាហ៊ីម ដែលជាប្រធានឆ្លាស់វេនរបស់អាស៊ាន ទាក់ទិនជម្លោះព្រំដែនកម្ពុជា-ថៃ ដែលធ្វើឱ្យថៃខាត។

គួរំឭកថា អំឡុងពេលកាន់តំណែងជាអ្នកនាំពាក្យរបស់មជ្ឈមណ្ឌលបញ្ជាការព្រំដែនថៃ នាង Boom Panadda មិនបានធ្វើខ្លួនឱ្យល្អស័ក្ដិសមជាអ្នកនាំពាក្យប្រកបដោយសេចក្ដីថ្លៃថ្នូរនោះឡើយ ដោយនាងបានបញ្ឆេះកំហឹងឱ្យកាន់តែក្ដៅនៅក្នុងជម្លោះព្រំដែនកម្ពុជា និងថៃ នាពេលកន្លងមក ហើយថែមទាំងធ្លាប់ចំអកបែបមើលងាយលោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ ពាក់ព័ន្ធនឹងសម្រស់ទៀតផង​។

មិនតែប៉ុណ្ណោះ នាង Boom Panadda ធ្លាប់បានចំអកមាក់ងាយកម្ពុជា ក្នុងគ្រប់រូបភាព ហើយអ្វីដែលជាការកត់សម្គាល់ខ្លាំងជាងគេលើកចុងក្រោយនោះ គឺអំឡុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នៅខេត្តកោះកុង នាង Boom Panadda បានថតស៊ែលហ្វីបញ្ចេញកាយវិការ និងលេងទឹកមុខមិនសមរម្យ ហើយថតដបទឹកបរសុទ្ធកម្ពុជា ហើយបាននិយាយបែបមើលងាយខ្មែរថា នាងស្រេកទឹកណាស់ តែនាងមិនផឹកទឹកសុទ្ធរបស់ខ្មែរជាដាច់ខាត គឺនាងនឹងទ្រាំរហូតនាងទៅដល់ប្រទេសថៃវិញទើបនាងផឹកទឹករបស់ថៃ៕

ដោយ: តែម សុខុម