មែនទែនទៅ អភិបាលរដ្ឋកាលីហ្វ័រញ៉ា លោក Gavin Newsom បានប្រកាសជាលើកដំបូងនូវផែនការ ដើម្បីបញ្ឈប់ការប្រើប្រាស់យានជំនិះដែលប្រើប្រេងឥន្ធនៈនៅត្រឹមឆ្នាំ ២០៣៥ តាំងពីខែកញ្ញា ឆ្នាំ ២០២០ មកម្ល៉េះ។ ប៉ុន្តែ ក្រុមប្រឹក្សាភិបាលផ្នែកធនធានអាកាសនៃរដ្ឋកាលីហ្វ័រញ៉ាទើបតែបានបោះឆ្នោតសម្រេចកាលពីថ្ងៃព្រហស្បតិ៍ ទី ២៥ ខែ សីហា ដើម្បីអនុម័តច្បាប់ថ្មី ដែលកំណត់កាត់បន្ថយយានយន្តដែលបញ្ចេញឧស្ម័នពុលត្រឹមឆ្នាំ ២០២៦។ យ៉ាងណាក៏ដោយចុះ ច្បាប់ថ្មីនេះនឹងត្រូវរង់ចាំការអនុម័តពីរដ្ឋបាលលោក Biden ជាមុនសិន មុនអាចចូលជាធរមានបាន។
រដ្ឋកាលីហ្វ័រញ៉ាបានផ្លាស់ប្តូរលឿនជាងរដ្ឋាភិបាលសហព័ន្ធអាមេរិក និង រដ្ឋផ្សេងទៀតក្នុងការកំណត់ស្តង់ដារតឹងរ៉ឹងសម្រាប់ការបំភាយឧស្ម័នពុលនៃយានយន្ត។
មន្ត្រីរដ្ឋកាលីហ្វ័រញ៉ាបាននិយាយថា ច្បាប់ថ្មីនេះនឹងកំណត់ឱ្យមាន ៣៥% នៃរថយន្តថ្មីប្រភេទរថយន្តកូនកាត់ និង រថយន្តអគ្គិសនីនៅឆ្នាំ ២០២៦ ខណៈសមាមាត្រទាំងនោះនឹងកើនឡើងដល់ ៦៨% នៅឆ្នាំ ២០៣០ និង ១០០% នៅឆ្នាំ ២០៣៥ ។ មន្រ្តីរូបនេះក៏បានអះអាងថា វិធានការនេះនឹងកាត់បន្ថយការបំពុលបរិយាកាស ២៥% នៅឆ្នាំ ២០៣៧ ដែលបណ្តាលពីយានជំនិះធុនស្រាល។
អត្ថបទគួរអាន
ប្រធានក្រុមប្រឹក្សាភិបាលផ្នែកធនធានអាកាសនៃរដ្ឋកាលីហ្វ័រញ៉ា លោក Liane Randolph មានប្រសាសន៍ថា វាជាពេលវេលាប្រវត្តិសាស្ត្រមួយសម្រាប់រដ្ឋកាលីហ្វ័រញ៉ា និង រដ្ឋផ្សេងទៀត និង សម្រាប់ពិភពលោកទាំងមូល នៅពេលដែលរដ្ឋនេះកំណត់ផ្លូវឆ្ពោះទៅរកអនាគតគ្មានការបំភាយឧស្ម័ន។
លោក Steve Douglas អនុប្រធានសម្ព័នសម្រាប់ការឆ្នៃប្រឌិតរថយន្ត ដែលជាសមាគមពាណិជ្ជកម្មតំណាងឱ្យក្រុមហ៊ុន General Motors, Volkswagen, Toyota Motor និង ក្រុមហ៊ុនផលិតរថយន្តផ្សេងទៀតបាននិយាយកាលពីថ្ងៃព្រហស្បតិ៍ថា ច្បាប់ថ្មីនៃក្រុមប្រឹក្សាភិបាលផ្នែកធនធានអាកាសនៃរដ្ឋកាលីហ្វ័រញ៉ា គឺជាបទប្បញ្ញត្តិផ្លាស់ប្តូរដ៏ធំបំផុតនៅក្នុងប្រវត្តិសាស្រ្តនៃរថយន្តពិភពលោក។
យ៉ាងណាមិញ សមាគមពាណិជ្ជកម្មក្រុមហ៊ុនផលិតឥន្ធនៈ និង គីមីឥន្ធនៈអាមេរិកកាលពីថ្ងៃព្រហស្បតិ៍បានជំរុញឱ្យប្រធានាធិបតីលោក Joe Biden និង ទីភ្នាក់ងារការពារបរិស្ថាន ច្រានចោលសំណើរបស់រដ្ឋកាលីហ្វ័រញ៉ាទៅលើច្បាប់ថ្មីនេះ ដោយបានអះអាងថា វានឹងធ្វើឱ្យប៉ះពាល់ដល់ទីផ្សារប្រេងឥន្ធនៈធ្ងន់ធ្ងរ៕
