លោក អានុទីន បានជួយជជែកក្រៅផ្លូវការជាមួយសម្តេចធិបតី នៅរុស្ស៊ី និងបានបដិសេធមិនឆ្លើយសំណួរអ្នកកាសែតពេលសួររឿងបើកច្រកព្រំដែន ព្រោះប្រជាជនថៃខឹង

បើយោងតាមការចុះផ្សាយរបស់សារព័ត៌មាន The Nation នៅថ្ងៃទី១៩ ខែមិថុនា លោក អានុទីន បានថ្លែងប្រាប់ក្រុមអ្នកកាសែតថា ប្រទេសថៃកំពុងបន្តរក្សាការប្រុងប្រយ័ត្ន និងការត្រៀមលក្ខណៈយោធាកម្រិតខ្ពស់ជាប់ជានិច្ចនៅតាមបណ្តោយព្រំដែន។ លោក បានរៀបរាប់ថា លោកបានជួប និងបានជជែកគ្នាមួយភ្លែតជាមួយសម្ដេចធិបតី ហ៊ុន ម៉ាណែត នៅក្នុងបន្ទប់ទទួលភ្ញៀវ។ នៅក្នុងនោះ លោក បានបញ្ជាក់ឡើងវិញពីយុទ្ធសាស្ត្ររបស់ថៃ ក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ដោយសង្កត់ធ្ងន់ថា ប្រសិនបើដំណើរការ UNCLOS ឈានដល់ដំណាក់កាលផ្សះផ្សាដោយបង្ខំ ប្រទេសថៃនឹងផ្អាកការចរចាក្រោមក្របខណ្ឌគណៈកម្មការព្រំដែនរួម JBC និង GBC ជាមួយកម្ពុជាជាបណ្ដោះអាសន្នភ្លាមៗ។

នៅពេលអ្នកកាសែតចោទសួរដេញដោលថា តើលោកបានពិភាក្សាខ្លឹមសារស៊ីជម្រៅអ្វីខ្លះជាមួយមេដឹកនាំកម្ពុជា? លោក អានុទីន បានឆ្លើយតបទាំងបង្កប់ន័យថា លោកមិនសូវមានពេលច្រើនទេ គ្រាន់តែបានទាញដៃសម្តេចធិបតី រួចហើយនិយាយគ្នា១ម៉ាត់២ម៉ាត់ខ្លីៗប៉ុណ្ណោះ។ លោកបានបន្ថែមថា ភាគីទាំងពីរបានយល់ច្បាស់ពីជំហររៀងៗខ្លួនរួចហើយ។ ទាក់ទិននឹងសកម្មភាពយោធា ឬភាពតានតឹងតាមបណ្តោយព្រំដែនកន្លងមកលោក អានុទីន ទទួលស្គាល់ថា មេដឹកនាំកម្ពុជាមិនចង់មានជម្លោះឡើយ ដូចគ្នានឹងប្រទេសថៃដែរ ប៉ុន្តែព្រឹត្តិការណ៍កន្លងមកពិតជាបានជះឥទ្ធិពល និងប៉ះពាល់ដល់អារម្មណ៍របស់ប្រជាជននៃប្រទេសទាំងពីរយ៉ាងខ្លាំង។

អ្វីដែលធ្វើឱ្យអ្នកកាសែតភ្ញាក់ផ្អើលនោះ គឺនៅពេលសួរថា តើមានការលើកយករបៀបវារៈ នៃការបើកច្រកព្រំដែនឡើងវិញមកជជែកដែរឬទេ? លោក អានុទីន បានសើច ហើយឆ្លើយតបយ៉ាងខ្លីភ្លាមថា សូមកុំសួរអំពីរឿងហ្នឹងអី បើលោកនិយាយពីរឿងហ្នឹង ច្បាស់ជាធ្វើឱ្យប្រជាជនថៃខឹងសម្បារជាក់ជាមិនខាន ដែលសញ្ញានេះបង្ហាញថា ខ្សែបន្ទាត់ព្រំដែនរវាងប្រជាជាតិទាំងពីរ នៅតែស្ថិតក្នុងស្ថានភាពមិនច្បាស់លាស់ និងមិនទាន់មានពន្លឺវិជ្ជមានណាមួយឡើយ៕