ប្រទេសកម្ពុជា គិតត្រឹមថ្ងៃទី ២៨ ខែសីហា មានប្រជាជនប្រមាណជាង៨លាននាក់ហើយ ដែលបានចាក់វ៉ាក់សាំងគ្រប់ចំនួន២ដូស ស្មើនឹងប្រមាណ៨០%នៃផែនការចាក់វ៉ាក់សាំងជូនពលរដ្ឋពេញវ័យ ១០លាននាក់។ ដោយឡែក សិង្ហបុរី វិញសម្រេចបានការចាក់វ៉ាក់សាំងជាង៨០%ដូចកម្ពុជាដែរ នៃចំនួនប្រជាជនសរុបជិត ៦លាននាក់របស់ខ្លួន។
ដំបូងយើងនិយាយពីប្រទេសសិង្ហបុរីមុន! ប្រទេសដីកោះមួយនេះ ត្រូវបានគេដឹងថា គឺជាប្រទេសមួយដែលបានចាក់វ៉ាក់សាំងកូវីដ-១៩បានលឿនបំផុត និងមានការបន្ធូរបន្ថយវិធានការតឹងរ៉ឹងបានកាន់តែច្រើនផងដែរ។ បើតាមរដ្ឋមន្ត្រីសុខាភិបាលសិង្ហបុរី បានអះអាងប្រាប់សារព័ត៌មានថា សិង្ហបុរីបានសម្រេចការចាក់វ៉ាក់សាំងគ្រប់ចំនួនដូសប្រមាណ ៨០%ហើយ នៃចំនួនប្រជាជនសរុបជិត ៦លាននាក់របស់ខ្លួន។
អាជ្ញាធរសិង្ហបុរីបាននិយាយថា នឹងបន្ដបន្ធូរបន្ថយវិធានការរឹតត្បិតឲ្យកាន់តែធូរស្រាលជាងនេះទៀត បន្ទាប់ពីការចាក់វ៉ាក់សាំងបានឈានមកដល់ជាង៨០%នាពេលនេះ។ ដោយឡែក ករណីឆ្លងកូវីដប្រចាំថ្ងៃនៅសិង្ហបុរីវិញ គឺនៅប៉ុន្មានថ្ងៃមកនេះ ករណីឆ្លងរកឃើញក្នុងមួយថ្ងៃៗមានត្រឹមតួលេខ ២ខ្ទង់ប៉ុណ្ណោះ។
មិនមែនមានតែសិង្ហបុរីទេ ដែលចាក់វ៉ាក់សាំងបានលឿន កម្ពុជាយើងក៏មិនអន់ដែរ ដោយមកទល់ពេលនេះ បើតាមតួលេខពីក្រសួងសុខាភិបាលបានបង្ហាញថា កម្ពុជាមានអ្នកចាក់វ៉ាក់សាំងគ្រប់ចំនួន២ដូស មានដល់ទៅជាង ៨លាន នាក់ហើយ ស្មើនឹងប្រមាណជាង ៨០%នៃផែនការចាក់ជូនពលរដ្ឋពេញវ័យ១០លាននាក់ ខណៈដែលអ្នកចាក់ដូសទី១វិញ មានជាង៩លាននាក់ហើយ។
អត្ថបទគួរអាន
ក្រៅតែផែនការចាក់ជូនពលរដ្ឋពេញវ័យ១០លាននាក់ កម្ពុជាក៏បានសម្រុកចាក់ជូនកុមារវ័យចាប់ពី១២ឆ្នាំ ដល់អាយុក្រោម១៨ឆ្នាំ ប្រមាណ២លាននាក់ផងដែរ ហើយមកទល់ពេលនេះមានជាង ១លាន៤សែននាក់ហើយដែលបានចាក់ដូសទី១ រួច និង អ្នកបានចាក់ពីរដូសវិញមានជាង ២៤ម៉ឺននាក់។
ពិសេសជាងនេះទៀត ថ្មីៗនេះ កម្ពុជាក៏បានដាក់ចេញគោលនយោបាយចាក់វ៉ាក់សាំងដូសជំរុញ សម្រាប់ពលរដ្ឋផងដែរ ហើយមកទល់ពេលនេះ ការចាក់ដូសទី៣ ឬដូសជំរុញនេះ សរុបមាន ជាង៥៨ម៉ឺននាក់ហើយ។
សរុបជារួម មកទល់ពេលនេះ ការចាក់វ៉ាក់សាំងនៅកម្ពុជា ធៀបនឹងចំនួនពលរដ្ឋប្រមាណ ១៦លាននាក់ គឺ សម្រេចបានជាង៦៥%ហើយ។
សូមបញ្ជាក់ថា បច្ចុប្បន្នស្ថានភាពកូវីដ-១៩ ឆ្លងរីករាលដាលប្រចាំថ្ងៃហាក់មានសភាពថមថយជាងមុនបន្ដិចមកនៅត្រឹមជាង ៤០០នាក់ក្នុងមួយថ្ងៃ ដែលបានថមថយចុះពីកម្រិតខ្ពស់បំផុតជាង៨០០ ទៅ៩០០នាក់នៅក្នុងមួយថ្ងៃ។ ប៉ុន្ដែ វត្តមានមេរោគបំប្លែងថ្មី ឌែលតា នៅតែជាក្ដីបារម្ភធំសម្រាប់កម្ពុជា ដោយគិតត្រឹមថ្ងៃទី ២៨ ខែសីហា អ្នកឆ្លងមេរោគបំប្លែងថ្មីនេះ មានជាង១ពាន់៧រយនាក់ហើយ៕
None
