ក្រោយពេលកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិនចូលជាធរមាន កម្ពុជាអាចនាំចេញទំនិញជាង៣០០មុខទៅប្រទេសចិន ដោយមិនចាំបាច់បង់ពន្ធ។ ក្រសួងពាណិជ្ជកម្មរំពឹងថា ការធ្វើពាណិជ្ជកម្មរវាងប្រទេសកម្ពុជា និងចិននឹងមានភាពល្អប្រសើរមួយកម្រិតទៀត ក្រោយកិច្ចព្រមព្រៀងនេះចូលជាធរមាន។
ឯកឧត្តម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មបានបញ្ជាក់ប្រាប់ខេមបូណូមីសថា ប្រសិនបើកម្ពុជាអាចរៀបចំនីតិវិធីផ្ទៃក្នុងឲ្យបានចប់សព្វគ្រប់មុនខែកញ្ញា ឆ្នាំ២០២១ ក្រសួងពាណិជ្ជកម្មជឿជាក់ថា កិច្ចព្រមព្រៀងពាណិជ្ជកម្មសេរីរវាងកម្ពុជា-ចិន នឹងអាចចូលជាធរមាននៅដើមឆ្នាំ២០២២។ ឯកឧត្តមបានបន្ថែមថា សេចក្តីព្រាងច្បាប់ស្តីពីកិច្ចព្រមព្រៀងពាណិជ្ជកម្មសេរីកម្ពុជា-ចិន នឹងត្រូវដាក់ឲ្យត្រួតពិនិត្យ និងវាយតម្លៃក្នុងកិច្ចប្រជុំពេញអង្គនៃគណៈអចិន្ត្រៃយ៍រដ្ឋសភាក្នុងពេលឆាប់ខាងមុខនេះ។
អ្នកនាំពាក្យឆ្លាស់វេនរូបនេះរំពឹងថា កម្ពុជានឹងទទួលអត្ថប្រយោជន៍បន្ថែមទៀតពី FTA កម្ពុជា-ចិន លើអ្វីដែលកម្ពុជាកំពុងទទួលបានពីភាគីចិន ក្នុងការជំរុញទំហំពាណិជ្ជកម្មរវាងប្រទេសទាំងពីរ និងការនាំចេញរបស់កម្ពុជា។ ប្រសិនបើកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិនចូលជាធរមាន កម្ពុជាអាចនាំចេញទំនិញជាង៣០០មុខទៅប្រទេសចិន ដោយមិនចាំបាច់បង់ពន្ធ។
អត្ថបទគួរអាន
អ្នកជំនាញសេដ្ឋកិច្ចកម្ពុជាបានលើកឡើងថា ជញ្ជីងពាណិជ្ជកម្មរវាងប្រទេសកម្ពុជា និងចិននឹងតុល្យភាពក្នុងថ្ងៃណាមួយនាពេលអនាគត ប្រសិនបើ FTA កម្ពុជា-ចិនចូលជាធរមាន ព្រោះក្រោយកិច្ចព្រមព្រៀងនេះចូលជាធរមាន នឹងមានក្រុមហ៊ុនបរទេសធំៗជាច្រើន ពិសេសចិន សម្រុកមកវិនិយោគនៅកម្ពុជា ដើម្បីផលិតផលិតផល និងសម្ភារផ្សេងៗសម្រាប់នាំចេញទៅទីផ្សារចិន និងទីផ្សារអ៊ឺរ៉ុបមួយចំនួន ដែលមានកិច្ចព្រមព្រៀងជាមួយកម្ពុជា។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មធ្លាប់បានបង្ហាញក្តីរំពឹងកន្លងមកថា ការនាំចេញផលិតផលរបស់កម្ពុជាទៅកាន់ទីផ្សារចិន នឹងកើនឡើង២៥% បន្ថែមទៀត ប្រសិនបើកិច្ចព្រមព្រៀងពាណិជ្ជកម្មសេរីកម្ពុជា-ចិនចូលជាធរមាន។
របាយការណ៍ពីក្រសួងពាណិជ្ជកម្មកម្ពុជាបង្ហាញថា នៅ៥ខែដំបូងនៅឆ្នាំ២០២១ ទំហំពាណិជ្ជកម្មរវាងកម្ពុជានិងចិនសម្រេចបានជិត៤ពាន់លានដុល្លារ កើនឡើងជាង២៥% ក្នុងនោះ ការនាំចេញទំនិញពីកម្ពុជាទៅចិនមានជិត៥៦០លានដុល្លារ កើនឡើង៥៦% ខណៈដែលការនាំចូលមកវិញមានជាង៣ពាន់៣រយលានដុល្លារកើនជាង២១%៕
None
