ស្ថានទូតចិន ប្រចាំកម្ពុជា បានអះអាងនៅលើទំព័រហ្វេសបុកផ្លូវការរបស់ខ្លួនកាលពីថ្ងៃទី ២៣ តុលា យ៉ាងដូច្នេះថា «ប្រសិនដំណើរការបានយ៉ាងរលូន និងជោគជ័យ នាដើមឆ្នាំក្រោយខាងមុខនេះ ប្រទេសចិន និងកម្ពុជា នឹងមានការចុះហត្ថលេខា លើកិច្ចព្រមព្រៀង ស្ដីអំពី ការនាំចេញផ្លែស្វាយពីកម្ពុជា ទៅកាន់ប្រទេសចិន»។
ស្ថានទូតចិន ប្រចាំកម្ពុជា បានគូសបញ្ជាក់ទៀតថា ប្រទេសកម្ពុជា មានសក្ដានុពលក្នុងការនាំចេញផ្លែស្វាយ ជាង ៥០ម៉ឺនតោន ទៅកាន់ប្រទេសចិនជារៀងរាល់ឆ្នាំ ហើយប្រទេសចិន នឹងបើកចំហទីផ្សារជូនដល់កឲផលិតផលកសិកម្មកម្ពុជាកាន់តែច្រើនទៀត នៅពេលខាងមុខ។
នៅរយៈពេលជាង ៩ខែឆ្នាំ២០១៩នេះ កម្ពុជាបាននាំចេញផ្លែស្វាយជាង ៤,៤ ម៉ឺនតោន ទៅកាន់ទីផ្សារប្រទេស វៀតណាម ថៃ និងសិង្ហបុរី។ នេះបើយោងតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ។
គួរបញ្ជាក់ដែរថា ផ្លែស្វាយរបស់កម្ពុជា ក៏រំពឹងថា អាចនឹងធ្វើការនាំចេញទៅកាន់ទីផ្សារប្រទេសកូរ៉េខាងត្បូងក្នុងពេលឆាប់ៗខាងមុខនេះដែរ បន្ទាប់ពីបានអូសបន្លាយពេលអស់មួយរយៈ ដោយសារតែបញ្ហាបច្ចេកទេស។
អត្ថបទទាក់ទង!
កសិករ ដាំស្វាយ មានក្ដីសង្ឃឹមជាងមុន និងសាទរចំពោះ ដំណឹងនេះ និងរំពឹងថា កិច្ចព្រមព្រៀងនាំចេញផ្លែស្វាយទៅចិននេះ នឹងត្រូវបានចុះហត្ថលេខា នៅដើមឆ្នាំក្រោយ ដូចការលើកឡើងមែនទៅចុះ។
កាលពីដើមឆ្នាំ២០១៩ កន្លងទៅនេះ កម្ពុជាក៏ទើបតែទទួលបានការអនុញ្ញាតនាំចេញចេកអំបូងលឿងទៅកាន់ទីផ្សារប្រទេសចិនផងដែរ។ បើតាមរបាយការណ៍ ពីក្រសួងកសិកម្ម នៅនៅ៩ខែ ២២ ថ្ងៃ នៃឆ្នាំ២០១៩ កម្ពុជានាំចេញផ្លែចេកបានជាងជិត ១២ម៉ឺនតោន ទៅកាន់ទីផ្សារគោលដៅសំខាន់ចំនួន ៣ គឺប្រទេសចិន វៀតណាម និងជប៉ុន។
ក្រៅពី ផ្លែស្វាយ កាលពីពេលកន្លងទៅនេះ រាជរដ្ឋាភិបាលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ ក៏បានស្នើដល់ភាគីចិន អនុញ្ញាតឲ្យកម្ពុជាអាចនាំចេញផលិតផលកសិកម្មជាច្រើនមុខទៀតទៅកាន់ប្រទេសចិន ដូចជា តាង៉ែន ស្រកានាគ ដូង ម្រេច និងទឹកមាត់ត្រចៀកកាំជាដើម។
អត្ថបទគួរអាន!
របាយការណ៍ ពីក្រសួងកសិកម្ម បានឲ្យដឹងដែរថា ក្នុងរយៈពេល ៩ ខែ ២២ ថ្ងៃ នៃឆ្នាំ២០១៩ នេះ កម្ពុជាបាននាំចេញផលិតផលកសិកម្មដែលបានកែច្នៃរួច និងមិនទាន់កែច្នៃ ជាង ១០មុខទំនិញទៅកាន់ទីផ្សារក្រៅប្រទេសក្នុងតំបន់អាស៊ី និងអឺរ៉ុប ដោយមានបរិមាណសរុបជាង ៥លានតោន។
ក្នុងនោះ កសិផល ដែលបាននាំចេញតាមច្រកចេញចូលតែមួយជាង ៣លានតោន និងការនាំចេញស្រូវមិនបានឆ្លងកាត់ច្រកចេញចូលតែមួយមានជាង ១,៧ លានតោន។
របាយការណ៍ បានគូសបញ្ជាក់ទៀតថា ផលិតផលកសិកម្មដែលបាននាំចេញក្នុងរយៈពេល ៩ខែ ឆ្នាំ២០១៩នេះ មានដូចជាអង្ករចំនួន ជិត៤៣ម៉ឺនតោន ក្នុងនោះ ចិនមានចំណែកទីផ្សារច្រើនជាងគេប្រមាណ ៤០ភាគរយ ដែលមានបរិមាណអង្ករ ជាង ១៧ ម៉ឺន ៨ពាន់តោន។ ទីផ្សារអឺរ៉ុបមានជាង ១៤,៥ ម៉ឺនតោន ខណៈទីផ្សារអាស៊ាន និងទីផ្សារគោលដៅផ្សេងទៀត មានចំនួនប្រហាក់ប្រហែលគ្នាជាង ៥,៦ម៉ឺនតោន។
ជាមួយគ្នានេះ ចំណិតដំឡូងមីក្រៀម មានបរិមាណនាំចេញសរុបជាង ១លានតោន និងដំឡូងមីស្រស់ ជាង ១លានតោនដែរ ត្រូវបាននាំចេញទៅកាន់ប្រទេសថៃ និងវៀតណាម។ ចំណែក ម្សៅដំឡូងមី វិញ ក៏ត្រូវបាននាំចេញក្នុងបរិមាណជាង ៤ម៉ឺនតោនផងដែរ។
គ្រាប់ស្វាយចន្ទី ត្រូវបាននាំចេញក្នុងបរិមាណជិត ១៧ម៉ឺនតោន គ្រាប់ពោតជាង ១១,៧ ម៉ឺនតោន សណ្តែកសៀងជាង ២ម៉ឺនតោន ផ្លែចេកជាង ១១ម៉ឺនតោន ផ្លែស្វាយជាង ៤,៤ ម៉ឺនតោន ម្រេចជាង ៣ពាន់តោន បន្លែជាង ១០០តោន និងមុខទំនិញនៃដំណាំផ្សេងទៀតជាង ២២ម៉ឺនតោន៕
None
