តាមរបាយការណ៍បានឲ្យដឹងទៀតថា ការនាំចេញរបស់កម្ពុជាទៅកាន់ទីផ្សារចិនសម្រេចបានប្រមាណ ៤២៤លានលានដុល្លារអាមេរិក កើនឡើងជាង៤២% បើធៀបនឹងរយៈពេលដូចគ្នាកាលពីឆ្នាំ២០២០ ដែលមានត្រឹមតែ៣០០លានដុល្លារអាមេរិក។ ប៉ុន្តែបើងាកមកមើលការនាំចូលពីចិនមកវិញ មានទំហំទឹកប្រាក់ជាង ២ពាន់៥រយលានដុល្លារអាមេរិក កើនឡើងជាង១៦% ។
បើតាមឧកញ៉ា លឹម ហេង ផលិតដែលជំរុញឲ្យការនាំចេញរបស់កម្ពុជាទៅចិនមានការកើនឡើង ភាគច្រើនជាផលិតផលកសិកម្ម។ ហើយមូលហេតុ ដែលធ្វើឲ្យការនាំចេញរបស់កម្ពុជាកើនឡើងដោយសារកម្ពុជាមានកិច្ចព្រមព្រៀងពាណិជ្ជកម្មសេរីជាមួយចិន គួបផ្សំនឹងទទួលបានការលើកលែងក្នុងការនាំចូលជាដើម។
អត្ថបទទាក់ទង!
យ៉ាងណាក៏ដោយចុះ ជញ្ជីងពាណិជ្ជកម្មរវាងកម្ពុជាជាមួយចិននៅតែផ្អៀងខ្លាំងទៅរកប្រទេសចិនស្ទើរហៅលែងលឺនៅក្នុងរយៈពេល៤ខែដើមឆ្នាំ២០២១នេះ។ ជាក់ស្តែង បើប្រៀបធៀបការនាំចេញរបស់កម្ពុជាទៅចិននៅ៤ខែ ឆ្នាំ២០២១ ជាមួយនឹងការនាំចូលពីចិនមកវិញ គឺមានទំហំខុសគ្នាប្រមាណ៦ដងឯណោះ។
ទោះបីយ៉ាងនេះក្តី អ្នកជំនាញក្នុងវិស័យសេដ្ឋកិច្ចជឿជាក់ថា ជញ្ជីងពាណិជ្ជកម្មកម្ពុជា-ចិនអាចនឹងមានតុល្យភាពនៅពេលខាងមុខ ប្រសិនកិច្ចព្រមព្រៀងពាណិជ្ជកម្មសេរី(FTA) រវាងប្រទេសទាំងពីរនឹងចូលជាធរមានក្នុងពេលឆាប់ៗខាងមុខនេះ។
ឧកញ៉ា លឹម ហេង អនុប្រធានសភាពាណិជ្ជកម្មកម្ពុជាមានសុទិដ្ឋិនិយមខ្ពស់ចំពោះជញ្ជីងពាណិជ្ជកម្មកម្ពុជា-ចិនថា នឹងមានតុល្យភាពនៅថ្ងៃណាមួយនាពេលខាងមុខ ប្រសិនបើ កិច្ចព្រមព្រៀងពាណិជ្ជកម្មសេរី រវាងប្រទេសទាំងពីរចូលជាធរមាន។ លោកឧកញ៉ា ជឿជាក់ថា ក្រោយ កិច្ចព្រមព្រៀងពាណិជ្ជកម្មសេរីកម្ពុជា-ចិន ចូលជាធរមាន នឹងមានក្រុមហ៊ុនបរទេសធំៗជាច្រើនពិសេសមកពីប្រទេសចិន សម្រុកមកបោះទុនរកស៊ីនៅកម្ពុជា ដើម្បីផលិតផលិតផល និងសម្ភារផ្សេងៗសម្រាប់នាំចេញទៅចិន និងទីផ្សារអឺរ៉ុបមួយចំនួន។
ឧកញ៉ា លឹម ហេងបានពន្យល់ទៀតថា ភាពខុសគ្នាលើការនាំចេញរបស់កម្ពុជាជាមួយចិនមិនមែនមានន័យថា កម្ពុជាខាតនោះទេ ពោលគឺការកើនឡើងទំហំនាំចូលរបស់កម្ពុជាដោយសារតម្រូវប្រើប្រាស់ផលិតផល ឬសម្ភារដែលកម្ពុជាមិនមានលទ្ធភាពផលិតខ្លួនឯងមានការកើនឡើង។ ម្យ៉ាងទៀត កម្ពុជាគិតថា ផលិតផលនៅប្រទេសទាំងនោះមានតម្លៃសមរម្យ ដែលអាចឆ្លើយតបជាមួយតម្រូវការទីផ្សារនៅកម្ពុជាបាន។
របាយការណ៍ពីក្រសួងពាណិជ្ជកម្មបង្ហាញថា នៅឆ្នាំ២០២០ ទំហំពាណិជ្ជកម្មកម្ពុជាជាមួយនឹងប្រទេសចិនគិតជាទឹកប្រាក់សរុបប្រមាណជាង ៨.១០០លានដុល្លារអាមេរិកធ្លាក់ចុះ៥%ធៀបនឹងឆ្នាំ២០១៩។ ដោយក្នុងនោះ កម្ពុជានាំចេញទៅចិនគិតជាទឹកប្រាក់មានជាង ១ពាន់លានដុល្លារអាមេរិក ខណៈកម្ពុជានាំចូលមកវិញមានដល់ទៅជាង៧ពាន់លានដុល្លារ៕
None
