អ្នកជំនាញសេដ្ឋកិច្ច បានអះអាងថា ទំហំពាណិជ្ជកម្មរវាងកម្ពុជា-អន្តរជាតិនៅរយៈពេល៩ខែនេះ នៅតែរក្សាបាននូវកំណើនខ្ពស់ ដែលបានបង្ហាញឲ្យឃើញពីកំណើនវិជ្ជមាននៃការស្ទុះងើបឡើងវិញនៃសេដ្ឋកិច្ចជាតិផងដែរ។
ទំហំពាណិជ្ជកម្មរវាងកម្ពុជា និងអន្តរជាតិនៅតែសម្រេចបានកំណើនពីរខ្ទង់ ពោលគឺកើន១៨% នៅរយៈពេល៩ខែឆ្នាំ២០២២នេះ ជាមួយនឹងទំហំទឹកប្រាក់សរុបជាង៤១ពាន់លានដុល្លារ។ ក្នុងនោះ ប្រទេសចិននៅតែជាប់កំពូលតារាងជាដៃគូពាណិជ្ជកម្មដ៏ធំជាងគេបំផុតរបស់កម្ពុជា ដោយមានទំហំពាណិជ្ជកម្មសរុបជិត ៩ពាន់លានដុល្លារ កើនឡើងជិត១០%។ រីឯអាមេរិក ឈរនៅចំណាត់ថ្នាក់ពី២ បន្ទាប់ពីប្រទេសចិន មានទំហំពាណិជ្ជកម្មសរុបជាមួយកម្ពុជាជាង ៧ពាន់លានដុល្លារកើនឡើងជាង២៨% បន្ទាប់ពីនេះ គឺវៀតណាម ប្រទេសថៃ និងសិង្ហបុរី។
ទាក់ទងនឹងកំណើននៃទំហំពាណិជ្ជកម្មកម្ពុជា-អន្តរជាតិនេះដែរ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងនៃរាជបណ្ឌិត្យសសភាកម្ពុជា បានគូសបញ្ជាក់ថា ទំហំពាណិជ្ជកម្មកម្ពុជា-អន្តរជាតិនៅរយៈពេល៩ខែនេះនៅតែរក្សារបាននូវលក្ខណៈល្អប្រសើរ និងមានកំណើនជាបន្តបន្ទាប់ បើទោះបើជាមានបរិមាណនាំចេញមួយចំនួននៅមានកម្រិតក៏ដោយ ។
អត្ថបទគួរអាន
លោកបណ្ឌិត ហុង វណ្ណៈបន្ថែមថា កត្តាដែលនាំឲ្យទំហំពាណិជ្ជកម្មកម្ពុជា-អន្តរជាតិមានភាពល្អប្រសើរ ដោយកម្ពុជាមានទំនាក់ទំនងល្អជាមួយប្រទេសជាដៃគូ មានលក្ខខ័ណ្ឌកិច្ចសហប្រតិបត្តិការនៅក្នុងក្របខណ្ឌទ្វេភាគី និងកិច្ចព្រមព្រៀងពាណិជ្ជកម្មសេរីជាច្រើនជាមួយប្រទេសជាដៃគូសំខាន់ៗ។ លើសពីនេះ កម្ពុជាជាប្រទេសដែលមានសុវត្ថិភាព ស្ថិរភាពនយោបាយ ដែលមិនមានភាពល្អកកករដល់សកម្មភាពផលិតកម្មរបស់វិនិយោគិននោះទេ ដែលជាឱកាសក្នុងការផលិតនូវទំនិញរបស់ពួកគាត់បានដោយរលូន ដើម្បីធ្វើការផ្គត់ផ្គង់ឆ្លើយតបទៅតាមតម្រូវការទីផ្សារអន្តរជាតិ។ គួបផ្សំភាពងាយស្រួលគ្រប់បែបយ៉ាងទាក់ទងនឹងហេដ្ឋារចនាសម្ព័ន្ធដឹកជញ្ជូនកម្ពុជាផងនោះ បានធ្វើឲ្យវិនិយោគិនមានទឹកចិត្តក្នុងការផលិតសម្រាប់នាំចេញផងដែរ។
សូមបញ្ជាក់ថា មុខទំនិញ សំខាន់ៗ ដែលកម្ពុជានាំចេញទៅកាន់ទីផ្សារអន្តរជាតិរួមមាន ផលិតផលវាយនភណ្ឌកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ, ផលិតផលកសិកម្ម គ្រឿងអេឡិចត្រូនិក អគ្គិសនី និងផលិតផលកង់ជាដើម៕
