កម្ពុជា កំពុងដាំពិសោធន៍ពូជដំឡូងមីថ្មី ដែលអាចផ្ដល់ផលពី៦០តោនទៅ១០០តោនក្នុង១ហិកតា

ក្រុមអ្នកជំនាញក្នុងវិស័យដំឡូងមី នៅពុំទាន់ហ៊ានវាយតម្លៃបែបណាចំពោះទិន្នផល ដែលអភិបាល ខេត្តពោធិ៍សាត់ បានអះអាងនោះទេ ប៉ុន្តែពួកគេលើកឡើងថា ប្រសិនបើទទួលបានទិន្នផលខ្ពស់បែបនេះមែន នោះវានឹងរួមចំណែកជួយបង្កើនទិន្នផលដំបូងមី និងប្រាក់ចំណូលសម្រាប់កសិករ។

លោក ហៃ ធូរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ បានគូសបញ្ជាក់ថា មកទល់ពេលនេះ មន្ទីរកសិកម្មខេត្ត ពុំទាន់ដឹងពីប្រភពនៃពូជដំឡូងមីថ្មី ដែលបានបង្កាត់ឡើង និងការផ្តល់ទិន្នផលរបស់វាឱ្យបានជាក់លាក់នៅឡើយទេ។ ប៉ុន្តែលោកអះអាងថា រដ្ឋបាលខេត្តក្រោមការសហការជាមួយក្រុមហ៊ុនឯកជនមួយ កំពុងដាំពូជដំឡូងមីប្រភេទថ្មីនេះសាកល្បងលើផ្ទៃដីប្រមាណ១០ហិកតា។ ប្រធានមន្ទីររូបនេះ ជឿជាក់ថា ប្រសិនបើពូជដំឡូងមីដែលកំពុងដាំពិសោធន៍នេះ អាចទទួលបានទិន្នផលខ្ពស់ពី៦០តោនទៅ១០០តោន ក្នុង១ហិកតាមែន នោះវានឹងរួមចំណែកជួយបង្កើនទិន្នផលដំឡូងមីនៅក្នុងទីផ្សារ ក៏ដូចជាជួយបង្កើនប្រាក់ចំណេញដល់ពលរដ្ឋ បើទោះបីដំឡូងមីមានការធ្លាក់ថ្លៃខ្លះក៏ដោយ។

​ដោយឡែក លោក ស៊ីន វុទ្ធី អគ្គលេខាធិការសមាគមសម្ព័ន្ធដំឡូងមីកម្ពុជា-ចិន ហាក់មិនមានជំនឿថា ពូជដំឡូងមីថ្មីនេះអាចផ្តល់ទិន្នផលខ្ពស់ចន្លោះពី៦០ទៅ១០០តោន ដូចអ្វីដែលរដ្ឋបាលខេត្តពោធិ៍សាត់ បានអះអាងនោះទេ ហើយមកទល់ពេលនេះ លោក​ក៏ពុំទាន់ទទួលបានព័ត៌មានលម្អិតជុំវិញបញ្ហានេះដែរ។ ប៉ុន្តែអ្នកជំនាញរូបនេះជឿជាក់ថា ប្រសិនបើពូជដំឡូងមីនេះអាចផ្តល់ទិន្នផលខ្ពស់ដូចការអះអាងមែន នោះវានឹងរួមចំណែកជួយលើកកម្ពស់ទីផ្សារដំឡូងមីនៅកម្ពុជា និងជួយបង្កើនប្រាក់ចំណូលរបស់កសិករ។ បើតាមលោក ស៊ីន វុទ្ធី បច្ចុប្បន្នសមាគមសម្ព័ន្ធដំឡូងមីកម្ពុជា-ចិន កំពុងជំរុញកសិករឱ្យដាំដុះពូជដំឡូងមីពីរប្រភេទរួមមាន TME-419 និង RAYONG 7 ព្រោះវាផ្ដល់ទិន្នផលល្អ មានជាតិម្សៅខ្ពស់ និងធន់ជាមួយជំងឺ។

​​ជាមួយគ្នានេះ លោក អិល ឈិញ ប្រធានសមាគមកសិករដំឡូងមីខ្មែរ បានឱ្យដឹងថា បច្ចុប្បន្នការប្រមូលផលដំឡូងមីរបស់កសិករអាចទទួលបានចន្លោះពី២០តោនដល់៧០តោន ដោយអាស្រ័យលើបច្ចេកទេស និងសណ្ឋានដីដែលមានជីវជាតិ ខណៈពូជដែលកសិករកំពុងដាំបច្ចុប្បន្ននេះហាក់មិនសូវធន់នឹងជំងឺនោះទេ។ ទន្ទឹមនេះអ្នកជំនាញរូបនេះ មិនទាន់ហ៊ានវាយតម្លៃបែបណាចំពោះពូជដំឡូងមីថ្មី ដែលរដ្ឋបាលខេត្តពោធិ៍សាត់ កំពុងដាំដុះសាកល្បងនោះទេ ប៉ុន្តែប្រសិនបើទទួលបានទិន្នផលចន្លោះពីពី៦០តោនដល់១០០តោនក្នុង១ហិកតាមែននោះនឹងជួយដល់កសិករបានច្រើន។

​សូមបញ្ជាក់ថា កាលពីពេលថ្មីៗនេះ ឯកឧត្តម ខូយ រីដា អភិបាលខេត្តពោធិ៍សាត់ បានបង្ហាញពូជដំឡូងមី ចំនួន១០ប្រភេទ ក្រោយស្រាវជ្រាវរយៈពេល១៥ឆ្នាំកន្លងមកនេះ។ ពូជដំឡូងមីថ្មីនេះ ត្រូវបានអភិបាលខេត្តពោធិ៍សាត់ អះអាងថា ជាពូជបង្កាត់ចេញពីគ្រាប់ដែលធន់នឹងជំងឺ ធន់នឹងអាកាសធាតុ មិនរើសដី និងទទួលបានផលចន្លោះពី៦០ទៅ១០០តោនក្នុង១ហិកតា។ បើតាមឯកឧត្តម ខូយ រីដា ពូជដំឡូងថ្មីនេះពុំទាន់មានឈ្មោះនៅឡើយទេ ហើយអាចនឹងចែកជូនដល់កសិករនាពេលខាងមុខ៕

អត្ថបទ៖ បូ ដូឡា​