លោកជំទាវ ជា សិរី ទេសាភិបាលធនាគារជាតិនៃកម្ពុជា បានគូសបញ្ជាក់ថា ប្រព័ន្ធទូទាត់បាគង ដែលទើបសម្ពោធដាក់ឱ្យដំណើរការបណ្តោះអាសន្ន កាលពីថ្ងៃទី១៩ ខែសីហា មិនមែនជាផលិតផលសម្រេចនោះទេ ពោលគឺជាផលិតផលទើបអភិវឌ្ឍន៍បានពាក់កណ្ដាលសម្រេចតែប៉ុណ្ណោះ ខណៈផលិតផលសម្រេចគ្រោងនឹងសម្ពោធដាក់ឱ្យដំណើរការនៅពេលដ៏ខ្លីខាងមុខនេះ។ យ៉ាងណាក៏ដោយថ្នាក់ដឹកនាំរូបនេះជឿជាក់ថា ប្រព័ន្ធនេះវានឹងជូយសម្រួលដល់ការទូទាត់របស់ភ្ញៀវទេសចរ កាត់បន្ថយការប្រើប្រាស់ក្រដាសប្រាក់ ក៏ដូចជាជួយលើកកម្ពស់ការប្រើប្រាស់ប្រាក់រៀល និងវិស័យទេសចរណ៍ផងដែរ។
ជាមួយគ្នានេះ លោក រ័ត្ន សោភ័ណ ប្រធានសមាគមធនាគារនៅកម្ពុជា បានចាត់ទុកប្រព័ន្ធទូទាត់បាគងទេសចរ គឺជាផលិតផលថ្មីមួយទៀត បន្ថែមលើផលិតផលដែលមានស្រាប់ ដែលនឹងជួយឱ្យភ្ញៀវទេសចរកាន់តែមានភាពងាយស្រួលក្នុងការទូទាត់លើសេវាកម្សាន្ត និងស្នាក់នៅកម្ពុជា ដោយពុំចាំបាច់កាន់ក្រដាសប្រាក់ និងមិនមានការភ័យព្រួយពីការមិនទទួលយកក្រដាសប្រាក់ចាស់ៗ ហើយនឹងចូលរួមលើកកម្ពស់ប្រាក់រៀល ព្រមទាំងចូលរួមទប់ស្កាត់ការចរាចរក្រដាសប្រាក់ក្លែងក្លាយផងដែរ។
សូមបញ្ជាក់ថា ការដាក់ឱ្យដំណើរការបឋមកម្មវិធីទូទាត់បាគងទេសចរនេះ គឺជាសមិទ្ធផលថ្មីសម្រាប់ទូទាត់ក្នុងប្រព័ន្ធ ឌីជីថល ដើម្បីបង្កើតភាពងាយស្រួលដល់ភ្ញៀវទេសចរអន្តរជាតិ និងជាការអនុលោមតាមយុទ្ធសាស្រ្តអភិវឌ្ឍន៍វិស័យហិរញ្ញវត្ថុឆ្នាំ២០១៦-២០២៥ របស់រាជរដ្ឋាភិបាលកម្ពុជា។ បើតាមទិន្នន័យពីធនាគារជាតិនៃកម្ពុជា នៅត្រឹមឆមាសទី១ ឆ្នាំ២០២៤ ប្រព័ន្ធបាគង មានសមាជិកសរុបចំនួន៧២គ្រឹះស្ថាន ក្នុងនោះមានគ្រឹះស្ថានចំនួន៦០ បានដាក់ឱ្យដំណើរការជាផ្លូវការ និងគ្រឹះស្ថានចំនួន១២ទៀតកំពុងតែរៀបចំប្រព័ន្ធ។
ប្រតិបត្តិការផ្ទេរប្រាក់និងការទូទាត់ដែលធ្វើឡើងតាមរយៈប្រព័ន្ធបាគង មានចំនួន២២២លានប្រតិបត្តិការ ក្នុងនោះ៩៣លានប្រតិបត្តិការ គឺជាប្រាក់រៀល និង១២៤លានប្រតិបត្តិការ គឺជាប្រាក់ដុល្លារអាម៉េរិក និងមានទំហំប្រាក់រៀលចំនួន៧៧ទ្រីលានរៀល និងជាប្រាក់ដុល្លារអាម៉រិកចំនួន៤៦ពាន់លានដុល្លារអាម៉រិក៕
អត្ថបទ៖ បូ ដូឡា
