ថ្លែងនៅក្នុងទិវាសប្តាហ៍ជាតិសុវត្ថិភាពចរាចរណ៍លើកទី១២ នៅស្រុកពញាក្រែក ខេត្តត្បូងឃ្មុំ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេច ស ខេង បាននិយាយថា គ្រោះថ្នាក់ចរាចរណ៍សរុបមានចំនួន ១០៧៦លើក គឺកើនឡើងចំនួន ២៥៧លើក ស្មើនឹង ៣១ភាគរយ នៅក្នុងត្រីមាសទី១ ឆ្នាំ២០១៩នេះ។
ក្នុងគ្រោះថ្នាក់ទាំងនេះ បានបណ្តាលឲ្យមានអ្នកស្លាប់ចំនួន ៥១៣នាក់ កើនចំនួន ៣៣នាក់ ស្មើនឹង ៧ភាគរយ និងរបួសចំនួន ១៥៩២នាក់ កើនឡើង ៣៥៨នាក់ ស្មើនឹង ២៩ភាគរយ។ នេះបើយោងតាម សម្តេច ស ខេង។
សម្តេច ស ខេង បានអះអាងបន្តថា នេះគ្រាន់តែជាតួលេខត្រឹមខែមីនា នៃឆ្នាំ២០១៩ ប៉ុណ្ណោះ ហើយសម្តេចបានបន្តថា ៖ «ចំនួនគ្រោះថ្នាក់ចរាចរណ៍នឹងមិនមានការថយចុះ» នោះទេ ទៅអនាគត។
តើបានអានអត្ថបទនេះ ឬនៅ ?
សម្តេច ស ខេង បានអះអាងដូច្នេះថា ៖ «នេះជាសញ្ញាមួយបង្ហាញថា ការគោរពច្បាប់ក្នុងពេលធ្វើដំណើរហាក់បីដូចជាមានការធ្លាក់ចុះ។ ការពិតហើយ យើងក៏ត្រូវមើលកត្តាផ្សេងទៀត ដែលបណ្តាលឲ្យគ្រោះថ្នាក់ចរាចរណ៍ ឧទាហរណ៍ ដូចជា កំណើនយានយន្តដែលរហូតដល់ ៣០ភាគរយ នៅឆ្នាំ២០១៨ ហើយដើមឆ្នាំ២០១៩ មកដល់បច្ចុប្បន្ននេះ ចំនួននេះវាកើនឡើងច្រើនជាងនេះទៀត នោះក៏ជាកត្តាមួយដែរ។»
ជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកផងដែរនោះ សម្តេច ស ខេង បានអំពាវនាវឲ្យប្រជាពលរដ្ឋ ជាទូទៅ គោរពច្បាប់ចរាចរណ៍ម៉ឺងម៉ាត់ ដោយរួមទាំងក្រុមហ៊ុនដឹកជញ្ជូនទាំងឡាយ មិនត្រូវជួលបុគ្គលិកបើកបរដែលប្រើថ្នាំញៀននោះទេ។
សម្តេច ស ខេង ក៏បានបន្ទោសដល់មន្រ្តីធំៗមួយចំនួនផងដែរ ដែលមិនពាក់ខ្សែក្រវាត់ពេលបើកបរ ដោយអាងថា ឡានខ្លួនទំនើប។
តើបានអានអត្ថបទនេះ ឬនៅ?
សម្តេច ស ខេង បានមានប្រសាសន៍ដូច្នេះថា ៖ «ខ្ញុំនិយាយឲ្យអស់ទៅ អ្នកដែលគ្រោះថ្នាក់ អត់ដាក់ខ្សែក្រវាត់ ភាគច្រើន គឺអ្នកធំហ្មង។ ចៅហ្វាយខេត្តអស់ប៉ុន្មានហើយ អត់ពាក់ខ្សែក្រវាត់។ និយាយទៅ គាត់ស្លាប់អស់បាត់ទៅហើយ។»
សម្តេច ស ខេង បាននិយាយដល់ករណីលោក ខាំ ភឿន ចៅហ្វាយខេត្តក្រចេះ ដែលបានស្លាប់ដោយសារក្រឡាប់ឡាន កាលពីឆ្នាំ២០១២ និងករណីលោក ទ្រី ណារិន អភិបាលខេត្តបន្ទាយមានជ័យ ដែលបានស្លាប់ផងដែរ នៅឆ្នាំ២០១៣ ដោយសារគ្រោះថ្នាក់ចរាចរណ៍។
កាលពីឆ្នាំ២០១៨ អភិបាលរងខេត្តប៉ៃលិន លោកស្រី សោម មុនីរ័ត្ន ក៏បានស្លាប់ផងដែរ ក្នុងករណីគ្រោះថ្នាក់ចរាចរណ៍មួយ នៅខេត្តកំពង់ឆ្នាំង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
