អ្នកនាំពាក្យក្រសួងទេសចរណ៍ និងសមាគមន៍ទីភ្នាក់ងារទេសចរណ៍សុទ្ធតែអះអាថា នៅឆ្នាំ២០២១នេះ បើស្ថានភាពរីករាលដាលនៃជំងឺកូវីដ១៩ នៅតែបន្តអូសបន្លាយដូចបច្ចុប្បន្ននេះ នោះស្ថានភាពនៃវិស័យទេសចរណ៍នឹងកាន់តែដុនដាបមិនខុសពីឆ្នាំ២០២០នោះទេ។
ឯកឧត្តម តុប សុភ័ក្រ អ្នកនាំក្រសួងទេសចរណ៍បានមានប្រសាសន៍ថា ឆ្នាំ២០២១នេះ ស្ថានភាពវិស័យទេសចរណ៍កម្ពុជា ក៏មិនខុសពីឆ្នាំ២០២០ប៉ុន្មានដែរ ដោយសារតែបច្ចុប្បន្ន កម្ពុជាកំពុងតែរងនូវការរីករាលដាលយ៉ាងខ្លាំង ក្នុងការឆ្លងសហគមន៍។ យ៉ាងណាមិញ នៅដើមឆ្នាំនេះ ភ្ញៀវទេសចរ គឺបាត់បង់ទាំងស្រុងទៅហើយ។
ទោះជាយ៉ាងណាក៏ ឯកឧត្តមបញ្ជាក់ថា ក្រសួងទេសចរណ៍បាននិងកំពុងធ្វើការជាមួយភាគីពាក់ព័ន្ធ ដើម្បីដាក់ចេញនូវផែនការយុទ្ធសាស្ត្រមួយចំនួន ដើម្បីស្តារវិស័យនេះ ឲ្យឆាប់មានភាពប្រសើរឡើង។
អត្ថបទទាក់ទង!
ជាមួយនេះដែរ លោក ហូ វណ្ឌី ទីប្រឹក្សាសមាគមទីភ្នាក់ងារទេសចរកម្ពុជា ក៏បានប្រាប់ខេមបូណូមីសដែរថា ស្ថានភាពយ៉ាប់យ៉ឺនរបស់វិស័យទេសចរណ៍ពីដើមឆ្នាំ រហូតដល់ពាក់កណ្តាលឆ្នាំនេះ គឺមិនមានស្ថានភាពធូរស្បើយនោះទេ ប៉ុន្តែបើសិនជាការចាក់វ៉ាក់សាំងកូវីដ-១៩ គ្របដណ្តប់បានច្រើន នោះស្ថានភាពអាចនឹងប្រសើរឡើងវិញនៅចុងឆ្នាំនេះ។
បើតាមអ្នកនាំក្រសួងទេសចរណ៍ឲ្យដឹងថា រាជរដ្ឋាភិបាលកម្ពុជា អនុញ្ញាតឲ្យក្រសួងទេសចរណ៍ពិភាក្សាជាមួយក្រសួងសុខាភិបាល និងភាគីពាក់ព័ន្ធ សិក្សាលើលទ្ធភាព និងរកនីតិវិធី ដើម្បីរកមធ្យោបាយសម្រួលបែបបទយ៉ាងណា ដើម្បីឲ្យការធ្វើទេសចរណ៍មានចលនាឡើងវិញនៅពេលឆាប់ៗនេះ។
បែបនេះក្តីក្រសួងទេសចរណ៍រំពឹងថាហើយរំពឹងថា នឹងអាចទទួលបានទេសចរអន្តរជាតិផងដែរននៅត្រីមាសទី៤ នៃឆ្នាំ២០២១ នៅពេលដែលការចាក់វ៉ាក់សាំងបង្ការជំងឺកូវីដ១៩ទាំងក្នុងស្រុកនិងក្រៅស្រុក គ្របដណ្តប់កាន់តែទូលំទូលាយ៕
None
