កម្ពុជា ត្រៀមស្វាគមន៍ក្រុមហ៊ុនវិនិយោគធំៗរបស់អាមេរិក

សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងនៅក្នុងជំនួបសំណេះសំណាលជាមួយកម្មករ និយោជិតជាង១ម៉ឺន៨ពាន់នាក់ នាថ្ងៃទី៣ ខែតុលា ឆ្នាំ២០២៣ ថា ក្នុងដំណើរទស្សនកិច្ចផ្លូវការនៅទីក្រុងញូយ៉ក សហរដ្ឋអាមេរិក នាពេលកន្លងទៅ សម្ដេចបានជួបអ្នកវិនិយោគជាច្រើននៅក្នុងវេទិការធុរកិច្ច។ ប្រមុខរាជរដ្ឋាភិបាលកម្ពុជា បានចាត់ទុកជំនួបជាមួយផ្នែកវិស័យឯកជនទាំងនោះថា ជាការទាក់ម៉ូយ ដ្បិតក្នុងរយៈពេលដ៏ខ្លីប៉ុណ្ណោះសម្តេចបានជួបជាមួយបណ្ដាក្រុមហ៊ុនអាមេរិករហូតដល់៥៨ក្រុមហ៊ុនឯណោះ។ ជំនួបនេះមិនត្រឹមតែជួយបង្កើនភាពស្និទ្ធស្នាលរវាងវិស័យឯកជនជាមួយរាជរដ្ឋាភិបាលកម្ពុជាប៉ុណ្ណោះទេ តែវាជាដ៏ល្អមួយសម្រាប់កម្ពុជាក្នុងការទាក់ទាញក្រុមហ៊ុនធំៗរបស់អាមេរិកឲ្យមកសម្លឺងឱកាសវិនិយោគនៅកម្ពុជាផងដែរ។

បើតាមការគូសបញ្ជាក់របស់សម្តេចធិបតី ហ៊ុន ម៉ាណែត នៅក្នុងជំនួបជាមួយបណ្ដាក្រុមហ៊ុនអាមេរិកទាំង៥៨ខាងលើ ក៏មានក្រុមហ៊ុនយក្សៗរបស់អាមេរិក ដូចជាក្រុមហ៊ុនផលិតយន្តហោះ ប៊ូអ៊ីង និងក្រុមហ៊ុនផលិតថ្នាំពេទ្យ ហ្វៃស៊ឺ ព្រមទាំងក្រុមហ៊ុនប្រេងកាត ឈីវើរ៉ុន ក៏ដូចជាបណ្ដាក្រុមហ៊ុនធំៗមួយចំនួនទៀតផងដែរ។ បើគ្មានការប្រែប្រួលទេថ្នាក់ដឹកនាំមួយចំនួននៃបណ្ដាក្រុមហ៊ុនធំៗមួយចំនួនរបស់អាមេរិក នឹងធ្វើដំណើរមកកាន់ប្រទេសកម្ពុជានាពេលខាងមុខ ដើម្បីពិនិត្យលទ្ធភាព និងសម្លឺងឱកាសវិនិយោគនៅកម្ពុជា។ នេះបើតាមការលើកឡើងរបស់សម្តេចធិបតី ហ៊ុន ម៉ាណែត។ ​​

សម្ដេចនាយករដ្ឋមន្រ្តីកម្ពុជា ធ្លាប់បានគូសបញ្ជាក់ថា កម្ពុជានៅតែបន្ដពង្រីកទំហំទីផ្សារខ្លួន តាមរយៈការធ្វើសមាហរណកម្មទៅក្នុងខ្សែច្រវាក់ផ្គត់ផ្គង់ និងខ្សែច្រវាក់តម្លៃសកល តាមរយៈកិច្ចព្រមព្រៀងពាណិជ្ជកម្មសេរីទាំងទ្វេភាគី និងពហុភាគី។ យន្ដការទ្វេភាគីដូចជា៖ កិច្ចព្រមព្រៀងពាណិជ្ជកម្មសេរីអាស៊ាន, កិច្ចព្រមព្រៀងពាណិជ្ជកម្មសេរីកម្ពុជា-ចិន, កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ, និងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RECP)។ បើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជានៅ៨ខែ ឆ្នាំ២០២៣នេះ ទំហំពាណិជ្ជកម្មកម្ពុជា-អាមេរិក សម្រេចបានជាងជាង៦ពាន់២រយលានដុល្លារថយចុះ៥,៦% បើប្រៀបធៀបនឹងរយៈពេលដូចគ្នាកាលពីឆ្នាំ២០២២ ដែលមានចំនួន ជាង៦ពាន់៦រយលានដុល្លារ៕