ទោះបីវិបត្តិកូវីដ-១៩ បានធ្វើឲ្យរង្គោះរង្កើ និងរាំងស្ទះដល់ចរន្តសេដ្ឋកិច្ចសកលក៏ដោយ តែវាមិនបានធ្វើឲ្យប៉ះពាល់ធ្ងន់ធ្ងរដល់ការធ្វើពាណិជ្ជកម្មរវាងកម្ពុជា ជាមួយសហរដ្ឋអាមេរិកនោះទេ។ ជាក់ស្តែងនៅ៩ខែក្នុងឆ្នាំ២០២១ ទំហំពាណិជ្ជកម្មទ្វេភាគីកម្ពុជា-សហរដ្ឋអាមេរិកនៅ៩ខែក្នុងឆ្នាំ២០២១ មានជាង៥ពាន់៧រយលានដុល្លារកើនឡើងប្រមាណ១៣% បើធៀបនឹងទំហំពាណិជ្ជកម្មក្នុងរយៈពេលដូចគ្នាកាលពីឆ្នាំមុន ដែលសម្រេចបានជាង៥ពាន់៣២លានដុល្លារ។
ការនាំចេញទំនិញរបស់កម្ពុជាទៅសហរដ្ឋអាមេរិក សម្រេចបានជាង ៥ពាន់៤រយលានដុល្លារ កើនឡើងជាង១៣% បើធៀបនឹងរយៈពេលេដូចគ្នាកាលពីឆ្នាំមុន ដែលសម្រេចបានជាង៤ពាន់៨រយលានដុល្លារតែប៉ុណ្ណោះ។ ចំណែកកម្ពុជានាំចូលទំនិញពីសហរដ្ឋអាមេរិក មានចំនួនជាង២៧៦លានដុល្លារមានកំណើនជាង១៨%បើធៀបនឹង៩ខែកាលពីឆ្នាំ២០២០ ដែលមានជាង២៣២លានដុល្លារ។
កំណើនតួលេខនាំចេញពីកម្ពុជាទៅសហរដ្ឋអាមេរិកនេះ ត្រូវបានឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មគូសបញ្ជាក់ថា ដោយសារទំនិញនាំចេញទៅសហរដ្ឋអាមេរិកភាគច្រើនជាទំនិញបញ្ជាទិញមុនការផលិត។ មួយវិញទៀត ដោយសារក្រុមហ៊ុនមួយចំនួនបានបង្វែការបញ្ជាទិញពីប្រទេសបង់ក្លាដែស ស្រីលង្កា និងមីយ៉ាម៉ាជាដើម មកបញ្ជាទិញទំនិញពីកម្ពុជាជំនួសវិញ បន្ទាប់ពីប្រទេសទាំងនោះជួបវិបត្តិនយោបាយ និងការឆ្លងរាតត្បាតនៃជំងឺកូវីដ-១៩។
អត្ថបទគួរអាន
ជាមួយគ្នានេះ ឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានបញ្ជាក់ថា កត្តាដែលធ្វើឲ្យការនាំចេញរបស់កម្ពុជាទៅសហរដ្ឋអាមេរិកនៅតែអាចរក្សាបាននូវកំណើន គឺដោយសារកម្ពុជាមានប្រព័ន្ធអនុគ្រោះពន្ធ GSP គួបផ្សំមានការបង្វែការបញ្ជាទិញពីក្រុមហ៊ុនមួយចំនួនមកកម្ពុជា និងការគ្រប់គ្រងវិបត្តិកូវីដ-១៩ បានល្អពីសំណាក់រាជរដ្ឋាភិបាលកម្ពុជា។
ទំនិញដែលកម្ពុជានាំចេញទៅកាន់ទីផ្សារសហរដ្ឋអាមេរិកភាគច្រើនផលិតផលវាយនភណ្ឌសម្លៀកបំពាក់ កាបូប ស្បែកជើង កង់ និងផលិតផលសម្រាប់ការធ្វើដំណើរ ខណៈកម្ពុជានាំចូលពីសហរដ្ឋអាមេរិករួមមានរថយន្ត ចំណីសត្វ និងគ្រឿងម៉ាស៊ីន។ ទំហំពាណិជ្ជកម្មទ្វេភាគីរវាងកម្ពុជា-សហរដ្ឋអាមេរិកកាលពីឆ្នាំ២០២០ មានទំហំទឹកប្រាក់ជិត ៧ពាន់លានដុល្លារអាមេរិក កើនឡើងជិត១៨% បើធៀបនឹងឆ្នាំ២០១៩ ដែលមានទំហំទឹកប្រាក់ជិត៦ពាន់លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
