អ្នកជំនាញក្នុងវិស័យកសិកម្មរំពឹងថា តាមរយៈភាពជាដៃគូនេះវានឹងជំរុញការនាំចេញផលិតផលកសិកម្មរបស់កម្ពុជា ទៅកាន់ទីផ្សារបារាំង និងអឺរ៉ុប ក៏ដូចជារួមចំណែកជួយអភិវឌ្ឍន៍វិស័យកសិកម្មឱ្យកាន់តែល្អប្រសើរបន្ថែមទៀត។
អ្នកឧកញ៉ា ហ៊ុន ឡាក់ ប្រធានក្រុមហ៊ុន Tropicam Fruit and Vegetable បានបញ្ជាក់ប្រាប់ខេមបូណូមីសថា ផលិតផលចំណីអាហារ និងកសិផលរបស់កម្ពុជា ជាច្រើនមុខ រួមមានអង្ករ ដំណាប់ស្វាយ គ្រាប់ស្វាយចន្ទីរ ស្ករត្នោត ម្រេច និងត្រីងៀតជាដើម នឹងត្រូវបាននាំចេញទៅកាន់ទីផ្សារបារាំង និងសហភាពអឺរ៉ុបក្នុងពេលឆាប់ៗខាងមុខនេះ។
ការនាំចេញនេះផលិតផលទាំងនេះធ្វើឡើងបន្ទាប់ពីក្រុមហ៊ុនរបស់អ្នកឧកញ៉ា និងក្រុមហ៊ុនរបស់បារាំង Smart Eden បានចុះអនុសារណៈយោគយល់គ្នាលើការលក់-ទិញផលិតផលកសិកម្មរបស់កម្ពុជា ទាំងនេះ សម្រាប់នាំចេញទៅកាន់ទីផ្សារបារាំង និងអឺរ៉ុប កាលពីថ្ងៃទី១៧ ខែតុលា ឆ្នាំ២០២៤ ដែលមានលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មជាសាក្សី។ ក្រៅពីកិច្ចព្រមព្រៀងដែលមានសុពលភាពរយៈពេល៥ឆ្នាំនេះ ក្រុមហ៊ុនរបស់បារាំងនេះ ក៏បានចុះកិច្ចសន្យាលក់-ទិញដាច់ដោយឡែកមួយទៀតដើម្បីនាំចេញកសិផលកម្ពុជា ចំនួន៣មុខ ដូចជាអង្ករ ដំណាប់ស្វាយ និងគ្រាប់ស្វាយចន្ទីកែច្នៃសរុបចំនួន១កុងតឺន័រ ទៅកាន់ទីផ្សារប្រទេសបារាំង ដែលគ្រោងធ្វើឡើងនៅសប្តាហ៍ក្រោយនេះផងដែរ។
អត្ថបទគួរអាន
បើតាមការបញ្ជាក់របស់អ្នកឧកញ៉ា ហ៊ុន ឡាក់ ការចុះកិច្ចព្រមព្រៀងទិញលក់ផលិតផលកសិកម្មកម្ពុជានេះ ធ្វើឡើងក្រោមក្រុមហ៊ុន Smart Eden បានទទួលស្គាល់ និងពេញចិត្តចំពោះគុណភាព និងសុវត្ថិភាពរបស់កសិផលកម្ពុជា និងបានសន្យានឹងជួយជំរុញការផ្សព្វផ្សាយផលិតផលគ្រាប់ស្វាយចន្ទី ដំណាប់ស្វាយ អង្ករ ម្រេច ក៏ដូចជាស្រាបៀរ និងផលិតផលកម្ពុជា ជាច្រើនទៀត ឱ្យបានទូលំទូលាយនៅតាមហាងជាង៦ពាន់កន្លែងនៅក្នុងប្រទេសបារាំង ហើយការវេចខ្ចប់នឹងប្រើប្រាស់ភាសាខ្មែរ និងភាសាបារាំង។
ជាមួយគ្នានេះ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានបង្ហាញនូវការគាំទ្រដល់ក្រុមហ៊ុនទាំងពីរ ដែលបានរៀបចំកិច្ចសហប្រតិបត្តិការធុរកិច្ចថ្មី ដោយចាប់យកការនាំចេញផលិតផលចំណីអាហារ និងកសិផលរបស់កម្ពុជា ទៅកាន់ទីផ្សារប្រទេសបារាំង និងសហគមន៍អឺរ៉ុប។ ទន្ទឹមនឹងនេះ ឯកឧត្តម ក៏បានលើកទឹកចិត្តឱ្យក្រុមហ៊ុនឯកជនពិនិត្យលទ្ធភាពបន្តវិនិយោគលើការកែច្នៃកសិផលផ្សេងៗទៀត ដែលមានសក្ដានុពលក្នុងការនាំចេញ ដើម្បីជំរុញបង្កើតការងារក្នុងស្រុក និងប្រើប្រាស់ឱ្យអស់ពីលទ្ធភាពនូវកសិផលដែលកម្ពុជា ផលិតបានផងដែរ៕
