តើវិស័យកាត់ដេររបស់កម្ពុជានឹងមានការប្រែប្រួល និងជួបប្រឈមបញ្ហាអ្វីខ្លះនៅក្នុងឆ្នាំ២០២៥?

លោក កាំង ម៉ូនីកា អគ្គលេខាធិការរងសមាគមវាយនភណ្ឌសម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានវាយតម្លៃថា ការនាំចេញផលិតផលវាយនភណ្ឌកាត់ដេររបស់កម្ពុជានៅក្នុងឆ្នាំ២០២៤ កន្លងទៅ សម្រេចបានលទ្ធផលល្អប្រសើរគួរឱ្យកត់សម្គាល់ ហើយវានឹងបន្តមានភាពល្អប្រសើរថែមទៀតនៅក្នុងឆ្នាំ២០២៥ នេះ។ ការរំពឹងបែបនេះ ក៏ដោយសារលោកមើលឃើញពីភាពខ្លាំងនៃកត្តាខាងក្នុងរបស់កម្ពុជា គួបផ្សំភាពអំណោយផលមួយចំនួនពីកត្តាខាងក្រៅពាក់ព័ន្ធនឹងទីផ្សារ និងការប្រកួតប្រជែង។ យ៉ាងណាក៏ដោយ លោក វាយតម្លៃថា វិស័យកាត់ដេររបស់កម្ពុជា នៅតែបន្តប្រឈមនឹងបញ្ហាមួយចំនួនដូចជាថ្លៃដើមផលិត តម្លៃអគ្គិសនី និងតម្លៃដឹកជញ្ជូនមានកម្រិតខ្ពស់ជាដើម។

​មិនខុសគ្នានោះទេ លោក ហ្វា សាលី ប្រធានសម្ព័ន្ធសហជីពជាតិ ជឿជាក់ថា ការនាំចេញផលិតផលកាត់ដេររបស់កម្ពុជា ទៅកាន់ទីផ្សារអន្តរជាតិ នៅក្នុងឆ្នាំ២០២៥នេះ នឹងមានការកើនឡើងបន្ថែមទៀត ដ្បិតថា មកទល់ពេលនេះ មានការបញ្ជាទិញជាហូរហែររួចទៅហើយ។ ការរក្សាបាននូវភាពល្អប្រសើរនៃការនាំចេញផលិតផលកាត់ដេរកម្ពុជានេះត្រូវបានលោក ហ្វា សាលី អះអាងថា ក៏ដោយសារតែកម្ពុជា មានសុខសន្តិភាព មានធនធានគ្រប់គ្រាន់ ដែលធ្វើឱ្យវិនិយោគិនមានទំនុកចិត្តខ្ពស់ក្នុងការបញ្ជាទិញ ស្របពេលដែលប្រទេសមួយចំនួនកំពុងជួបបញ្ហាចលាចល។

​គួរជម្រាបថា នៅក្នុងរយៈពេល១១ខែ ឆ្នាំ២០២៤ ការនាំចេញសម្លៀកបំពាក់ សម្រេចបានជិត៩ពាន់លានដុល្លារកើនឡើងជាង២៥%, ការនាំចេញសម្ភារធ្វើដំណើរសម្រេចបានជាង១ពាន់៧រយលានដុល្លារកើនឡើងជាង២១% និងការនាំចេញស្បែកជើងសម្រេចបានជាង១ពាន់៥រយលានដុល្លារកើនឡើងជាង២៤% បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់ក្រសួងពាណិជ្ជកម្មកម្ពុជា៕