បើតាមឯកឧត្តម វេង សាខុន គិតត្រឹមថ្ងៃទី៨ ខែមិថុនា ឆ្នាំ២០២២ ល្បឿនការងារបង្កបង្កើនផលដំណាំស្រូវរដូវវស្សាទើបអនុវត្តបានតែប្រមាណ៣០ភាគរយប៉ុណ្ណោះ នៃផែនការប្រចាំឆ្នាំ។ ប្រសិនបើការងារបង្កបង្កើនផលដំណាំស្រូវរដូវវស្សាឆ្នាំ២០២២នេះមានភាពយឺតយ៉ាវ តើវាអាចបង្កជាបញ្ហាប្រឈមសម្រាប់ការនាំចេញអង្ករកម្ពុជាទៅកាន់ទីផ្សារអន្តរជាតិដែរឬទេ?
យោងតាមរបាយការណ៍ស្ដីពីការជំរុញផលិតកម្មដំណាំស្រូវរដូវវស្សាឆ្នាំ២០២២ នៅថ្ងៃទី១០ មិថុនា បានបង្ហាញថា នៅឆ្នាំ២០២២នេះ ការងារបង្កបង្កើនផលដំណាំស្រូវរដូវវស្សា ហាក់មានភាពយឺតយ៉ាវជាងឆ្នាំមុន ដោយសារតែបរិមាណទឹកភ្លៀងច្រើនជាងឆ្នាំមុន និងដំណើរការនៃការធ្លាក់ភ្លៀងលឿនជាងឆ្នាំមុនផងដែរ។ ជាក់ស្ដែង គិតត្រឹមថ្ងៃទី៨ ខែមិថុនា ឆ្នាំ២០២២ ល្បឿនការងារបង្កបង្កើនផលដំណាំស្រូវរដូវវស្សាអនុវត្តបានប្រមាណ៧៦ម៉ឺនហិកតា ស្មើនឹង៣០ភាគរយ នៃផែនការ ២លានហិកតា។ ជាមួយគ្នានេះ ក្រសួងកសិកម្មបានបង្ហាញការព្រួយបារម្ភថាបញ្ហានេះ អាចធ្វើឱ្យប៉ះពាល់ដល់ផែនការផលិតកម្មប្រចាំឆ្នាំ ហើយអាចនឹងឈានដល់ការប៉ះពាល់សន្តិសុខស្បៀង និងគោលនយោបាយរបស់រាជរដ្ឋាភិបាលក្នុងការ ជំរុញផលិតកម្មដំណាំស្រូវ និងការនាំចេញអង្ករ ផងដែរ។
ជុំវិញបញ្ហានេះ លោក លន់ យ៉េង អគ្គលេខាធិការសហព័ន្ធស្រូវ-អង្ករកម្ពុជា យល់ឃើញថា វាផលប៉ះពាល់ចំពោះការបង្កបង្កើនផលស្រូវដើមវស្សាឆ្នាំនេះ នឹងមិនបង្កផលប៉ះពាល់ខ្លាំងនោះទេដល់សន្តិសុខស្បៀង និងដំណើរការនៃការនាំចេញអង្ករទៅកាន់ទីផ្សារអន្តរជាតិនោះទេ ដោយលោកបានអះអាងថា ការនាំចេញអង្ករកម្ពុជា នាពេលកន្លងមក ភាគច្រើនជាស្រូវវដូវប្រាំង ខណៈស្រូវវដូវវស្សាមានចំនួនតិចតួចប៉ុណ្ណោះ។
អត្ថបទគួរអាន
បើតាមលោក លន់ យ៉េង បច្ចុប្បន្ន កសិករមួយចំនួនធំ បានប្ដូរពីការធ្វើស្រូវរដូវវស្សាមកធ្វើស្រូវវដូវប្រាំងវិញ ដូច្នេះ បើទោះជាដំណើរការផលិតកម្មស្រូវវស្សាឆ្នាំនេះ ជួបបញ្ហាប្រឈមមួយចំនួនក៏ដោយ ក៏មិនប៉ះពាល់ខ្លាំងដល់ការនាំចេញអង្ករ ទៅកាន់ទីផ្សារអន្តរជាតិ នោះដែរ ក៏ប៉ុន្តែបញ្ហានេះអាចនឹងប៉ះពាល់ដល់ការនាំចេញស្រូវទៅប្រទេសវៀតណាម តិចតួចដែរ។
គួរបញ្ជាក់ថា បើតាមរបាយការណ៍របស់សហព័ន្ធស្រូវអង្ករកម្ពុជានៅ៥ខែឆ្នាំ២០២២ កម្ពុជាសម្រេចបានការនាំចេញអង្ករទៅកាន់ទីផ្សារអន្តរជាតិសរុបជាង ២៨ម៉ឺន៣ពាន់តោន កើនឡើងជិត២២% បើធៀបនឹងរយៈពេលដូចគ្នាកាលពីឆ្នាំមុន។ ដោយឡែកនៅពេញមួយខែឧសភា កម្ពុជានាំចេញអង្ករសម្រេចបានជិត ៦ម៉ឺន៣ពាន់តោនកើនឡើងជាង៥៤% បើធៀបនឹងខែឧសភា កាលពីឆ្នាំ២០២១។ ជាមួយគ្នានេះ សហព័ន្ធស្រូវអង្ករកម្ពុជារំពឹងថា នៅឆ្នាំ២០២២ នេះ កម្ពុជានឹងអាចនាំចេញអង្ករសម្រេចបានចន្លោះពី៧៥ម៉ឺនទៅ៨០ម៉ឺនតោន៕
None
