កត្តាអ្វីខ្លះជំរុញឲ្យទុរេនវៀតណាមកំពុងធ្លាក់ថ្លៃខ្លាំងនៅរយៈពេលប៉ុន្មានខែចុងក្រោយនេះ?

តាមប្រភពពីអ្នកលក់ទុរេន ដែលបានបញ្ជាក់នៅក្នុងសារព័ត៌មាន VN Express បានឲ្យដឹងថា តម្លៃទុរេនធ្លាក់ចុះ ដោយសារតែអ្នកទិញជនជាតិចិន បានកាត់បន្ថយការបញ្ជាទិញរបស់ពួកគេ។

បច្ចុប្បន្ន ទុរេនវៀតណាមកំពុងដល់រដូវប្រមូលច្រើន ដែលកសិករខ្លះប្រមូលផលរាប់រយតោននៅក្នុងមួយថ្ងៃៗ ប៉ុន្ដែ អ្នកទិញជនជាតិចិន មិនសូវប្រមូលទិញទុរេនពីវៀតណាមច្រើននោះទេ ដោយសារតែ ទុរេននៅថៃ និងហ្វីលីពីន ក៏ចាប់ផ្ដើមទុំសម្រាប់ការប្រមូលផលដែរ។

ប្រទេសថៃ បាននាំចេញទុរេនទៅកាន់ប្រទេសចិនក្នុងចំនួនដ៏ច្រើនរួចទៅហើយនាពេលកន្លងមកនេះ ខណៈដែលហ្វីលីពីនវិញ ទើបតែទទួលបានសិទ្ធិនាំចេញទុរេនទៅកាន់ប្រទេសចិនដែរ កាលពីដើមឆ្នាំនេះ។

ទន្ទឹមនឹងការនាំចូលទុរេនពីក្រៅប្រទេស ប្រទេសចិនបច្ចុប្បន្ន ក៏កំពុងមានការដាំដុះទុរេនក្នុងស្រុកកាន់តែច្រើនដែរ។

ដោយឡែក ប្រទេសឡាវក្បែរខាងវៀតណាមឯណោះវិញ ក៏បានបែងចែកផ្ទៃដីកសិកម្មប្រមាណ៣ម៉ឺនហិកតា សម្រាប់ការដាំដុះទុរេនដែរ ពិសេសសម្រាប់ផ្គត់ផ្គង់ទីផ្សារចិន ពោលគឺមានប្រមាណ ២៧% នៃផ្ទៃដីដាំដុះទុរេនសរុបរបស់វៀតណាម។

វៀតណាមមានការនាំចេញទុរេនយ៉ាងឆាប់រហ័សទៅកាន់ប្រទេសចិន ក្នុងចំណោមផ្លែឈើផ្សេងទៀត ដោយនៅ២ខែដំបូងឆ្នាំនេះ វៀតណាមនាំចេញទុរេនទៅចិនមានតម្លៃប្រមាណ៥៧លានដុល្លារ កើនឡើងជាង២៩០%ឯណោះ។

ប្រទេសវៀតណាមមានផ្ទៃដីដាំទុរេន ១១ម៉ឺនហិកតា គិតត្រឹមចុងឆ្នាំមុន បន្ទាប់ពីប្រទេសនេះ ទទួលបានការនាំចេញផ្លែឈើជាផ្លូវការទៅកាន់ទីផ្សារចិន ហើយចំនួនផ្ទៃដីនេះ គឺមានលើផែនការរបស់រដ្ឋាភិបាលដល់ទៅ ៤៧%ឯណោះ។

ក្រុមអ្នកជំនាញកសិកម្មនៅវៀតណាម នាពេលកន្លងមក ក៏បានព្រមានពីការធ្លាក់ចុះតម្លៃទុរេនវៀតណាមផងដែរ ដ្បិតកសិករនាំគ្នាបោះបង់ចោលដំណាំផ្សេង ងាកទៅដាំទុរេនជំនួសវិញ ដោយសារតែមើលឃើញពីតម្លៃទុរេនមានខ្ពស់កាលពីពេលកន្លងទៅ និងមានអ្នកខ្លះបានកែប្រែដីធ្លាប់ធ្វើស្រែស្រូវ ដើម្បីយកទៅដាំទុរេនក៏មាន។ អ្នកជំនាញថា ការប្រើប្រាស់ដីដាំដុះទុរេនមិនបានសមស្របតាមស្ដង់ដារ កសិករប្រឈមនឹងការខាតបង់ ដ្បិតទិន្នផលអាចមិនដូចទៅនឹងអ្វីដែលបានរំពឹងទុក៕