លម៉ើជាដំណាំមួយប្រភេទ ដែលទើបតែបានដាំដុះនៅកម្ពុជានាប៉ុន្មានឆ្នាំចុងក្រោយនេះប៉ុណ្ណោះ ហើយបច្ចុប្បន្ន ដំណាំហូបផ្លែមួយនេះ កំពុងមានការចាប់អារម្មណ៍ច្រើនគួរឲ្យកត់សម្គាល់ ដោយក្នុងនោះ គេឃើញមានការដាំដុះជាចម្ការធំៗផងដែរ។
លោក សាន សុខន ម្ចាស់ចម្ការយ៉ាដា នៅស្រុកសំពៅលូនខេត្តបាត់ដំបូង កំពុងកាប់កបជាមួយនឹងរបរដាំលម៉ើនេះ។ ម្ចាស់ចម្ការរូបនេះ អះអាងថា លម៉ើ ជាប្រភេទដំណាំហូបផ្លែ ដែលមានអាយុកាលរស់វែង ហើយផ្លែរបស់វាមានតម្លៃខ្ពស់រហូតដល់ ១៥ដុល្លារអាមេរិកក្នុង១គីឡូក្រាម ដែលទិន្នផលលម៉ើដែលបានដាំលើផ្ទៃដី១ហិកតា ក្នុងមួយឆ្នាំ លោកអាចរកប្រាក់ចំណូលបានរាប់ម៉ឺនដុល្លារឯណោះ។
លោក សាន សុខន រៀបរាប់ទៀតថា នៅឆ្នាំនេះ ផ្តល់ទិន្នផលចម្ការលម៉ើរបស់លោកនៅឆ្នាំនេះ បានកើនឡើងទ្វេដង បើធៀបនឹងឆ្នាំនេះ ដោយរំពឹងថា នឹងអាចប្រមូលផលបានចន្លោះពី៧ទៅ៨តោន។ ។ ប៉ុន្តែ លោករអ៊ូរទាំថា តម្លៃលម៉ើនៅឆ្នាំនេះហាក់មិនសូវល្អដូចឆ្នាំមុននោះទេ ក្រោយមានការនាំចូលលម៉ើច្រើនពីប្រទេសថៃ ដែលធ្វើតម្លៃល្ម៉ើនៅកម្ពុជាឡើងចុះៗមិនទៀង។ លោកអះអាងថា កាលពីឆ្នាំមុនល្ម៉ើក្នុង១គីឡូក្រាមលក់ចេញក្នុងតម្លៃ១៥ដុល្លារអាមេរិកថេរ តែឆ្នាំនេះលក់បានចន្លោះពី១២ដុល្លារដល់១៥ដុល្លារតែប៉ុណ្ណោះ។
ពាក់ព័ន្ធបញ្ហាទីផ្សារ ម្ចាស់ចម្ការយ៉ាដារូបនេះបានបញ្ជាក់ថា ទីផ្សារល្ម៉ើបច្ចុប្បន្នមិនចោទជាបញ្ហានោះទេ ពោលគឺមានការបញ្ជាទិញពីឈ្មួញជាហូរហែ និងអ្នកខ្លះមកទិញដល់ចម្ការតែម្តង។ លម៉ើរបស់លោក សាន សុខន ភាគច្រើនលក់បោះដុំនៅតាមផ្សារទំនើប ដូចជាផ្សារម៉ាក្រូ និងផ្សារទំនើបអ៊ីអនជាដើម ហើយក៏មានលក់រាយផងដែរ។
ម្ចាស់ចម្ការមានបទពិសោធន៍ដាំដំណាំលម៉ើប្រមាណ៥ឆ្នាំរូបនេះ អះអាងទៀតថា ជាមួយនឹងទិន្នផលប្រហែល៨តោន នៃផ្ទៃដីដាំដុះ១ហិកតានៅឆ្នាំនេះ លោករំពឹងថានឹងអាចទទួលបានប្រាក់ចំណេញពីរបរនេះពី ៤ម៉ឺនដុល្លារទៅ ៥ម៉ឺនដុល្លារអាមេរិក ក្រោយទូទាត់ការចំណាយរួច។ បើតាមលោក សុខន ល្ម៉ើ១ដើមអាចផ្តល់ទិន្នផលចន្លោះពី១៥ទៅ២៥គីឡូក្រាមទៅតាមទំហំ និងការលូតលាស់របស់ដើមនីមួយៗ។
អត្ថបទគួរអាន
ទោះបីដំណាំល្ម៉ើអាចផ្តល់ប្រាក់ចំណេញខ្ពស់ក៏ពិតមែន ប៉ុន្តែយើងសង្កេតថា ដំណាំប្រភេទដើមមួយនេះមិនសូវសម្បូរកសិករដាំនោះទេដ្បិតវាត្រូវចំណាយដើមទុនច្រើន។ បើតាមលោក សាន សុខន ការដាំល្ម៉ើមួយហិកតាអាចចំណាយថវិកាជាង២ម៉ឺនដុល្លារអាមេរិក ប្រសិនបើជាលម៉ើប្រភេទជាលិកា។ តែយ៉ាងណាលោកអះអាងថា ល្ម៉ើជាដំណាំមួយប្រភេទងាយស្រួលដាំ និងងាយរស់ឲ្យតែការពារកុំឲ្យដួងស៊ីបានល្អ។ ប៉ុន្តែលោកសង្កត់ធ្ងន់ថា ប្រសិនបើចង់ឲ្យការដាំទទួលបានទិន្នផលខ្ពស់និងផ្លែល្អត្រូវទាមទារបច្ចេកថែទាំ និងមើលថែឲ្យបានដិតដល់។
ក្រោយទទួលបានជោគជ័យលើការដាំល្ម៉ើជាង១ហិកតា លោក សាន សុខន គ្រោងពង្រីកការដាំល្ម៉ើឲ្យបាន៣ហិកតានៅឆ្នាំនេះ និងឲ្យបាន៦ហិកតានៅថ្ងៃអនាគត។ ដំណាំល្ម៉ើអាចហុចផលនៅពីរឆ្នាំបន្ទាប់ក្រោយការដាំ។ បន្ទាប់វានឹងផ្តល់ផលជារៀងរាល់ឆ្នាំ ហើយទិន្នផលរបស់វានឹងកើនឡើងជារៀងរាល់ឆ្នាំ ប្រសិនបើថែទាំបានល្អ។
ជុំវិញទៅនឹងដំណាំលម៉ើនេះដែរ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអះអាងប្រាប់ខេមបូណូមីសថា ប្រជាកសិករដែលចង់ដាំដំណាំនេះ ត្រូវមានការសិក្សាប្រភេទពូជឲ្យបានត្រឹមត្រូវ ព្រោះលម៉ើមានពូជផ្សេងៗគ្នារាប់រយ ហើយមិនមែនសុទ្ធតែអាចដាំបានផលនោះទេ។
ដូច្នេះ ដើម្បីអាចដាំលម៉ើនេះបានផលនៅកម្ពុជា ចាំបាច់ត្រូវជ្រើរើសពូជណាដែលមានការពិសោធន៍ត្រឹមត្រូវ ហើយត្រូវដាំទៅតាមបច្ចេកទេសទើបបានផល៕
None
