អ្នកជំនាញសេដ្ឋកិច្ចយល់ឃើញថា ការចាកចេញពីឋានៈប្រទេសមានការអភិវឌ្ឍតិចតួច វាសបញ្ជាក់ឱ្យឃើញពីភាពរីកចម្រើននៃសេដ្ឋកិច្ចកម្ពុជា និងជួយឱ្យកម្ពុជា មានការការប្រកួតប្រជែងស្មើមុខស្មើមាត់នៅលើឆាកអន្តរជាតិ។ ប៉ុន្តែវាអាចធ្វើឱ្យកម្ពុជាបាត់បង់អត្ថប្រយោជន៍ និងប្រព័ន្ធអនុគ្រោះមួយចំនួន។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិននៃរាជបណ្ឌិតសភាកម្ពុជា យល់ឃើញថា ការចាកចេញពីប្រទេសមានការអភិវឌ្ឍតិចតួចរបស់កម្ពុជា អាចផ្ដល់ទាំងផលវិជ្ជមាន និងផលអវិជ្ជមាន សម្រាប់សេដ្ឋកិច្ចកម្ពុជា។
ផលវិជ្ជមាន គឺវាជួយលើកកម្ពស់ការប្រកួតប្រជែងរបស់កម្ពុជាឱ្យស្មើមុខស្មើមាត់នៅលើឆាកអន្តរជាតិ ជួយឱ្យកម្ពុជាកាន់តែមានភាពឯករាជ្យ និងម្ចាស់ការលើខ្លួនឯង និងបានបង្ហាញពីភាពរិកចម្រើនរបស់កម្ពុជា។ ផលអវិជ្ជមាន គឺអាចធ្វើឲ្យកម្ពុជាអាចបាត់បង់នូវអត្ថប្រយោជន៍ និងការអនុគ្រោះពន្ធមួយចំនួនពីប្រទេសដៃគូពាណិជ្ជកម្ម។
តែយ៉ាងណាអ្នកជំនាញរូបនេះអះអាងថា បញ្ហានេះទំនងជាមិនធ្វើឱ្យប៉ះពាល់ដល់សេដ្ឋកិច្ច ការធ្វើពាណិជ្ជកម្ម និងការវិនិយោគនៅកម្ពុជានោះឡើយ។
អត្ថបទគួរអាន
ជាមួយគ្នានេះ ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានគូសបញ្ជាក់ថា រាជរដ្ឋាភិបាលដែលដឹកនាំដោយសម្ដេចធិបតី ហ៊ុន ម៉ាណែត បានត្រៀមខ្លួនជាស្រេចក្នុងការប្រែក្លាយកម្ពុជា ទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០។
បើតាមអ្នកនាំពាក្យរូបនេះ រាជរដ្ឋាភិបាលអាណត្តិទី៧នេះ គឺជារាជរដ្ឋាភិបាលដែលមានចក្ខុវិស័យច្បាស់លាស់ និងភាពប្រាកដនិយម ដែលផ្ដោតសំខាន់ទៅលើលទ្ធផល។ ជាក់ស្តែងទោះបីរដ្ឋាភិបាលថ្មីទើបចាប់បដិសន្ធិបានជាង៥ខែ តែរដ្ឋាភិបាលក្រោមការដឹកនាំរបស់សម្តេចធិបតី សម្រេចបានលទ្ធផលផ្លែផ្កាគួរឱ្យកត់សម្គាល់។ តាមរយៈលទ្ធផលទាំងនោះ ធ្វើឱ្យឯកឧត្តមជឿជាក់ថា រាជរដ្ឋាភិបាលអាណត្តិទី៧ នឹងសម្រេចចក្ខុវិស័យរបស់ខ្លួននៅឆ្នាំ២០៣០ និង២០៥០។
គួរបញ្ជាក់ថា បច្ចុប្បន្ន កម្ពុជាស្ថិតក្នុងឋានៈជាប្រទេសមានចំណូលមធ្យមកម្រិតទាប ហើយក្នុងឋានៈនេះ កម្ពុជាអាចមានសិទ្ធិខ្ចីប្រាក់ពីសមាគមអភិវឌ្ឍន៍អន្តរជាតិ(IDA) ដែលជាមូលនិធិរបស់ក្រុមធនាគារពិភពលោក សម្រាប់ប្រជាជាតិក្រីក្របំផុត។
ទោះបីការចាកចេញពីប្រទេសមានការអភិវឌ្ឍន៍តិចតួចវាស្របនឹងគោលនយោបាយរាជរដ្ឋាភិបាលក្នុងការនាំកម្ពុជាឱ្យឈានដល់ប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០ក៏ពិតមែន ប៉ុន្តែកន្លងមក រាជរដ្ឋាភិបាលកម្ពុជា ក៏បានបង្ហាញនូវការព្រួយបារម្ភចំពោះបញ្ហានេះក្នុងការធ្វើឱ្យកម្ពុជាបាត់បង់ការទទួលបានអត្រាការប្រាក់អនុគ្រោះពីប្រទេសរីកចម្រើនមួយចំនួនផងដែរ៕
None
