ត្រូវបានស្រង់សម្ដីដោយសារព័ត៌មានរ៉យទ័រ មន្ត្រីការិយាល័យគ្រប់គ្រង និងថវិការបស់សេតវិមានអាមេរិក បានអះអាងថា នៅក្នុងការសន្ទនាជាមួយនឹងសមាជិកសភាអាមេរិកនាពេលថ្មីៗនេះ រដ្ឋបាលចូបៃឌិនបានកំណត់ពីតម្រូវការសម្រាប់ជំនួយមនុស្សធម៌ សន្ដិសុខ និងសេដ្ឋកិច្ចបន្ថែមរបស់អាមេរិក ទៅកាន់ប្រទេសអ៊ុយក្រែន និងដៃគូផ្សេងទៀតនៅក្នុងអឺរ៉ុបកណ្ដាល ដោយសារតែមានការឈ្លានពានដោយមិនញញើត និងអយុត្តិធម៌ពីសំណាក់ប្រទេសរុស្ស៊ី។ នៅក្នុងសំណើថវិកានោះ រួមមានជិត៣ពាន់លានដុល្លារ គឺនឹងត្រូវផ្ដល់ជូនសម្រាប់ជំនួយដល់ផ្នែកសន្ដិសុខ និងមនុស្សធម៌ និង៣,៥ពាន់លានដុល្លារទៀតសម្រាប់ក្រសួងការពារជាតិ។
ជំនួយការសភាអាមេរិក បាននិយាយថា រដ្ឋបាលលោកចូបៃឌិន បានធ្វើសំណើនេះ កាលពីថ្ងៃសុក្រសប្ដាហ៍នេះ ហើយសភាដែលត្រូវបានគ្រប់គ្រងដោយគណបក្សប្រជាធិបតេយ្យរបស់លោកបៃឌិន នឹងពិចារណាថវិកាជិត៣ពាន់លានដុល្លារ ទៅក្នុងមូលនិធិសម្រាប់ក្រសួងការពារជាតិ និងអង្គការ USAID ដែលជាសំណើថវិកាបន្ទាន់។ ជាមួយនឹងការផ្ដល់មូលនិធិដល់មន្ទីរបញ្ចកោណវិញ នឹងត្រូវពិចារណានៅពេលក្រោយទៀត។
អត្ថបទទាក់ទង!
សូមបញ្ជាក់ថា បច្ចុប្បន្នសង្គ្រាមនៅអ៊ុយក្រែន នៅតែបន្ដឆេះក្ដៅងំ ដោយការវាយប្រហារឈ្លានពានពីសំណាក់កងទ័ពរុស្ស៊ី ទៅលើអ៊ុយក្រែន កំពុងចូលដល់ទីក្រុងកៀវ រដ្ឋធានីអ៊ុយក្រែនហើយ។ ទោះបីជា ប្រទេសខាងលិចបន្តដាក់សម្ពាធកាន់តែខ្លាំងឡើងៗទៅលើរុស្ស៊ីក្ដីប៉ុន្ដែ រុស្ស៊ីហាក់មិនអើពើ ឬផ្អាកសង្គ្រាមទៅតាមការព្រមានពីលោកខាងលិចនោះដែរ ពោលគឺ រុស្ស៊ីនៅបន្ដរុលចូលទៅមុខ ក្នុងរដ្ឋធានីអ៊ុយក្រែន ដើម្បីវាយផ្ដួលរំលំរដ្ឋាភិបាលបច្ចុប្បន្នរបស់ប្រទេសនេះ ស្របពេលដែលប្រធានាធិបតីអ៊ុយក្រែន លោក ហ្សេលេនស្គី វិញ ក៏បានបង្ហាញតាំងចិនមិនរត់ចោលប្រទេស រត់ចោលប្រជាជនរបស់ខ្លួននោះដែរ ពោលគឺនៅតែបន្ដវាយតបតជាមួយរុស្ស៊ីរហូតដល់តំណក់ឈាមចុងក្រោយ បើទោះបីជា លោកខាងលិចមិនបានជួយខ្លួន ក្នុងការវាយតបតជាមួយរុស្ស៊ីនៅក្នុងសង្គ្រាមនេះក៏ដោយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
