អំឡុងពេលវិបត្តិហិរញ្ញវត្ថុ ក្រុមហ៊ុនអភិវឌ្ឍអចលនទ្រព្យចិន Evergrande ដែលជាក្រុមហ៊ុនមានបំណុលវណ្ឌក ដល់ទៅជាង ៣០០ពាន់លានដុល្លារអាមេរិក មិនដែលបង្ហាញឲ្យជាក់ច្បាស់ម្តងណានោះទេ ថា គម្រោងអចលនទ្រព្យទាំងជាង១.៣០០ គម្រោងរបស់ខ្លួននៅទូទាំងប្រទេសចិន មានគម្រោងប៉ុន្មានដែលបានផ្អាក និង ប៉ុន្មានទៀតដែលបន្តការសាងសង់។
កន្លងមកក្រុមហ៊ុននេះ គ្រាន់តែបានប្រកាសថា គម្រោងមួយចំនួនបានផ្អាកការសាងសង់ ដោយសារតែការទូទាត់ប្រាក់យឺតយ៉ាវដល់អ្នកផ្គត់ផ្គង់សម្ភារៈសំណង់តែប៉ុណ្ណោះ។
យ៉ាងណាមិញ នៅថ្ងៃអាទិត្យ ក្រុមហ៊ុនបានប្រកាសនៅលើគណនី WeChat របស់ខ្លួនថា គម្រោងមួយចំនួនបានចាប់ផ្តើមដំណើរការឡើងវិញហើយ ដោយបានឈានចូលដល់ដំណាក់កាលតុបតែងផ្នែកខាងក្នុងនៃសំណង់ ខណៈដែលអគារផ្សេងទៀតទើបតែបញ្ចប់ការសាងសង់នាពេលថ្មីៗនេះ។អត្ថបទគួរអាន
Evergrande បានបន្ថែមថា កិច្ចខិតខំប្រឹងប្រែងរបស់ខ្លួនក្នុងការធានាឲ្យបាននូវការសាងសង់នឹងឈានទៅបង្កើនទំនុកចិត្តទីផ្សារឡើងវិញផងដែរ។ គួរជម្រាបថា ក្រុមហ៊ុនអភិវឌ្ឍន៍អចលនទ្រព្យធំជាងគេទីពីររបស់ប្រទេសចិនកាលពីខែមុន ក៏បានសន្យាដល់អតិថិជនរបស់ខ្លួនថា នឹងបញ្ចប់ការសាងសង់ផ្ទះរបស់ពួកគេឲ្យបានឆាប់ៗ ហើយព្រមទាំងបានអះអាងថា ការងារសាងសង់កីឡដ្ឋានបាល់ទាត់ដ៏ធំបំផុតមួយក្នុង ភាគខាងត្បូងនៃទីក្រុងក្វាងចូវ កំពុងដំណើរការដូចការគ្រោងទុក។
សូមជម្រាបថា ទន្ទឹមនឹងការចាប់ផ្តើមសាងសង់គម្រោងនានារបស់ខ្លួនឡើងវិញ Evergrande ក៏កំពុងព្យាយាមបង្វិលប្រាក់ដើម្បីសងការប្រាក់ និងបណ្ឌបំណុលរបស់ខ្លួនសម្រាប់ម្ចាស់បំណុលទាំងក្នុងនិងក្រៅប្រទេស ដែលដល់ថ្ងៃកំណត់ជាបន្តបន្ទាប់ផងដែរ។ វិបត្តិបំណុលរបស់ក្រុមហ៊ុននេះ កំពុងត្រូវបានឃ្លាំមើលយ៉ាងយកចិត្តទុកដាក់ ដោយក្រុមអ្នកជំនាញទីផ្សារហិរញ្ញវត្ថុពិភពលោក៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
