អ្នកជំនាញព្យាករថា វិស័យអចលនទ្រព្យកម្ពុជា នឹងអាចងើបពីសន្លប់នៅឆ្នាំ២០២៤ ខាងមុខ

ឧកញ៉ា ចេង ខេង អគ្គនាយកក្រុមហ៊ុនអលនទ្រព្យ CPL យល់ឃើញថា វិស័យអចលនកម្ពុជានឹងអាចមានភាពល្អប្រសើរឡើងវិញនាពេលឆាប់ៗខាងមុខ បន្ទាប់ពីទំនាក់ទំនងរវាងរាជរដ្ឋាភិបាលកម្ពុជា ក្រោមការដឹកនាំរបស់សម្ដេចធិបតី ហ៊ុន ម៉ាណែត ជាមួយរដ្ឋាភិបាលចិន កាន់តែមានកិច្ចសហប្រតិបត្តិការកាន់តែល្អ និងរឹងមាំ។ អ្នកជំនាញរូបនេះជឿជាក់ថា វិស័យអចលនវត្ថុកម្ពុជានឹងកាន់តែល្អប្រសើរ ប្រសិនបើកំណើនសេដ្ឋកិច្ចចិនមានសន្ទុះងើបឡើងវិញលឿន ព្រោះវិនិយោគគិនចិនឈរលំដាប់ទី១លើការវិនិយោគក្នុងវិស័យអចលនទ្រព្យនៅកម្ពុជា បើធៀបនឹងអ្នកវិនិយោគបរទេសផ្សេងៗ។

ទន្ទឹមនឹងនេះ ឧកញ៉ា ចេង ខេង បានបង្ហាញសុទិដ្ឋិនិយមខ្ពស់ចំពោះគម្រោងវិនិយោគខ្សែក្រវាត់ និងផ្លូវដែលចិនទើបចាក់បញ្ចូលមូលនិធិបន្ថែម១០០ពាន់លានដុល្លារ ក្នុងការជួយអភិវឌ្ឍន៍ប្រទេសកម្ពុជា និងបណ្តាប្រទេសក្នុងតំបន់អាស៊ានឱ្យកាន់តែមានភាពរីកចម្រើន។ ហើយចង់ ឬមិនចង់តាមរយៈគម្រោងខ្សែក្រវាត់ និងផ្លូវ វានឹងជួយលើកមុខមាត់ និងជួយអភិវឌ្ឍន៍ប្រទេសក្នុងតំបន់អាស៊ានឲ្យមានការរីកចម្រើនដូចបណ្ដាប្រទេសនៅតំបន់អឺរ៉ុប។ នេះជាការបង្ហាញក្តីរំពឹងរបស់អ្នកជំនាញអចលនទ្រព្យចាស់វស្សារូបនេះ ដែលបានព្យាករថា តាមរយៈគម្រោងអភិវឌ្ឍន៍ផ្លូវដែក ផ្លូវល្បឿនលឿន និងព្រលានយន្តហោះជាដើម វានឹងជួយស្រូបទាញវិនិយោគិនចិនឱ្យមកសិក្សាឱកាសវិនិយោគ និងបោះទុនវិនិយោគលើវិស័យសក្ដានុពលដែលមានស្រាប់ និងវិស័យផ្សេងៗនៅកម្ពុជាឱ្យកាន់តែច្រើនបន្ថែមទៀត។

​

សូមរំលឹកថា នៅក្នុងជំនួបរវាងសម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ជាមួយលោក ស៊ីជិនពីង ប្រធានាធិបតីនៃសាធារណរដ្ឋប្រជាមានិតចិន ក្រោយវេទិកាខ្សែក្រវាត់ និងផ្លូវ នៅទីក្រុងប៉េកាំង កាលពីសប្ដាហ៍មុន ថ្នាក់ដឹកនាំនៃប្រទេសទាំងពីរបានប្ដេជ្ញាយកឆ្នាំ២០២៤ ជាឆ្នាំនៃការផ្លាស់ប្ដូរផ្នែកសេដ្ឋកិច្ច ពាណិជ្ជកម្ម និងវិនិយោគ និងទេសចរណ៍រវាងកម្ពុជា-ចិន។

គិតចាប់ពីខែមករា ដល់ខែកញ្ញា ឆ្នាំ២០២៣ ទំហំពាណិជ្ជកម្មរវាងកម្ពុជា-ចិន មានទឹកប្រាក់រហូតដល់​១ពាន់លានដុល្លារ កើនឡើងជាង៣% បើធៀបនឹងរយៈពេលដូចគ្នាកាលពីឆ្នាំ២០២២។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា៕

អត្ថបទ៖ បូ ដូឡា​