ក្នុងជំនួបសម្តែងការគួរសម ជាមួយ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ឧកញ៉ា ចាន់ សុឃាំង ប្រធានសហព័ន្ធស្រូវ អង្ករកម្ពុជា បានរាយការណ៍ជូន ឯកឧត្តមរដ្ឋមន្រ្តី នូវផែនការសកម្មភាពរបស់សហព័ន្ធស្រូវ អង្ករកម្ពុជាសម្រាប់អាណត្តិទី៤ សំដៅជំរុញផលិតកម្មស្រូវ និងនាំចេញអង្ករ ដោយកំណត់យកគោលដៅនាំចេញអង្ករចំនួន ៧៥ម៉ឺនតោនក្នុងឆ្នាំ២០២៣ និងឈានដល់១លានតោនក្នុងឆ្នាំ២០២៥។ ឧកញ៉ា ចាន់ សុខឃាំងបានបន្ថែមថា សហព័ន្ធមានផែនការបន្តសហការជាមួយក្រសួងពាណិជ្ជកម្ម ក្នុងការពង្រីកទីផ្សារទៅកាន់ប្រទេសចិនឱ្យបានច្រើនជាង ៤០ម៉ឺនតោននៅក្នុងឆ្នាំ២០២៣ នេះតទៅ។ ពិសេសបន្តធ្វើពិពិធកម្មទៅកាន់ទីផ្សារឱ្យបានកាន់តែទូលំទូលាយ ទៅកាន់ទីផ្សារថ្មីៗបន្ថែមទៀត រួមមាន៖ សហរដ្ឋអាមេរិក កាណាដា មជ្ឈឹមបូព៌ា សិង្ហបុរី ហុងកុង និងប្រទេសឥណ្ឌូនេស៊ីជាដើម។
ជាមួយគ្នានេះ ឯកឧត្តម ប៉ាន សូរស័ក្ដិបានផ្តល់ការណែនាំដល់សហព័ន្ធជំរុញការនាំចេញអង្ករទៅកាន់ទីផ្សារប្រទេសចិនបន្ថែមទៀត ដោយសារកម្ពុជាមានមូលដ្ឋាននៃការប្តេជ្ញាចិត្តខ្ពស់ពីប្រទេសចិន តាមរយៈការចុះអនុស្សរណៈយោគយល់គ្នាលើកទី៦ រវាងក្រសួងពាណិជ្ជកម្ម និង ក្រុមហ៊ុនសាជីវកម្មចិន (COFCO) ដែលមានបរិមាណសរុបចំនួន៤០ម៉ឺនតោន។
អត្ថបទគួរអាន
សូមបញ្ជាក់ថា នៅ៤ឆ្នាំចុងក្រោយនេះ ប្រទេសចិន គឺជាទីផ្សារនាំចេញអង្ករដ៏ធំជាងគេបំផុតរបស់កម្ពុជា ដោយមានបរិមាណនាំចេញចន្លោះពីជាង២៤ម៉ឺនតោន ទៅដល់ជាង៣០ម៉ឺនតោនក្នុងមួយឆ្នាំ។ បន្ទាប់ពីនេះ គឺទីផ្សារសហភាពអឺរ៉ុប និងអាស៊ាន។
យ៉ាងណាមិញ ក្រៅតែពីទីផ្សារចិន ប្រធានសហព័ន្ធស្រូវអង្ករកម្ពុជារូបនេះ បញ្ជាក់ទៀតថា សហព័ន្ធ មានផែនការបន្តពង្រឹងអភិបាលកិច្ចនៃកិច្ចដឹកនាំរបស់សហព័ន្ធ ដោយរៀបចំផែនការយុទ្ធសាស្រ្តរយៈពេល៥ឆ្នាំ (២០២៣-២០២៧) និងបន្តសហការជាមួយក្រសួងពាណិជ្ជកម្ម តាមរយៈក្រុមហ៊ុនហ្គ្រីនត្រេដ ក្នុងការបើកច្រកទីផ្សារថ្មីៗ ជាពិសេសទីផ្សារប្រទេសហ្វីលីពីន ព្រមទាំងពង្រីកទីផ្សារនាំចេញសក្តានុពលដទៃទៀត តាមរយៈការចូលរួមការតាំងពិព័រណ៍ពាណិជ្ជកម្មនៅបណ្ដាប្រទេសជាច្រើនទៀតផងដែរ។
សូមបញ្ជាក់ថា នៅពេញមួយឆ្នាំ២០២២ ប្រទេសកម្ពុជា បាននាំចេញអង្ករទៅកាន់ទីផ្សារអន្តរជាតិសរុបជិត ៦៤ម៉ឺនតោន ដែលមានទឹកប្រាក់សរុបប្រមាណជាង ៤០០លានដុល្លារអាមេរិក៕
