ការបង្ហាញពីផែនការនាំចេញអង្ករទៅហ្វីលីពីនេះ ធ្វើឡើងនៅក្រោយពេលដែលគណៈប្រតិភូកម្ពុជាបានទស្សនកិច្ច៣ថ្ងៃនៅប្រទេសហ្វីលីពីន ហើយភាគីហ្វីពីនបានចាប់អារម្មណ៍ខ្លាំងចំពោះគុណភាពអង្ករកម្ពុជា។ មិនតែប៉ុណ្ណោះ ភាគីទាំងពីរបានឯកភាពគ្នា និងធ្វើការសិក្សាពីលទ្ធភាពក្នុងការចុះអនុស្សរណៈយោគយល់គ្នាជាថ្មី ស្តីពីការធ្វើពាណិជ្ជកម្មអង្ករ ក្រោមយន្តការរដ្ឋ និងរដ្ឋ ដែលសង្ឃឹមថានឹងចុះហត្ថលេខានាពេលឆាប់ៗ ខាងមុខនេះ។
យោងតាមក្រសួងពាណិជ្ជកម្ម កម្ពុជា នៅថ្ងៃទី៧ ខែកុម្ភៈ ឆ្នាំ២០២៣ ដំណើរបំពេញទស្សនកិច្ចរបស់កម្ពុជា ទៅកាន់ប្រទេសហ្វីលីពីន កាលពីថ្ងៃទី១-៣កុម្ភៈ ឆ្នាំ២០២៣ មានគោលបំណងពង្រីកទីផ្សារស្រូវ អង្ករ របស់កម្ពុជា។ ខណៈភាគីទាំងពីរបានឯកភាពគ្នា និងធ្វើការសិក្សាពីលទ្ធភាពក្នុងការចុះអនុស្សរណៈយោគយល់គ្នជាថ្មី ស្តីពីការធ្វើពាណិជ្ជកម្មអង្ករ ក្រោមយន្តការរដ្ឋ និងរដ្ឋ ដែលសង្ឃឹមថានឹងចុះហត្ថលេខានាពេលឆាប់ៗ ខាងមុខ។ ជាមួយគ្នានេះ ខាងភាគីហ្វីលីពីនក៏បានបើកឱ្យមានការធ្វើពាណិជ្ជកម្មអង្ករដោយសេរី នៅក្រោមរូបភាពឯកជន និងឯកជនដោយផ្ទាល់តែម្តង ទៅតាមបរិមាណ គុណភាព និងតម្លៃ ដែលបានឯកភាព រវាងភាគីទាំងពីរ។
អត្ថបទគួរអាន
ឧកញ៉ា ចាន់ សុឃាំង ប្រធានសហព័ន្ធស្រូវ-អង្ករ កម្ពុជា បានគូសបញ្ជាក់ថា នាឱកាសទស្សនកិច្ចសិក្សារបស់សហព័ន្ធស្រូវ-អង្ករ កម្ពុជា ទៅកាន់ប្រទេសហ្វីលីពីន រយៈពេល៣ថ្ងៃ គណៈប្រតិភូកម្ពុជា បានជួបជាមួយបណ្តាក្រុមហ៊ុននាំចូល សមាគមន៍រោងម៉ាស៊ីនកិនស្រូវ របស់ហ្វីលីពីន ដែលមានការចាប់អារម្មណ៍លើគុណភាពអង្ករ កម្ពុជា ក៏ដូចជា មានការពិភាក្សា និងចចារលើតម្លៃសម្រាប់ផ្គត់ផ្គង់ ផងដែរ។ ប្រធានសហព័ន្ធស្រូវ-អង្ករ កម្ពុជា បានបញ្ជាក់ថា ជាលទ្ធផលក្រោយដំណើរទស្សនកិច្ច កម្ពុជាមានក្ដីរំពឹងខ្ពស់ថា នឹងអាចនាំចេញអង្ករទៅកាន់ទីផ្សារប្រទេសហ្វីលីពីន ក្នុងពេលឆាប់ៗ ខណៈភាគីទាំងពីរកំពុងពិនិត្យមើលលក្ខខណ្ឌ និងលទ្ធភាព មួយចំនួនក្នុងការនាំចូល។ បើតាមការអះអារបស់ឧកញ៉ា ចាន់ សុឃាំង ប្រភេទអង្ករដែលកម្ពុជាគ្រោងនឹងនាំចូលទៅទីផ្សារហ្វីលីពីន គឺជាប្រភេទអង្ករស បាយទន់ ហើយក្នុងដំណាក់កាលសាកល្បង កម្ពុជា អាចនឹងនាំអង្ករប្រមាណ១ពាន់តោន។
ប្រធានសហព័ន្ធស្រូវ-អង្ករ កម្ពុជា ក៏បានសង្កត់ធ្ងន់ដែរថា ក្រោយបំពេញទស្សនកិច្ចនៅហ្វីលីពីន គណៈប្រតិភូកម្ពុជា ក៏បានអញ្ជើញភាគីហ្វីលីពីន ឱ្យមកទស្សនកិច្ចសិក្សាលើរោងម៉ាស៊ីនកិនស្រូវកម្ពុជា ដោយផ្ទាល់វិញ ផងដែរ ដើម្បីបង្កើនទំនុកចិត្ត និងទំនាក់ទំនងឱ្យកាន់តែប្រសើរឡើង។ បើតាមឧកញ៉ា ចាន់ សុឃាំង ដំណើរទស្សនកិច្ចរបស់ភាគីហ្វីលីពីន គ្រោងនឹងធ្វើឡើង នៅអំឡុងខែកុម្ភៈ និងខែមីនា ឆ្នាំ២០២៣ ខាងមុខនេះ ដោយ អំឡុងនៃទស្សនៈកិច្ចនេះ អាចនឹងឈានដល់ការចុះកិច្ចសន្យាទិញ-លក់ តែម្តង។
សូមបញ្ជាក់ថា ប្រទេសហ្វីលីពីនជាប្រទេសផលិតស្រូវ ហើយក៏ជាប្រទេសនាំចូលអង្ករដ៏ធំមួយនៅក្នុងតំបន់អាស៊ីផងដែរ ដែលជាក់ស្ដែងក្នុងឆ្នាំ២០២២ កន្លងទៅ ប្រទេសហ្វីលីពីន បាននាំចូលអង្ករចំនួនជាង ៣លាន៨សែនតោន ពីប្រទេសនានា ដែលប្រភេទអង្ករភាគច្រើនបំផុតជាប្រភេទអង្ករសធម្មតា។
សូមបញ្ជាក់ថា នៅរយៈពេលពេញមួយឆ្នាំ២០២២ កម្ពុជាបាននាំចេញអង្ករ ទៅកាន់ទីផ្សារអន្តរជាតិ បានជាង ៦៣ម៉ឺនតោន និងនាំចេញស្រូវ ក្នុងបរិមាណជាង ៣លានតោន ដែលគិតជាទឹកប្រាក់សរុប ជាង ១ ២៥៥លានដុល្លារសហរដ្ឋអាមេរិក។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ៕
