របាយការណ៍ប្រចាំត្រីមាស ដែលកាស៊ីណូណាហ្គាវើលដ៍ បានប្រកាសនៅផ្សារហ៊ុននៅកោះហុងកុងបានអះអាងថា នៅត្រីមាសទី១នៃឆ្នាំ២០២៤ កាស៊ីណូណាហ្គារកប្រាក់ចំណូលបានសរុបជាង១៤៥លានដុល្លារ កើនឡើងជិត២៤% បើធៀបនឹងរយៈដូចគ្នាកាលពីឆ្នាំមុន។ ជាមួយនឹងប្រាក់ចំណូលនេះ បានជួយឱ្យកាស៊ីណូនេះទទួលបានប្រាក់ចំណេញមិនទាន់បង់ពន្ធសរុបជាង៨០លានដុល្លារ កើនឡើងជិត៣៣% បើធៀបនឹងរយៈពេលដូចគ្នាកាលពីឆ្នាំ២០២៣កន្លងទៅ។
តាមរយៈប្រាក់ចំណូល និងប្រាក់ចំណេញនេះ បានសបញ្ជាក់ឱ្យឃើញថា ស្ថានភាពអាជីវកម្មកាស៊ីណូនៅពេលនេះបានវិលមករកប្រក្រតីភាពឡើងវិញហើយ បន្ទាប់ពីវិស័យនេះបានរងផលប៉ះពាល់យ៉ាងដំណំដោយសារការរីករាលដាលនៃមេរោគកូវីដ-១៩។ បច្ចុប្បន្នប្រតិបត្តិការសាច់ប្រាក់ចេញចូលរបស់ក្រុមហ៊ុនកាស៊ីណូ និងរីសតដ៏ល្បីល្បាញនៅកម្ពុជាមួយនេះ មានតម្លៃសរុបជាង៩៥១លានដុល្លារកើនឡើងជាង៨% បើធៀបនឹងរយៈពេលដូចគ្នាកាលពីឆ្នាំមុន។
តាមស្ថិតិដែលក្រុមហ៊ុនកាស៊ីណូនេះ បានកត់ត្រាបានបង្ហាញថា អតិថិជនកម្រិត VIP គឺមានកំណើនកើនឡើងជាង១៩% ហើយបុព្វលាភនៃសេវាកម្មនានានៅក្នុងឧស្សាហកម្មនេះ ត្រូវបានគេដឹងថា មានកំណើនជាង២៤%។
ក្រុមហ៊ុនណាហ្គាវើលដ៍ បាននិយាយថា អតិថិជនវិលជុំប្រចាំថ្ងៃជាមធ្យមក្នុងត្រីមាសទី១ ឆ្នាំ២០២៤ គឺបានកើនឡើងលើសទំហំអាជីវកម្មជាមធ្យម ដែលបានកត់ត្រាក្នុងឆ្នាំសារពើពន្ធ ដែលបានបញ្ចប់នៅថ្ងៃទី៣១ ខែធ្នូ ឆ្នាំ២០១៩ ដែលជាឆ្នាំមុនផ្ទុះជំងឺរាតត្បាតកូវីដ-១៩។ កាលពីឆ្នាំ២០២៣ កន្លងទៅ កាស៊ីណូ និងរីសតណាហ្គាវើលដ៍ អាចប្រមូលប្រាក់ចំណេញសុទ្ធជិត ១៧៨លានដុល្លារកើនឡើងជិត១៦% បើធៀបនឹងឆ្នាំ២០២២៕
ដោយៈ សរ សុជាតិ
