កិច្ចខិតខំប្រឹងប្រែងរបស់ប៉េកាំង បានបង្កឱ្យមានការព្រួយបារម្ភក្នុងចំណោមសម្ព័ន្ធមិត្តរបស់សហរដ្ឋអាមេរិកនៅក្នុងតំបន់ រួមទាំងរដ្ឋាភិបាលក្រុងវ៉ាស៊ីនតោនខ្លួនឯងផងដែរ។ បារម្ភ នៅត្រង់ថា ចិនអាចនឹងពង្រីកឥទ្ធិពលកាន់តែខ្លាំងនៅក្នុងតំបន់នេះ។ នេះបើតាមការចុះផ្សាយដោយសារព័ត៌មានរ៉យទ័រ។
បើតាមសេចក្តីប្រកាសព័ត៌មានព្រាងមួយច្បាប់ និងផែនការសកម្មភាពរយៈពេលប្រាំឆ្នាំដែលចិនបានផ្ញើទៅកាន់ប្រទេសដែលត្រូវបានអញ្ជើញឲ្យចូលរួមនៅមុនកិច្ចប្រជុំបានបង្ហាញថា ប្រទេសចិនកំពុងស្វែងរកកិច្ចសហការពាណិជ្ជកម្មក្នុងតំបន់ អមមកជាមួយនូវកិច្ចព្រមព្រៀងសន្តិសុខផងដែរ។ សេចក្តីព្រាងផែនការសកម្មភាព៥ឆ្នាំ ត្រូវបានផ្ញើរទៅកាន់ប្រទេសកោះដូចជា កោះសាម័រ តុងហ្គា គីរីបាទី ប៉ាពួញូហ្គីណេ វ៉ានូអាទូ កោះសូឡូម៉ុង កោះនីយូ និងកោះវ៉ានូអាទូ។ ប៉ុន្តែ ដោយសារតែមានវិធានការបិទព្រំដែននៅក្នុងតំបន់ ដែលបណ្តាលមកពីការរាតត្បាតកូវីដ១៩ រដ្ឋមន្ត្រីការបរទេសនៃកោះទាំងនេះ ភាគច្រើនបានចូលរួមកិច្ចប្រជុំតាមរយៈប្រព័ន្ធវីដេអូ។
បន្ថែមពីកលើវត្តមានរបស់លោក វ៉ាង យី ប្រធានាធិបតីចិនលោកស៊ី ជីនពីង បានថ្លែងសុន្ទរកថាជាលាយលក្ខណ៍អក្សរទៅកាន់កិច្ចប្រជុំរដ្ឋមន្ត្រីការបរទេសចិន-ប៉ាស៊ីហ្វិកថា ប្រទេសចិននឹងតែងតែជាមិត្តដ៏ល្អរបស់បណ្តាប្រទេសកោះប៉ាស៊ីហ្វិក មិនថាស្ថានភាពអន្តរជាតិផ្លាស់ប្តូរយ៉ាងណានោះទេ។ ប្រទេសចិនមានឆន្ទៈក្នុងការធ្វើការជាមួយបណ្តាប្រទេសកោះប៉ាស៊ីហ្វិកដើម្បីកសាងសហគមន៍ដែលមានអនាគតរួមគ្នា។
អត្ថបទគួរអាន
គួរជម្រាបថា នៅមុនកិច្ចប្រជុំនាថ្ងៃចន្ទសប្តាហ៍នេះ ប្រទេសកោះមួយចំនួនបានចុះកិច្ចព្រមព្រៀងលក្ខណៈទ្វេភាគីជាមួយចិនរួចទៅហើយ។ ជាក់ស្តែង កាលពីចុងសប្តាហ៍មុន ប្រទេសចិន និងកោះសាម័របានចុះហត្ថលេខាលើកិច្ចព្រមព្រៀងមួយ ដើម្បីឆ្ពោះទៅមានកិច្ចសហប្រតិបត្តិការទ្រង់ទ្រាយធំ នៅក្នុងវិស័យសេដ្ឋកិច្ច និងសន្តិសុខ។ កិច្ចព្រមព្រៀងស្រដៀងគ្នានេះត្រូវបានចិនចុះហត្ថលេខាជាមួយកោះសាឡូម៉ុងផងដែរ កាលពីពេលថ្មីៗកន្លងទៅ។
សូមបញ្ជាក់ថា ការពង្រីកឥទ្ធិពលរបស់ចិននៅក្នុងតំបន់កំពុងបង្កឲ្យមានក្តីបារម្ភពីអូស្រា្តលី ញូហ្សេលែន អាមេរិក និងជប៉ុនផងដែរ។ ប្រទេសទាំងនេះយល់ថា កិច្ចព្រមព្រៀងរវាងចិននិងប្រទេសកោះនៅប៉ាស៊ិហ្វិក នឹងបង្កផលវិបាកក្នុងតំបន់ ហើយអាចនាំឲ្យមានវត្តមានយោធាចិននៅជិតកៀកជិតនឹងប្រទេសអូស្ត្រាលី។
តួយ៉ាង រដ្ឋាភិបាលអូស្ត្រាលីថ្មីរបស់នាយករដ្ឋមន្ត្រីអាល់បាណេស បានចាត់ទុកសំណុំរឿងនេះ ជាគោលនយោបាយការបរទេសអាទិភាពរបស់លោក ដើម្បីទប់ទល់នឹងការឥទ្ធិពលរបស់ទីក្រុងប៉េកាំង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
