បើតាមក្រុមប្រឹក្សាអភិវឌ្ឍន៍កម្ពុជា (CDC) នៅក្នុងខែសីហា ឆ្នាំ២០២៤ កន្លងទៅ កម្ពុជាទទួលបានគម្រោងវិនិយោគថ្មី និងគម្រោងពង្រីកផលិតកម្មចំនួន៥៣គម្រោង ដោយមានទុនវិនិយោគសរុបជាង១,២ពាន់លានដុល្លារ និងអាចបង្កើតការងារបានប្រមាណ៣ម៉ឺន៣ពាន់កន្លែង។ អ្វីដែលគួរឱ្យកត់សម្គាល់ក្នុងចំណោមគម្រោងដែល CDC បានអនុម័តទាំងនេះ ភាគច្រើនស្ថិតក្នុងវិស័យឧស្សាហកម្ម និងទេសចរណ៍ ក្នុងនោះគម្រោងវិនិយោគមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន៣១គម្រោង និងគម្រោងវិនិយោគក្នុងតំបន់សេដ្ឋកិច្ចពិសេសមានចំនួន២២គម្រោង។
បើតាមការបញ្ជាក់របស់ CDC គម្រោងវិនិយោគនៅក្រៅតំបន់សេដ្ឋកិច្ចពិសេស ដែលមានភាពលេចធ្លោក្នុងខែសីហានេះ មានដូចជាគម្រោងពង្រីកផលិតកម្មរបស់គម្រោងវិនិយោគបង្កើតសណ្ឋាគារផ្កាយ៥ ដែលមានទីតាំងស្ថិតនៅក្រុងព្រះសីហនុ ខេត្តព្រះសីហនុ ជាមួយទុនវិនិយោគបន្ថែម៨០លានដុល្លារ និងគម្រោងពង្រីកផលិតកម្មរបស់គម្រោងវិនិយោគបង្កើតរោងចក្រផលិតចំណីសត្វ និងកែច្នៃស្បែកសត្វ ដែលមានទីតាំងស្ថិតនៅស្រុកព្រៃនប់ ខេត្តព្រះសីហនុ ក្នុងទុនវិនិយោគបន្ថែមប្រមាណជាង១៩លានដុល្លារ។ ដោយឡែក សម្រាប់គម្រោងវិនិយោគនៅក្នុងតំបន់សេដ្ឋកិច្ចពិសេស ដែលមានភាពលេចធ្លោនោះ គឺគម្រោងបង្កើតតំបន់សេដ្ឋកិច្ចពិសេសស្រុកស្រែអំបិល ដែលមានទីតាំងស្ថិតនៅ ស្រុកស្រែអំបិល ខេត្តកោះកុង ក្នុងទុនវិនិយោគចំនួន៨០លានដុល្លារ, គម្រោងវិនិយោគបង្កើតរោងចក្រផលិតសំបកកង់រថយន្ត ដែលមានទីតាំងស្ថិតនៅក្នុងតំបន់សេដ្ឋ-កិច្ចពិសេស យូ ប៊ី អ៊ី ស្នួល ក្នុងទុនវិនិយោគ៤៣០លានដុល្លារអាម៉េរិក និងគម្រោងវិនិយោគបង្កើតរោងចក្រផលិតសំបកកង់រថយន្តដែលមានទីតាំងស្ថិតនៅក្នុងតំបន់សេដ្ឋ-កិច្ចពិសេស ស៊ីន បាវិត ក្នុងទុនវិនិយោគប្រមាណជាង២៥៦លានដុល្លារ។
គួរជម្រាបថា នៅក្នុងចំណោមគម្រោងវិនិយោគទាំងអស់នៅក្នុងខែសីហានេះ ការវិនិយោគមកពីប្រទេសចិនស្ថិតនៅលំដាប់លេខរៀងទី១ ដោយបានរួមចំណែកជាង៨៤% នៃទុនវិនិយោគសរុប ខណៈដែលការវិនិយោគក្នុងស្រុកបានគ្របដណ្តប់ប្រមាណជាង៩% នៃទុនវិនិយោគសរុប៕
អត្ថបទ សោម ស្រីពេជ្រ និងរូបភាពឯកសារ
