គេនៅចាំបានថា កាលពី២សប្តាហ៍មុនប្រទេសអូស្ត្រាលី បានប្រកាសលុបចោលកិច្ចព្រមព្រៀងគម្រោង «ផ្លូវ១ ខ្សែក្រវាត់១» (Belt and Road Initiative) ជាមួយចិន ដែលបង្កឱ្យមានការខឹងសម្បាយ៉ាងខ្លាំងពីទីក្រុងប៉េកាំង។ អូស្ត្រាលីលុបចោលគម្រោងដ៏ធំនេះ ដោយបានអះអាងថា គម្រោងនេះរំលោភផលប្រយោជន៍ជាតិ និយាយឲ្យស្រួលស្តាប់ គម្រោងនេះធ្វើឲ្យចិនមានក្រឡាលើអូស្ត្រាលីតែម្តង។
រដ្ឋមន្ត្រីក្រសួង ការបរទេសនៃប្រទេសអូស្ត្រាលី លោកស្រី ម៉ារី ផេន (Marise Payne) បានឱ្យដឹងថា៖ «កិច្ចព្រមព្រៀង ទ្វេភាគី រវាងទីក្រុងប៉េកាំង ជាមួយរដ្ឋ វិចតួរៀរ Victoria ស្ថិតក្នុងចំណោមច្បាប់ចំនួន៤ ដែលអនុម័តដោយច្បាប់ថ្មី បានផ្តល់អំណាចដល់រដ្ឋាភិបាលសហព័ន្ធអូស្ត្រាលី ដើម្បីលុបចោលកិច្ចព្រមព្រៀងអន្តរជាតិណា ដែលរំលោភផលប្រយោជន៍ជាតិ»។
ស្ថានទូតចិនប្រចាំនៅអូស្ត្រាលីបានឱ្យដឹងនៅក្នុងសេចក្តីថ្លែងការណ៍មួយថា៖ «សេចក្តីសម្រេចលុបចោលគម្រោងដ៏ធំនេះ បង្ហាញថារដ្ឋាភិបាលអូស្ត្រាលី គ្មានភាពស្មោះត្រង់ក្នុងការធ្វើឱ្យប្រសើរឡើងនូវទំនាក់ទំនងចិន-អូស្ត្រាលីនោះទេ»។
អត្ថបទទាក់ទង
នៅពីរសប្តាហ៍ បន្ទាប់ពីរដ្ឋាភិបាលអូស្ត្រាលីលុបចោលកិច្ចព្រមព្រៀងស្ដីពីគម្រោងផ្លូវ១ ខ្សែក្រវាត់១ រវាងរដ្ឋាភិបាលប្រទេសទាំងពីរ ពេលនេះប្រទេសចិនបានប្រកាសព្យួរយន្តការ «កិច្ចសន្ទនាសេដ្ឋកិច្ចយុទ្ធសាស្ត្រចិន-អូស្ត្រាលី» ដោយគ្មានពេលកំណត់ជាក់លាក់ ទុកជាការសងសឹកវិញ។
ទោះយ៉ាងណា អ្នកវិភាគនយោបាយអន្តរជាតិមើលឃើញថា ការសម្រេចចិត្តរបស់ចិនទំនងជាមានផលប៉ះពាល់ជាក់ស្ដែងតិចតួចប៉ុណ្ណោះ ទៅលើអូស្ត្រាលី ។ អ្នកវិភាគបន្ថែមថា ការសម្រេចចិត្តព្យួរកិច្ចសន្ទនានេះពីភាគីចិន គឺគ្រាន់តែជានិមិត្តរូបប៉ុណ្ណោះ ដោយពុំមានផលប៉ះពាល់អ្វីដុំកំភួនឡើយ។
គួររំឭកថា ចំណងមិត្តភាពទ្វេភាគីនៃប្រទេសទាំងពីរបានផ្តើមតានតឹងនៅឆ្នាំ២០១៨នៅពេលប្រទេសអូស្ត្រាលីបានក្លាយជាប្រទេសដំបូងគេហាមជាសាធារណៈពីការប្រើប្រាស់បច្ចេកវិទ្យាយក្សរបស់ចិនគឺ បណ្តាញ 5G របស់ Huawei។ ទំនាក់ទំនងកាន់តែអាក្រក់ឡើងកាលពីឆ្នាំមុននៅពេលអូស្ត្រាលីអំពាវនាវឲ្យមានការស៊ើបអង្កេតឯករាជ្យមួយពីប្រភពដើមនៃវីរុសកូរ៉ូណា ដែលធ្វើឲ្យមានការសងសឹកជាលក្ខណៈពាណិជ្ជកម្មពីរដ្ឋាភិបាលចិន។
ជាក់ស្តែងកាលពីចុងខែមីនា ប្រទេសចិនបានប្រកាសដាក់ពន្ធជាង ២០០%លើស្រានាំចូលពីអូស្ត្រាលី សម្រាប់រយៈពេល៥ឆ្នាំ។
យ៉ាងណាមិញប្រការនេះ ទោះចង់ឬមិនចង់វាបានធ្វើឲ្យប៉ះពាល់ដល់ផលប្រយោជន៍អូស្ត្រាលីយ៉ាងខ្លាំង។ ប៉ះពាល់ដោយហេតុថា ប្រទេសចិនជាទីផ្សារអ្នកនាំចូលស្រាក្រហមដ៏ច្រើនសម្បើមពីអូស្ត្រាលី។
សូមបញ្ជាក់ថា ការនាំចេញស្រាអូស្ត្រាលីទៅកាន់ប្រទេសចិននៅ៣ខែដំបូងនៃឆ្នាំ២០២១នេះ មានត្រឹមតែប្រមាណជាង ៩លានដុល្លារអាមេរិកប៉ុណ្ណោះ ខណៈដែលកាលពី៣ខែដើមឆ្នាំ២០២០ មានដល់ទៅជាង ២៥០លានដុល្លារអាមេរិកឯណោះ ពោលគឺធ្លាក់ចុះប្រមាណ៩៦% ដែលវាជាការធ្លាក់ចុះដ៏សម្បើម។ នេះបើតាមអាជ្ញាធរអូស្ត្រាលី ដែលបានបញ្ជាក់នាពេលថ្មីៗនេះ។
ដោយឡែក ការវិនិយោគរបស់ប្រទេសចិន នៅក្នុងប្រទេសអូស្ដ្រាលី ក៏បានធ្លាក់ចុះជិត ២ភាគ ៣ដែរកាលពីឆ្នាំមុន ពោលគឺធ្លាក់មកនៅត្រឹមតិចជាង ១ ពាន់លានដុល្លារអាមេរិកប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
