អ្នកវិទ្យាសាស្ត្រចិន ដែលចូលរួមក្នុងគម្រោងស្រាវជ្រាវបង្កើតប្រព័ន្ធរ៉ាដាដ៏ទំនើបនិងដ៏ខ្លាំងបំផុតរបស់ប្រទេសចិន បានឱ្យដឹងថា កប៉ាលយោធាចិនមួយដែលបំពាក់ប្រព័ន្ធរ៉ាដាថ្មីនោះនឹងមានសមត្ថភាពចាប់រលកសញ្ញាកាំជ្រួចបាល្លីស្ទីក ឬមីស៊ីលលឿនជាងសំឡេង ដែលស្ថិតនៅចម្ងាយរហូតដល់ ៤ពាន់ ៥ រយគីឡូម៉ែត្រ ពោលគឺប្រហាក់ប្រហែលនឹងចម្ងាយពីភាគខាងត្បូងប្រទេសចិនទៅភាគខាងជើងប្រទេសអូស្ត្រាលី។
អ្នកស្រាវជ្រាវបានបន្ថែមថា ប្រព័ន្ធរ៉ាដានោះ ក៏អាចតាមដានគោលដៅច្រើនក្នុងពេលតែមួយនៅក្នុងរង្វង់ចម្ងាយ ៣ ពាន់ ៥ រយគីឡូម៉ែត្រ ឬចម្ងាយពីប្រទេសចិនទៅកោះហ្គាំរបស់សហរដ្ឋអាមេរិកនៅក្នុងមហាសមុទ្រប៉ាស៊ីហ្វិក។ នេះបើយោងតាមរបាយការណ៍ផ្ទៀងផ្ទាត់លទ្ធផលស្រាវជ្រាវមួយ ដែលត្រូវបានចុះផ្សាយនៅថ្ងៃទី៣១ ខែឧសភា ដោយទស្សនាវដ្តីចិន Electric Machines and Control។
ក្រុមអ្នកវិទ្យាសាស្ត្រនិងវិស្វករមួយក្រុម ដែលដឹកនាំដោយលោកសាស្ត្រាចារ្យ ស៊ុន ដុងយ៉ាង មកពីសាកលវិទ្យាល័យវិទ្យសាស្ត្រ និងបច្ចេកវិទ្យាហាប៊ីន បាននិយាយថា ប្រព័ន្ធរ៉ាដាដែលទើបរកឃើញអាចដំឡើងនៅលើនាវាចម្បាំងថ្មីរបស់ចិន ប៉ុន្ដែពេលនេះ វាកំពុងកំពុងស្ថិតក្នុងការស្ថាបនាដំណាក់កាលដំបូងនៅឡើយ។
អត្ថបទគួរអាន
ជាក់ស្ដែង ប្រព័ន្ធរ៉ាដាដែលបំពាក់នៅលើនាវាយោធាភាគច្រើន មានសមត្ថភាពតានដាន និងចាប់រលកសញ្ញាបានត្រឹមតែក្នុងចម្ងាយពី ២ ទៅ ៣ រយគីឡូម៉ែត្រប៉ុណ្ណោះ ដោយសារតែគេពិបាករកថាមពលចាំបាច់ដ៏សន្ធឹកសន្ធាប់មកផ្គត់ផ្គង់ ដើម្បីពង្រីកសមត្ថភាពរបស់ប្រព័ន្ធរ៉ាដាទាំងនោះ។ ឥឡូវ ក្រុមអ្នកស្រាវជ្រាវបាននិយាយថា ពួកគេអាចដោះស្រាយបញ្ហានេះបានហើយ ដោយប្រើប្រព័ន្ធជំរុញថាមពលអគ្គិសនី ដែលបំពាក់នៅលើនាវាចម្បាំងថ្មីៗ និងដែលអាចបញ្ជូនសញ្ញាអេឡិកត្រូម៉ាញ៉េទិកស្មើនឹង ៣០ ម៉េហ្គាវ៉ាត់។
អ្នកវិទ្យាសាស្ត្រចិនផ្នែករ៉ាដាម្នាក់ដែលមិនស្ថិតនៅក្នុងគម្រោងកសាងប្រព័ន្ធរ៉ាដាថ្មី បាននិយាយថា «បើរ៉ាដានាវាជើងទឹករបស់ចិនកាន់តែខ្លាំង, គឺវាកាន់តែប្រាកដថា ទីក្រុងប៉េកាំងអាចរាំងស្កាត់សហរដ្ឋអាមេរិកនៅក្នុងសមុទ្រចិនខាងត្បូងបាន»។
សូមញ្ជាក់ថា ប្រទេសចិនក៏កំពុងប្រជែងសហរដ្ឋអាមេរិកនៅក្នុងសមត្ថភាពផលិតកប៉ាល់ដែរ ដោយទីក្រុងប៉េកាំងមានកន្លែងផលិតកប៉ាល់កងទ័ពជើងទឹកចំនួន ១៣ កន្លែង ដែលផលិតនាវាចម្បាំងធំៗ និងទំនើបៗបំផុតក្នុងពិភពលោក។ រដ្ឋមន្ត្រីកងទ័ពជើងទឹកអាមេរិក លោក ខាឡូស ដែល តូរូ (Carlos Del Toro) បាននិយាយកាលពីខែកុម្ភៈកន្លងទៅថា កន្លែងផលិតកប៉ាល់មួយរបស់ចិន ក្នុងចំណោមកន្លែងផលិតកប៉ាល់ទាំងនេះ មានសមត្ថភាពច្រើនជាងរោងចក្រផលិតកប៉ាល់ទាំងប្រាំពីររបស់សហរដ្ឋអាមេរិករួមបញ្ចូលគ្នាទៅទៀត។
