បើតាមរបាយការណ៍ពីការិយាល័យស្ថិតិជាតិរបស់ចិនបានឲ្យដឹងថា កំណើនសេដ្ឋកិច្ចរបស់ប្រទេសមហាអំណាចសេដ្ឋកិច្ចពិភពលោកទី២នេះ សម្រេចបានត្រឹមតែ៦,១% ប៉ុណ្ណោះ នៅក្នុងឆ្នាំ២០១៩កន្លងទៅនេះ ដែលវាគឺជាកំណើនមួយទាបបំផុត បើគិតតាំងពីឆ្នាំ១៩៩០មក។
តួលេខកំណើននេះដែរ គឺត្រូវគ្នានឹងការព្យាកររបស់អ្នកវិភាគដែលមកពីស្ថាប័នល្បីៗ ហើយវាក៏ស្ថិតនៅក្នុងគោលដៅកំណត់ផ្លូវការរបស់ទីក្រុងប៉េកាំងដែរ ដែលបានព្យាករកំណើនសេដ្ឋកិច្ចចិនថា នឹងមានអត្រា ៦% ទៅ៦,៥%។ ប៉ុន្ដែ កំណើនសេដ្ឋកិច្ចចិនកាលពីឆ្នាំ២០១៩នេះ ត្រូវបានគេមើលឃើញថា គឺមានទាបជាងកំណើន ៦,៦% ដែលមាននៅក្នុងឆ្នាំ២០១៨ ពោលគឺ បានធ្លាក់ចុះ ០,៥% ហើយជាកំណើនមួយទាបបំផុតក្នុងរយៈពេល៣០ឆ្នាំមកនេះ។
អត្ថបទទាក់ទង!
លោក នីង ជីស ស្នងការការិយាល័យស្ថិតិជាតិ បានឲ្យដឹងថា ជាទូទៅសេដ្ឋកិច្ចរបស់ចិន បានទ្រទ្រង់នូវស្ថិរភាពនៃកំណើននៅក្នុងឆ្នាំ២០១៩។ យ៉ាងណាក៏ដោយចុះ លោកបញ្ជាក់ថា គេក៏គួរតែទទួលស្គាល់ដែរថា កំណើនសេដ្ឋកិច្ច និងពាណិជ្ជកម្មសកលកំពុងមានការធ្លាក់ចុះ។ ក្នុងនោះ មានហេតុផលច្រើនយ៉ាងណាស់ដែលធ្វើឲ្យមានអស្ថិរភាព និងហានិភ័យ ចំពោះសេដ្ឋកិច្ចសកល ក្នុងការរងនូវសម្ពាធធ្លាក់ចុះ។
របាយការណ៍ពីកំណើនសេដ្ឋកិច្ចចិននេះ គឺត្រូវបានចេញផ្សាយបន្ទាប់មានការហត្ថលេខាលើកិច្ចព្រមព្រៀងពាណិជ្ជកម្មដំណាក់កាលទី១ រវាងអាមេរិក និងចិនកាលពីថ្ងៃពុធ ទី១៥ខែមករាកន្លងទៅនេះ។ ក្នុងកិច្ចព្រមព្រៀងនោះ បានតម្រូវឲ្យប្រទេសចិនទិញទំនិញពីអាមេរិកតម្លៃ ២០០ ពាន់លានដុល្លារក្នុងរយៈពេល ២ឆ្នាំ។ ខណៈដែលអាមេរិកវិញ ក៏បានយល់ព្រមកាត់បន្ថយពាក់កណ្ដាលនៃពន្ធមួយចំនួន ដែលបានដាក់លើទំនិញចិន ប៉ុន្ដែ ពន្ធនៅតែមានលើ២ភាគ៣នៃទឹកប្រាក់ ៥០០ ពាន់លានដុល្លារ ក្នុងការនាំចូលទំនិញពីប្រទេសក្នុងតំបន់អាស៊ី។
ធនាគារពិភពលោក បាននិយាយក្នុងរបាយការណ៍របស់ខ្លួនក្នុងខែមករានេះថា ការចុះខ្សោយនៃការនាំចេញ ក្នុងប្រទេសចិន បានធ្វើឲ្យមានផលប៉ះពាល់ដល់តម្រូវការប្រើប្រាស់ក្នុងស្រុក។
ធនាគារពិភពលោក គូសបញ្ជាក់ទៀតថា គោលនយោបាយមិនច្បាស់លាស់ និងការដំឡើងពន្ធលើការនាំចេញទៅអាមេរិក ក៏ជាកត្តាជំរុញដល់ការប៉ះពាល់ចំពោះសកម្មភាពផលិតកម្ម និងសតិអារម្មណ៍អ្នកវិនិយោគផងដែរ។
ប៉ុន្ដែ ក្រុមអ្នកវិភាគវិញមើលឃើញថា ការធ្លាក់ចុះនៃកំណើនសេដ្ឋកិច្ចចិន គឺមានលក្ខណៈជារចនាសម្ព័ន្ធ ព្រោះថា ចិនបានក្លាយមកជាប្រទេសមានសេដ្ឋកិច្ចអភិវឌ្ឍន៍កាន់តែច្រើនឡើងហើយ ហើយក៏ត្រូវប្រឈមនឹងបញ្ហាប្រជាសាស្ត្រ ដូចជាចំនួនប្រជាជនគ្រប់អាយុចូលធ្វើការគឺកាន់តែមានតិចទៅៗ៕
None
