ប្រធានាធិបតីអាមេរិក លោក ដូណាល់ ត្រាំ បានចាត់ទុកកិច្ចព្រមព្រៀងនេះ ជាកិច្ចព្រមព្រៀងដ៏សំខាន់ ដែលមិនធ្លាប់មានជាប្រវត្តិសាស្រ្តជាមួយ ចិន ហើយក៏ជាកិច្ចព្រមព្រៀងដែលនឹងធានាបាននូវ ការធ្វើពាណិជ្ជកម្មដោយយុត្តិធម៌និងយោគយល់ទៅវិញទៅមក។
លើសពីនេះ ចិន យល់ព្រមទិញផលិតផលកសិកម្ម និងទំនិញជាច្រើនប្រភេទទៀតពី អាមេរិក ក្នុងរយៈពេល ២ឆ្នាំ ហើយចិនក៏ការពារដល់បច្ចេកវិទ្យារបស់អាមេរិក និងចុងក្រោយក៏មានយន្តការពង្រឹងច្បាប់ថ្មីទាក់ទងនឹងកម្មសិទ្ធិបញ្ញា ដែលមានការពិន័យកាន់តែធ្ងន់ធ្ងរ។
យ៉ាងណាក៏ដោយ ពន្ធលើទំនិញនាំចូលពី ចិន ដែលមានតម្លៃរាប់ពាន់លានដុល្លារនោះ គឺអាមេរិក នៅតែដាក់គំនាបនេះដដែល តែក៏មិនមានការគំរាមដំឡើងពន្ធថ្មីដែរ ដែលធ្វើឲ្យ បរិយាកាសសេដ្ឋកិច្ចសកល មានភាពធូរស្បើយបន្តិច ហើយទីផ្សារហ៊ុនទូទាំងសកលលោក ក៏មានកំណើនមកវិញផងដែរ។
អត្ថបទទាក់ទង!
លោក ដូណាល់ ត្រាំ បញ្ជាក់ថា អាមេរិក និងចិនអាចជជែកគ្នាពី ការលុបចោលពន្ធដែលនៅសល់នេះ នៅក្នុងកិច្ចព្រមព្រៀងពាណិជ្ជកម្មដំណាក់កាលទី ២ ហើយបើសិនជា លោក យល់ព្រមលើកលែងពន្ធភ្លាមៗនោះ លោក ត្រាំ ប្រហែលជាគ្មានទឹកមាត់ប្រៃ អាចចរចាជាមួយចិនបានទេ។
ឧបនាយករដ្ឋមន្រ្តីចិន លោក លូ ហេ ដែលដឹកនាំគណៈប្រតិភូចិន ក្នុងពិធីចុះហត្ថលេខានេះ បានអានសារលិខិតរបស់ប្រធានាធិបតីចិនលោក ស៊ី ជីនពីង ដែលមានអត្ថន័យថា កិច្ចព្រមព្រៀងដំណាក់កាលទី ១នេះ គឺជារឿងល្អសម្រាប់ប្រទេសចិន អាមេរិក និងសកលលោក ហើយជំហានបន្ទាប់ ភាគីទាំងពីរ គួរតែអនុវត្តកិច្ចព្រមព្រៀងនេះឲ្យបានល្អ និងចាត់ទុកជា គំរូ សម្រាប់ជំរុញកិច្ចសហប្រតិបត្តិការ សេដ្ឋកិច្ច និងទំនាក់ទំនងទ្វេភាគីឲ្យកាន់តែល្អប្រសើរ។
យ៉ាងណាក៏ដោយចុះ សេដ្ឋកិច្ចវិទូជាច្រើនរូប អះអាងថា នៅក្នុងដំណាក់កាលទី ២ គឺកាន់តែលំបាកសម្រាប់ការចរចា ជាពិសេសទាក់ទងនឹងការឧបត្ថម្ភធនដល់ឧស្សាហកម្មរបស់រដ្ឋាភិបាល និងការផ្ទេរបច្ចេកវិទ្យាដោយបង្ខំ។
ជាមួយគ្នានេះ មន្រ្តីចិនពាក់ព័ន្ធនឹងកិច្ចព្រមព្រៀងនេះ បង្ហាញថា ចិន មិនបានបង្ហាញឆន្ទៈណាមួយ ក្នុងការកាត់បន្ថយពន្ធ ដែលចិនបានដំឡើងលើទំនិញអាមេរិកនោះទេ ដោយគ្រាន់តែយល់ព្រមបន្ថែមការបញ្ជាទិញទំនិញពីអាមេរិកថែមប៉ុណ្ណោះ។
គួរជម្រាបដែរថា កិច្ចព្រមព្រៀងដំណាក់កាលទី ១នេះ ចង់បង្ហាញថា អាមេរិក និងចិន ទើបតែចាប់ផ្តើមជំហានទីមួយប៉ុណ្ណោះ ដើម្បីដោះស្រាយបញ្ហា ដែលមានរយៈពេលវែង ស្មុគស្មាញ និងពិបាកបំផុត ជាពិសេសគឺការចាប់ផ្តើមបន្ស៊ីគ្នា នូវភាពខុសគ្នារវាង អាមេរិក និងចិន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
