អ្នកនាំពាក្យក្រសួងការបរទេសចិន លោក ចាវ លីជៀន បាននិយាយថា ទណ្ឌកម្មដែលចិនបានដាក់គឺសមហេតុផលហើយ ហើយចិនក៏ទាមទារឲ្យភាគីអឺរ៉ុប បញ្ឈប់ការជ្រៀតជ្រែកចូលកិច្ចការផ្ទៃក្នុងរបស់ចិនជាបន្ទាន់ ហើយត្រូវបោះបង់ចោលនូវការប្រឈមុខដាក់គ្នាផងដែរ។ លោក ចាវ លីជៀន បន្ថែមទៀតថា ការដាក់ទណ្ឌកម្មដោយគ្មានហេតុផលពីសំណាក់សហភាពអឺរ៉ុបមកលើចិន បានបង្កឲ្យមានផលលំបាកនៅក្នុងទំនាក់ទំនងរវាងចិន និងអឺរ៉ុប ហើយនេះជាអ្វីដែលចិនមិនចង់ឃើញនោះទេ ហើយការទទួលខុសត្រូវក៏មិនត្រូវទម្លាក់តែមកលើខាងភាគីចិនទាំងស្រុងនោះដែរ។
សប្ដាហ៍មុននេះ សភាអឺរ៉ុបបានចេញព្រមានប្រទេសចិន ដោយប្រលយពាក្យសម្ដីថា ខ្លួននឹងមិនផ្ដល់សច្ចាប័នដល់កិច្ចព្រមព្រៀងពាណិជ្ជកម្ម និងការវិនិយោគ ដែលបានធ្វើកន្លងមកជាមួយចិននោះទេ ដរាបណាការដាក់ទណ្ឌកម្មលើសមាជិកសភាអឺរ៉ុបនៅតែបន្ដមាន។
អត្ថបទទាក់ទង!
គួររំឭកបន្ដិចថា ចិនបានដាក់ទណ្ឌកម្មលើសមាជិកសភាអឺរ៉ុប បន្ទាប់ពី អឺរ៉ុប អង់គ្លេស កាណាដា និងអាមេរិក បានរួមគ្នាដាក់ទណ្ឌកម្មប្រឆាំងនឹងមន្ត្រីចិន ទាក់ទងទៅនឹងការរំលោភសិទ្ធិមនុស្ស នៅក្នុងតំបន់ភាគខាងលិចខេត្តស៊ិនជាំងប្រទេសចិន។ ដោយសារតែ បញ្ហានេះ បានធ្វើឲ្យកិច្ចព្រមព្រៀងពាណិជ្ជកម្ម និងការវិនិយោគ រវាងចិន និងអឺរ៉ុបត្រូវជាប់គាំងមកទល់ពេលនេះ ហើយការដាក់ទណ្ឌកម្ម និងការប៉ះពារពាក្យសម្ដីរវាងភាគីទាំងពីរក៏បានលេចឡើងជាបន្ដបន្ទាប់ផងដែរ។
សូមបញ្ជាក់ថា ប្រទេសចិន បច្ចុប្បន្ន គឺជាដៃគូពាណិជ្ជកម្មធំបំផុតទី២ របស់សហភាពអឺរ៉ុប បន្ទាប់ពីសហរដ្ឋអាមេរិក ហើយអឺរ៉ុបក៏ជាដៃគូពាណិជ្ជកម្មធំបំផុតរបស់ចិនផងដែរ។ ប្រទេសចិន និងសហភាពអឺរ៉ុបត្រូវបានគេរាយការណ៍ថា មានការដោះដូរពាណិជ្ជកម្មរវាងគ្នាជាមធ្យមប្រមាណ១ពាន់២រយលានដុល្លារអាមេរិកឯណោះ ក្នុងមួយថ្ងៃ៕
None
