អ្នកវិភាគមួយចំនួនបាននិយាយថា អាជ្ញាធររូបិយវត្ថុរបស់ចិន កំពុងតែផ្លាស់ប្តូរយុទ្ធសាស្រ្តទីផ្សារដើម្បីធ្វើយ៉ាងណាបង្កើនតម្លៃប្រាក់យ័ន ខណៈដែលអ្នកទុទ្ទិដ្ឋិនិយមផ្សេងទៀតកំពុងតែស្ទាក់ស្ទើរ និងមានចម្ងល់ចំពោះការសម្រេចចិត្តរបស់អ្នក ដែលមានឥទ្ធិពលលើសេដ្ឋកិច្ចចិន នៅក្នុងការដាក់ចេញនូវយុទ្ធសាស្រ្តថ្មីនេះ។
សេដ្ឋវិទូ ថស្តេន ស្លូក ( Torsten Slok ) អ្នកជំនាញសេដ្ឋកិច្ចនៅក្រុមហ៊ុន Apollo Global Management បាននិយាយនៅក្នុងប្លក់មួយដែលបានបង្ហោះកាលពីដើមខែតុលា ថា យុទ្ធសាស្រ្តនេះប្រហែលជាប្រទេសចិន នៅពីក្រោយការកើនឡើងនៃអត្រាការប្រាក់រយៈពេលវែងរបស់សហរដ្ឋអាម៉េរិក។
លោកបានអះអាងថា ចិនទំនងជាអ្នកដែលមានឥទ្ធិពលនៅពីក្រោយបញ្ហានៃកំណើនមូលបត្របំណុលអាម៉េរិករយៈពេលវែងឈានដល់កម្រិតខ្ពស់រយៈពេល១៦ឆ្នាំ ហើយគេដឹងថា ចិនបានដើរតួនាទីដ៏សំខាន់នេះតាំងពីឆ្នាំ២០១៣ មកម៉្លេះ។
យោងតាមទិន្នន័យពីក្រសួងរតនាគាសហរដ្ឋអាម៉េរិកបានឲ្យដឹងថា តារាងតុល្យការនៃរតនាគារអាម៉េរិកដែលកាន់កាប់ដោយប្រទេសចិន មានតម្លៃសរុបប្រមាណជាជាង៨០៥ពាន់លានដុល្លារ ក្នុងខែសីហា ហើយតម្លៃនេះធ្លាក់ចុះ៤០ភាគរយ បើធៀបនឹងតួរលេខកាលពីទសវត្សរ៍មុន។ អ្នកវិភាគបានអះអាងថា ប្រទេសចិនធ្លាប់បានប្រមូលទិញមូលបត្របំណុលរបស់អាម៉េរិកយ៉ាងសកម្មជាមួយនឹងទុនបម្រុងប្តូរប្រាក់បរទេសដ៏ច្រើន ដែលបានក្លាយជាអ្នកវិនិយោគបរទេសធំជាងគេទីពីរនៅក្នុងរតនាគារសហរដ្ឋអាម៉េរិកបន្ទាប់ពីប្រទេសជប៉ុន។
ប្រភពដដែលបានបន្តថា ដោយមើលឃើញពីទំហំនៃការកាន់កាប់របស់ខ្លួនកាន់តែធំ ការលក់បណ្ណបំណុលរបស់ប្រទេសចិនអាចធ្វើឱ្យតម្លៃមូលបត្របំណុលរបស់សហរដ្ឋអាម៉េរិកឡើងថ្លៃ ដោយជំរុញឱ្យអត្រាការប្រាក់កើនឡើង។
អត្ថបទគួរអាន
អ្នកវិភាគខ្លះទៀតបានអះអាងថា ការធ្លាក់ចុះនៃសមតុល្យរតនាគាររបស់ប្រទេសមហាអំណាយនេះ ជាសញ្ញានៃការប្តេជ្ញាចិត្តយ៉ាងមុតមាំរបស់ទីក្រុងប៉េកាំងក្នុងការការពាររូបិយប័ណ្ណរបស់ខ្លួន។
តាមការសន្និដ្ឋានដោយក្រុមហ៊ុនបណ្តាក់ទុន Goldman Sachs ប្រទេសចិនកំពុងប្រឈមមុខនឹងបញ្ហាមូលធនយ៉ាងធ្ងន់ធ្ងរ ដែលបណ្តាលមកពីការកើនឡើង នៃការព្រួយបារម្ភអំពីកំណើនសេដ្ឋកិច្ចនិងបន្ទុកបំណុលរបស់ខ្លួន។ នៅក្នុងខែកញ្ញា លំហូរចេញមូលធនបានកើនឡើងដល់ ៧៥ពាន់លានដុល្លារ ដែលជាចំនួនលំហូទុនប្រចាំខែដ៏ច្រើនបំផុតចាប់តាំងពីឆ្នាំ២០១៦។
ក្រុមហ៊ុននេះបានសន្និដ្ឋានថា បញ្ហាលំហូរទុនដ៏ច្រើននេះបង្កើតសម្ពាធធ្លាក់ចុះយ៉ាងខ្លាំងលើប្រាក់យ័ន ដែលឥឡូវនេះការជួញដូរប្រាក់យ័ន គឺធ្លាក់ចុះក្នុងរង្វង់ជាង៧យ័ន បើធៀបនឹងប្រាក់ដុល្លារ ដែលជាកម្រិតទាបបំផុតចាប់តាំងពីឆ្នាំ២០០៧។
ពាក់ព័ន្ធនឹងបញ្ហានេះពាណិជ្ជកររូបិយប័ណ្ណនៅធនាគារបរទេសមួយបាននិយាយថា ធនាគារដែលគ្រប់គ្រងដោយរដ្ឋរបស់ប្រទេសចិនទំនងជាបានទម្លាក់ចោលសិទ្ធិនៃការកាន់កាប់ ប្រាក់ដុល្លារដ៏មហាសាលកាលពីខែតុលា ដែលជាពេលដែលគេដឹងថា ពលរដ្ឋចិនមានចរន្តនៃការចំណាយខ្ពស់៕
ដោយៈ សរ សុជាតិ
