ជប៉ុន វ៉ាដាច់ថៃ ក្លាយជាគោលដៅទេសចរណ៍ទាក់ទាញបំផុតសម្រាប់ភ្ញៀវទេសចរចិន
ភ្ញៀវទេសចរចិន បានសម្រុកធ្វើដំណើរកម្សាន្តទៅកាន់ប្រទេសជប៉ុនយ៉ាងច្រើនកកកុញនៅក្នុងឱកាសពិធីបុណ្យចូលឆ្នាំថ្មីប្រពៃណីចិន រយៈពេល៨ថ្ងៃ ដែលទើបបញ្ចប់…
មហាយក្សចិន ដែលជាមហាអំណាចសេដ្ឋកិច្ចធំបំផុតទីពីរនៅលើពិភពលោកបានប្រកាសដាក់ពន្ធលើទំនិញរបស់សហរដ្ឋអាម៉េរិកមួយចំនួនដោយផ្តោតលើផលិតផលថាមពល ដើម្បីឆ្លើយតបនឹងការដាក់ពន្ធ១០% លើទំនិញរបស់ចិនពីសំណាក់លោក ដូណាល់ ត្រាំ ប្រធានាធិបតីសហរដ្ឋអាម៉េរិក។ ទន្ទឹមនឹងសង្គ្រាមពាណិជ្ជកម្មជាមួយអាម៉េរិក កំពុងឡើងកម្តៅ ទីក្រុងប៉េកាំង កំពុងស្វែងរកការធ្វើពិពិធកម្មទីផ្សារតាមរយៈបានបញ្ជូនគណប្រតិភូដែលមានជំនាញខាងប្រេង និងឧស្ម័នមួយក្រុមទៅកាន់ប្រទេសកាហ្សាក់ស្ថាន ដើម្បីស្វែងរកឱកាសពាណិជ្ជកម្មថ្មីៗ ជាពិសេសលើផ្នែកថាមពលដែលពីមុនពឹងផ្អែកលើសហរដ្ឋអាម៉េរិក។
ទូរទស្សន៍ចិន CCTV បានរាយការណ៍ថា នៅប៉ុន្មានម៉ោងបន្ទាប់ពីចិនបានកំណត់ពន្ធសងសឹកលើទំនិញអាម៉េរិកបានចូលជាធរមាននៅដើមសប្តាហ៍នេះ ប្រតិភូចិនមួយក្រុមត្រូវបានបញ្ជូនទៅកាន់ប្រទេសនៅអាស៊ីកណ្តាល ដើម្បីចរចារជាមួយនឹងក្រុមហ៊ុននានា ដែលពាក់ព័ន្ធនឹងថាមពល គីមីឥន្ធនៈ និងគ្រឿងម៉ាស៊ីនផ្នែកឧស្សាហកម្មថាមពល។
កាលពីឆ្នាំ២០២៤ ទំហំពាណិជ្ជកម្មរវាងកាហ្សាក់ស្ថាន និងចិន បានឈានដល់ជិត៤៤ពាន់លានដុល្លារ ជាមួយនឹងកំណើនប្រមាណ៦,៨%។ ក្រៅពីប្រទេសកាហ្សាក់ស្ថាន ចិនក៏កំពុងរៀបចំសម្រួចគោលដៅ ដើម្បីច្បាម និងពង្រីកពាណិជ្ជកម្មបន្ថែមនៅតំបន់មជ្ឈិមបូព៌ា អាស៊ីកណ្តាល អឺរ៉ុប អាហ្វ្រិក និងអាម៉េរិកឡាទីនផងដែរ។
នៅដើមសប្តាហ៍នេះប្រទេសចិន បានដំឡើងពន្ធប្រមាណ១៥% លើផលិតផលចំនួន៨ ដែលនាំចូលពីសហរដ្ឋអាម៉េរិក រួមទាំងធ្យូងថ្ម និងឧស្ម័នធម្មជាតិរាវ ហើយ១០% លើផលិតផល៧២មុខ ដែលរួមមានប្រេងឆៅ និងគ្រឿងយន្តកសិកម្មជាដើម៕
ដោយៈ សរ សុជាតិ
