បើតាមរដ្ឋបាលខេត្តសៀមរាបបានអះអាងថា ការសម្រេចលុបចោលគម្រោងកំពង់ផែខាងលើនេះ ដោយសារតែក្រុមហ៊ុនឯកជនដែលជាអ្នកអភិវឌ្ឍន៍គម្រោងនេះ ល្មើសគោលការណ៍ច្បាប់ដែលបានកំណត់ដោយរាជរដ្ឋាភិបាលកម្ពុជា។
លោក សុខ ថុល នាយករដ្ឋបាលខេត្តសៀមរាប បានបញ្ចាក់ថា រដ្ឋាភិបាលពិតជាបានសម្រេចលុបចោលគម្រោងអភិវឌ្ឍន៍កំពង់ផែទេសចរណ៍ ចុងឃ្នៀស របស់ក្រុមហ៊ុន ស៊ូ ជីង ពិតមែន។ ទាក់ទងនឹងបញ្ហានេះ លោក សុខ ថុល បានបញ្ជាក់ប្រាប់សារព័ត៌មានខេមបូណូមីស ថាមូលហេតុដែលរដ្ឋាភិបាលសម្រេចលុបចោលគម្រោងខាងលើ ដោយសារតែក្រុមហ៊ុន ស៊ូ ជីង ដែលជាអ្នកអភិវឌ្ឍន៍គម្រោងនេះ មិនបានអនុវត្តត្រឹមត្រូវតាមគោលការណ៍កំណត់ ការបង់ពន្ធ និង ស.ជ.ណ ដែលរដ្ឋាភិបាលកម្ពុជា បានកំណត់។
អត្ថបទគួរអាន
សូមបញ្ជាក់ថា យោងតាមលិខិតមួយរបស់ទីស្ដីការគណៈរដ្ឋមន្ត្រី ដែលបានចុះហត្ថលេខា កាលពីថ្ងៃទី២៩ ខែកក្កដា ដោយរដ្ឋលេខាធិការប្រចាំការទីស្ដីការគណៈរដ្ឋមន្ត្រីឯកឧត្តម ហ៊ីង ថូរ៉ាក់ស៊ី បានបញ្ជាក់ថា ក្រោយពីលុបគោលការណ៍វិនិយោគសាងសង់កំពង់ផែទេសចរណ៍ចុងឃ្នៀសហើយនោះ រាល់ទ្រព្យសម្បត្តិ និងហេដ្ឋារចនាសម្ព័ន្ធនានា នៅទីតាំងវិនិយោគនេះ នឹងត្រូវចាត់ទុកជាសម្បត្តិរបស់រដ្ឋ និងប្រគល់ជូនរដ្ឋបាលខេត្តសៀមរាប និងគ្រឹះស្ថានអង្គរ គ្រប់គ្រងជាបណ្ដោះអាសន្ន។
ទន្ទឹមនេះ គណៈរដ្ឋមន្ត្រីក៏បានបង្កើតគណៈកម្មការអន្តរក្រសួងមួយ ដឹកនាំដោយក្រសួងសេដ្ឋកិច្ចនិងហិរញ្ញវត្ថុ ដោយមានការចូលរួមពីតំណាងទីស្ដីការគណៈរដ្ឋមន្ត្រី ក្រុមប្រឹក្សាអភិវឌ្ឍន៍កម្ពុជា ក្រសួងរៀបចំដែនដី នគរូបនីយកម្មនិងសំណង់ រដ្ឋបាលខេត្តសៀមរាប និងស្ថាប័នជំនាញពាក់ព័ន្ធ ដើម្បីដោះស្រាយបញ្ហានានា របស់គម្រោងខាងលើនេះផងដែរ៕
អត្ថបទ៖ ខន ណារី
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
