សម្ព័ន្ធយោធា NATO និងដៃគូគ្រោងធ្វើការរួមគ្នាលើកិច្ចការធំៗ៤ ដើម្បីទប់រុស្ស៊ី កូរ៉េខាងជើង និងចិន

នាវេទិកាឧស្សាហកម្មការពារជាតិ NATO (NATO Defense Industry Forum) ដែលជាវេទិកាដំបូងធ្វើឡើងនៅខាងក្រៅកិច្ចប្រជុំកំពូលរបស់អង្គការបក្សសម្ព័ន្ធយោធា NATO ក្នុងរដ្ឋធានីវ៉ាស៊ីនតោន រៀបចំដោយសភាពាណិជ្ជកម្មអាម៉េរិក ទីប្រឹក្សាសន្តិសុខជាតិអាម៉េរិក លោក ជេក ស៊ូលីវែន (Jake Sullivan) បានគូសបញ្ជាក់ថា គម្រោងថ្មីៗទាំង៤នេះនឹងផ្ដោតលើបញ្ហាប្រទេសអ៊ុយក្រែន បច្ចេកវិទ្យាបញ្ញាសិប្បនិម្មិត AI ការផ្សព្វផ្សាយព័ត៌មានមិនពិត និងសន្តិសុខតាមប្រព័ន្ធអ៊ីនធឺណិត (Cybersecurity)។

លោកបានពន្យល់ថា គំនិតផ្តួចផ្តើមនីមួយៗនៃគម្រោងទាំងនេះមានភាពខុសប្លែកគ្នា ប៉ុន្តែគោលដៅសំខាន់គឺដូចគ្នា នោះគឺការប្រើប្រាស់កម្លាំងនៃបណ្ដាប្រទេសប្រជាធិបតេយ្យដែលមានសមត្ថភាពខ្ពស់ ដើម្បីដោះស្រាយបញ្ហាប្រឈមសកលរួមគ្នា។

លោកបានគូសបញ្ជាក់បន្ថែមទៀតថា អ្វីដែលកើតឡើងនៅតំបន់អឺរ៉ុប ជះផលប៉ះពាល់ដល់តំបន់ឥណ្ឌូ-ប៉ាស៊ីហ្វិក ហើយអ្វីដែលកើតឡើងនៅតំបន់ឥណ្ឌូ-ប៉ាស៊ីហ្វិក ក៏ជះផលប៉ះពាល់ដល់តំបន់អឺរ៉ុប ផងដែរ។

ប្រធានបទដ៏សំខាន់នៃកិច្ចប្រជុំកំពូលរបស់អង្គការបក្សសម្ព័ន្ធយោធា NATO នៅឆ្នាំនេះ គឺការរួបរួមកម្លាំងនៃបណ្ដាប្រទេសប្រជាធិបតេយ្យដែលមានចិត្តគំនិតដូចគ្នា ដើម្បីដោះស្រាយបញ្ហាប្រឈមនានាដែលបង្កឡើងដោយប្រទេសរុស្ស៊ី មហាយក្សចិន និងកូរ៉េខាងជើង ខណៈដែលបណ្ដាអ្នកចូលរួមក្នុងព្រឹត្តិការណ៍រំឭកខួបលើកទី៧៥ របស់អង្គការបក្សសម្ព័ន្ធយោធា NATO នេះបានសង្កត់ធ្ងន់លើការប្រែប្រួលនៃទិដ្ឋភាពសន្តិសុខរបស់ពិភពលោក។

សូមបញ្ជាក់ថា បច្ចុប្បន្នអង្គការបក្សសម្ព័ន្ធយោធា NATO មានប្រទេសជាសមាជិកចំនួន៣២ រួមមាន អាល់បានី បែលហ្ស៊ិក បុលហ្គារី កាណាដា ក្រូអាស៊ី ឆេក ដាណឺម៉ាក អេស្តូនី ហ្វាំងឡង់ ក្រិច ហុងគ្រី អ៊ីស្លង់ អ៊ីតាលី ឡាតវី លីទុយអានី លុចសំបួ ម៉ុងតេណេក្រូ ហូឡង់ ម៉ាសេដូនីខាងជើង ន័រវែស ប៉ូឡូញ ព័រទុយហ្គាល់ រ៉ូម៉ានី ស្លូវ៉ាគី ស្លូវេនី ស៊ុយអែត តួកគី អេស្ប៉ាញ បារាំង អាល្លឺម៉ង់ ចក្រភពអង់គ្លេស និងសហរដ្ឋអាម៉េរិក៕

ដោយ: តែម សុខុម