តើចិន និងអឺរ៉ុប អាចធ្លាក់ចូលក្នុងសង្គ្រាមពាណិជ្ជកម្មដែរ ឬទេ បន្ទាប់ពីភាគីទាំងពីរចាត់វិធានការពន្ធផ្ចាញ់គ្នាទៅវិញទៅមក?

មានការបារម្ភកាន់តែខ្លាំងថា នៅពេលនេះមហាយក្សចិន និងសហភាពអឺរ៉ុប ទំនងជាធ្លាក់ចូលក្នុងភ្លើងសង្គ្រាមពាណិជ្ជជាមួយគ្នាហើយ បន្ទាប់ពីភាគីទាំងពីរបានដាក់ពន្ធផ្ចាញ់គ្នាទៅវិញទៅមក។ កាលពីដើមខែតុលា សហភាពអឺរ៉ុប បានអនុម័តការយកពន្ធរហូតដល់ជាង៣៥% លើរថយន្តអគ្គិសនីផលិតនៅចិនក្រោមហេតុផលរដ្ឋាភិបាលចិន បានជួយឧបត្ថម្ភធនដល់ក្រុមហ៊ុនផលិតរថយន្តចិន ដែលធ្វើឱ្យពួកគេអាចលក់បង្ខូចតម្លៃនៅលើទីផ្សារអឺរ៉ុប។

មិនអង្អង់យូរឡើយ ទីក្រុងប៉េកាំង ដែលជាមហាអំណាចសេដ្ឋកិច្ចលេខ២ នៅលើពិភពលោក ក៏បានចាត់វិធានការឆ្លើយតបវិញផងដែរ កាលពីថ្ងៃអង្គារ ដើមសប្តាហ៍នេះ តាមរយៈការយកពន្​បណ្ដោះ​អាសន្នចន្លោះពី៣០% ទៅ៣៩% លើម៉ាកផលិតផលល្បីៗមួយចំនួនរបស់ប្លុកនេះ ជាពិសេសពាក់ព័ន្ធផលិតផលស្រាតែម្ដង ហើយវិធានការនេះបានកើតឡើងនៅ៤ថ្ងៃ បន្ទាប់ពីប្រទេសអឺរ៉ុបភាគច្រើនបានអនុម័តពន្ធលើរថយន្តអគ្គិសនីចិន។

សង្គ្រាមពាណិជ្ជកម្មប្រទាញប្រទុងគ្នារវាងចិន និងអឺរ៉ុបនេះ បានហុចឱកាសឱ្យអ្នកចរចារបស់ចិន បង្កើនឥទ្ធិពលក្នុងកិច្ចពិភាក្សាជាមួយសហភាពអឺរ៉ុបអំពីការកាត់បន្ថយ ឬលុបបំបាត់ពន្ធជាង៣៥% លើរថយន្តអគ្គិសនីរបស់ចិន ដែលនឹងចូលជាធរមាននៅចុងខែនេះ។

ពន្ធលើផលិតល្បីៗរបស់អឺរ៉ុបនេះ គឺគ្រាន់តែជាវិធានការបណ្តោះអាសន្នប៉ុណ្ណោះ ហើយតាមរយៈពន្ធនេះតម្រូវឱ្យអ្នកនាំចូលទាំងអស់ត្រូវដាក់ប្រាក់តម្កល់នៅភ្នាក់ងារគយចិន ដែលនឹងចាប់ផ្ដើមអនុវត្តចាប់ពីថ្ងៃសុក្រ សប្ដាហ៍នេះតទៅតែម្តង។

ការយកពន្ធលើផលិតផលល្បីៗរបស់អឺរ៉ុបពីសំណាក់រដ្ឋាភិបាលចិននេះ ធ្វើឡើយបន្ទាប់ពីក្រសួងពាណិជ្ជកម្មចិន កាលពីចុងខែសីហា បានរកឃើញថា ផលិតផលអឺរ៉ុបមួយចំនួនកំពុងត្រូវបានដាក់លក់បង្ខូចតម្លៃនៅក្នុងប្រទេសចិន ដែលបានគំរាមកំហែងដល់«ការខូចខាតយ៉ាងខ្លាំង»ដល់អ្នកផលិតក្នុងស្រុក​៕

អត្ថបទ៖ សុខ មង្គល